Wunpawng Hpaji Munu ni hpang de

Knet; February 23, 2007

Myo kaba de na hpaji chye ai, Wunpawng hpaji munu ni hpang de maling sin Aji Marip, ashun awam gari gawa lata hte ndai laika man hta salum ga si, gahtawk shakap let shana hkrum shaga dat nngai.

Mungkan prat gaw grai galai shai lawan nga a hka! myit du ai kaw hkum ndu lu mat wa dai hpe myit yu yang, Aw! Ma zawn sha naw nga rai tim, grai shai mat wa sahka! ngu ai hpe myit dum lu ai. Shana de n sin sin mat wa rai ten shagu hta, Radio tingsa hpe hkrawk hkrak dat yu yang, Computer, Internet, Globalization nga grai galai shai lawan ai prat re nga nna, shana na ai hpe she a matsing da lu we ai. Lachyum gaw A Ji mung nchye, raitim galai shai lawan ai ngu ai hpe gaw wahtam e, matsing she rai mat sai.

Layang ga de gaw A Ji mung nmu ai majaw ndai ga si, teng nteng chye ai raitim, A Ji a shagawng bum ga amatu gaw grai teng nga ai. Lai sai ten hta grai tsit tsawm sim sa ngwi pyaw ai shagawng bum ga hta ya gaw Hkru kapran si na zawn nga kahtet ai majaw hprawng kau da na zawn nga mat sai. Marit maroi chyang-ngau, u tu ni a malai, Juk gadu nsen she, na maza mala nga ngoi gadu taw nga sai. Dwi sau mu ai hka san ni a malai, Hkumpuk ntsin she shara la kau nu ai. Wu Rat Wu tsang, Chyahkan hkan la hte katsu du ai, Uri, U gan Chyahkyi, Shan nga, Wa du, ni a malai Nga Bu, Shan Bu ni she shara la mat sai. Sharaw, Magwi shabam ngoi ai nsen mat mat nna, shinggyim masha ahkrap shabam ai nsen ni, she na lu mat ai. A Ji dingla ni mung hpahka lu jahta ai hta, nga chye ntsin hte dwi hpa ntsin ni lu nna she, galai shai ai hku jahta mat saga ai.

Moi gaw htinggaw yungnu, hti dang ai hta ya gaw htinggaw ginsum hti n dang she law jat wa ai majaw, lam ni hku gaw pyaw na ai zawn hkam sha ai. Raitim, loi hkring rai jang, myihprap gala ai hpa mye rap zim zam katsi katsang bai rai mat sai. Ngam ta ai gaw, Ga hkyeng bum hte Ginsum shaje ni sha rai ang sai. Lawan dik ai galai shai ai lam ni wa rai na sai kun?

Ya galai shai ai gaw ahkyak wa nrai, A Ji ni nga yak manghkang wa she ahkyak madung rai nga sai. Pyaw ai namchyim sha wa gaw chye mat, a lagawn ai gaw grai bai tsaw wa, moi na shagawng bum a n hprang sut rai ni gaw ma mat sai lu oi. Myihprap gumhpraw mung htum mat, yi bai hkyen sha na mung maling ni ga hkyeng bum rai mat, hkwi lu hkwi sha gyam lu gyam sha na mung, ashu ashan ni katsi katsang, asak matut na A Ji mung myit yak mat sai.

Dai majaw, A Ji shadu ai, Hpaji Hparat gaw shagawng bum ga e asak a matu tsi kaba rai na re ngu kam ai. Hpaji nga ai layang ga de yu na mung, gaumhpraw kata asak gawng kung ai aji dingla a myit yak lam mi she bai tai na rai. Lalyang ga na hpaji lu, sut hpring ai, Nang, ngai shu ngai sha wa myu tsaw shawang myit kaba hte shagawng bum ga bai tsit lali tsawm htap wa hkra hpaji hkum sumhpa hte bai gaw gap ra na lit lu nga na nit ai lu. Laili laika hpaji myit, masin kyang lailen hpaji, ren lu rem sha hkai lu hkai sha hpaji, shinggyim ripkawp tara hpaji, dut lu dut sha ga lu ga sha sut hpaji, hkamja lam hte seng ai tsi hpaji, ga sau namhpum hpaji, masha akyu jaw jak hpaji, ndai hte wa chye chyang kung kyang kuptsup wa yang, shagawng bum ga gaw Tokyo, Taiwan hte Nawyork ni a myitrum manang she tai wa na sai lu ngu myit dum let, layang ga na Wunpawng Hpaji Munu ni rai nga ai, ngai shu ngai sha ni hpang de ndai shagun laika hte kam kaba let garum hpyi lajin dat ai law.

Sagawng bum na, A Ji Dingla. Betlehem Shingran Magazine