Tinang Magam nga nna nga ra ai.

Rev. NNgai Gam

Mungkan pinra ndai aq ntsa e wam dam nna nmai nga ga ai. Aung San wa aq ga madat nna shut ai gaw rai sai. Dai hpe gaw rawt malan ai hte tai saga ai. Rawt malan ngu ai gaw mungkan ndai ntsa e grai manu dan nga ai. rawt malan ai lam awngdang yang sha n rai. n awngdang tim naw manu dan ai.

Rawt malan ai ngu ai gaw tinang aq shinggyim ahkaw ahkang hpe dum ai lam rai nga ai. Dai zawn dum ai myit gaw arawng nga ra ai. Dip ai lam nga yang rawt malan ai mung sha anga nga na re, rawt malan ai myit pyi n rawng ai amyu gaw mungkan ndai ntsa e dusat hte bung nga ai.

Jinghpaw Wunpawng sha ni aq rawt malan ai myit hpe dingyang di sa wa ra ai. Dai gaw Jinghpaw Wunpawng sha ni shinggyim masha tai ai lam rai nga ai. Shinggyim ahkaw ahkang lu yang she mai ai ngu hkam sha ai lam rai nga ai. Dai myit gaw I grai manu dan nga ai. Dai gaw awngdang ai, n awngdang ai hta n madung ai, awngdang ai lam gaw ahkaw ahkang kaja jang awngdang na, n kaja jang n awngdang na sha rai nga ai.

Ndai hku myit yu u. Anhte gaw Myen mung kaw nga lawm ai ni n re. Myen mung aq dingdung daw de anhte aq Jiwa ni kabye nna nga ai ni rai nga ai, tinang du kabye tawn lu ai lamu ga gaw tinang a lamu ga rai nga ai. Lup hkaq law nga ai shara shagu Jinghpaw Wunpawng sha ni aq lamu ga rai nga ai. Jinghpaw ni aq n sharai kau lu ai dazik gaw Lup rai nga ai, manau shadung n rai. Kadai hpe gasat dang nna lu ai lamu ga n rai nga ai. Jiwa ni du kabye da ai lamu ga rai nga ai. Lup gaw Kat-sa(Kata) ga lau du hkra naw taw nga ai.

Htunghking bung ai Jinghpaw Wunpawng sha ni India mung aq dingdung daw de, Myen mung aq dingdung daw hte Yunan mung du hkra nga ai. Htunghking bung ai ngu ai gaw kahpu kanau, Mayu Dama, kaji kawoi, kashu kahkri rai, Ji jaw nna nga pra ai ni rai nga ga ai. Ya dai ni law malawng Ji njaw sai, ratim htunghking naw nga nga ai.

Ga htunghking mat laika mat rai yang chyawm, Jinghpaw Wunpawng mat na re. Lamu ga gaw Jinghpaw Wunpawng aq lamu ga sha rai nga ai. Jinghpaw Wunpawng sha ni kabye du nga ai lamu ga gaw Jinghpaw aq lamu ga sha rai nga ai. Kaga masha ni wa nga ai raitim Jinghpaw lamu ga sha re. Dai kaw dum nta gap ra ai, lawu Myen mung de n mai gap ai. Lawu Myen mung e gap da ai, Wutdek nta ni gaw Myen aq rai nga ai. Jingbpaw mung kaw gap ai Myen nta ni mung Jinghpaw aq nta sha rai nga ai. Dai hpe adum sha dum ra ai.

Mhatpungtin gaw madu ni hpe tsasam shatai ai, manam shatai ai lam rai nga ai, tsasam masha hku ginghka kau ai lam rai nga ai. Tinang aq mungdan kaw tinang shang mayu ai shaloi shang wa na, pru mayu ai shaloi pru wa lu na ahkang nga ai. Lam hkawm lakmat Jaw ai lam gaw tinang aq mungdan hta manam tai ai lam rai nga ai. Lam hkawm nhtoi htum ai ngu ai mung n nga ra ai, tinang aq mungdan kaw galoi shang mayu yang shang, galoi pru mayu yang pru, shani chyingtung e pru mayu yang pru, shana yuptung e shang wa mayu yang shang wa rai nga ai. Kadai wa ngai hpe shatsang na rai ta? tinang kam ai hku nga lu ai.

Shanglawt gasat ai ngu ai gaw dai zawn re ai shanglawt ahkang hpe hkum da ai majaw gasat ai lam sha rai nga ai. Bai hpyen hpe shang shachyut ai lam sha rai nga ai. Dai majaw dai zawn re ai majan gaw galoi mung nga ra ai. Shanglawt ahkaw ahkang ngu ai gaw mi Karai Kasang Jaw ai shing nrai, shangai ai shani lawm wa ai ahkaw ahkang rai nga ai. Dai ahkaw ahkang hpe ban hkum ai hpe gasat shaden kau ra ga ai. Dai majaw rawt malan ai ngu ai gaw dip sha ai wa nga dingsa gaw nga nga ra ai. Bai, myit yu mu, ya gasat nga ai shanglawt gaw htaning hpraning lu ai baw n re ai. Dip ai wa nga dingsang rawt malan ai mung sha anga nga ra ai baw rai nga ai. Myit gade galu ra ai!

Shanglawt lu ai shani gaw masha wa aq Store room kaw kahtap tawn ai, shanglawt shaw jaw na hku i? Mungdaw mungdan aq matu shakut ai da, aw! Shanglawt lu ai shani aq store room kaw na shaw jaw na hku wa i! Shanglawt lu ai shani ahkaw ahkang lu na da aw ! shi aq store room kaw na shaw jaw na hku la sha u!.......

Anhte aq kaji kawa ni kabye da ai lamu ga kaw she anhte nga ai. Shanglawt ahkang hpe shangai ai shani jaw dat ai. Anhte lu chyalu rai sai, n lu ai ngu shadu ai gaw dai ahkang hpe manang wa e jebat ya ai maiaw rai nga ai. Dai majaw mayam myit n mai rawng ga ai. Dai ahkaw ahkang hpe dai mungdan masha ni makawp maga ra nga ai. Masha wa jaw yang sha lu na ngu ai baw myit n mai rawng ai. Madu myit, Magam myit, tinang ngu ai myit rawng ra ga ai. Jinghpaw Wunpawng sha ni hta lai nna Jinghpaw mung hta nga ai, kade daram shahti ai wa, kade daram du ai wa raitim shigaw tsasam manam sha rai nga ai. Ngai gaw labu palawng pyi n chye bu hpun ai masha, kade matsan tim, Madu rai nngai ngu ai myit sharawng gaq law... ngu shadum dat nngai.