HPYEN DAP HPE GAW DA AI LAM

Hpyen dap ngu ai gaw, Mungdan langai hte amyu langai ngang grin lu na matu ahkyak dik htum ai “Masha langai a ma-rung nra” hte bung nga ai. Mungkan mungdan shagu gaw tinang a mungdan awng dang shang lawt lu na matu hte ngang grin nga na matu n-gun kaba ai hpyen dap ni hpe hpaw da shajang ai hkrai rai ma ai. Hpyen dap ngu ai n nga yang gara mungdan mung apyaw sha ndut ndang grin nga lu na nrai.

Mungdan langai mi awmdawm shang lawt nna grin nga lu na matut dai mungdan hpyen dap gaw n- lawm n mai re. Dai ni na aten hta hpyen dap n lu ai mungdan ni gaw mai gan mungdan langai ngai e dip up tawn ai hpe hkrum sha ra nga ai. Dai majaw, shanglawt mungdan shagu gaw hpyen dap lu sha jang ma ai. Hpyen dap n lu ai shanglawt mungdan gaw ndai mung kan hta n nga ai.

Dai ni na aten hta mungdan langai mi a asak gaw dai mungdan a ngang kang nna kangka sadi dung ai hpyen dap rai nga ai. Dai re majaw, mungdan shagu gaw tinang a hpyen dap grau n-gun kaba nna ngang kang wa hkra ja gumhpraw law law hpe jai lang nna masha n-gun law law hpe akyu jashawn nhtawm hpaw shangang da shajang nga ma ai. Ndai zawn hpyen n-gun shagreng shajang ai lam npawt nhpang gaw;-

( 1 ) Tinang a mungdan prat mi hte prat mi grin nga lu na matu.
( 2 ) Tinang a mungdan kata de maigan mungdan masha ni tawt lai shang kabye je hpre wa zep ai lam         n galaw lu na matu.
( 3 ) Tinang a mugndan sut masa lam hte kaga maigan mungdan ni n ka-up lu na matu.
( 4 ) Tinang a mungdan amyu sha ni hpe kaga mai gan mungdan ni e roi nra n galaw lu na matu.
( 5 ) Tinang a mungdan kaga maigan mungdan ni a man e shing kang shing wang nga na matu re ai.

Mungdan langai mi hta dai mungdan hpe gaw sharawt sa wa na matu dai mungdan a mung masa lam-yan langai mi nga ra ai. Dai mung masa lam-yan hpe htep lahti makawp maga na matu ngang grin nna n-gun rawng ai hpyen dap langai mi nlu n mai re. N-gun rawng nna kang ka sadi sahka ai hpyen dap hpe makawp maga tawn ai mung masa lam-yan chyu sha mungdan hpe rawt kaba wa hkra woi awn gaw sharawt sa wa lu ai. Dusat dumyeng ni hta pyi tinang a asak hpe makawp magaw na matu nrung, kawng, lamyin ni tu shajang nga ma ai. Dai hte maren sha mungdan langai mi hte mung mungdan, amyu hpe makawp maga na matu hpyen dap n lu n mai rai nga ai.

Mungdan a maumwi labau hpe maram yu yang hpyen dap kaja n lu ai mungdan ni gaw hpyen dap kaja lu ai mungdan ni e shaning na na gamyet sha tawn ai hpe mu lu ai. Hpyen dap n chye hpaw shagreng ai amyu hte mungdan ni gaw mungkan n’tsa e mat wa ai hpe mu lu ai. N-gun rawng nna kang ka sadi sahka rawng ai hpyen dap kaja lu ai, Roma mungdan, England mungdan hte Fransit mungdan ai gaw hpyen n-gun madang n dep ai mungdan law law hpe gasat dang la nna up kamyet sha lai wa sai hpe mu lu ai.

N tara ai lam raitim greng ai hpyen dap n lu ai ni gaw hkam mana sha mat nga ra ai. Dai ni na aten hta raitim madang dep ai hpyen dap kaba lu ai mungdan ni gaw galu kaba nna shing kang shing wang rawng ai hte ngang gring nga ma ai hpe asan apra mu lu ai. Dai majaw mungdan shagu gaw hpyen dap amyu myu hpe nang grau ngai grau nga nna hpaw shaingjawng nga ma ai lam re, lachyum gaw, mungdan rawt kaba wa na matu kashun kashe shingjawng ai lam re. Ndai prat n dai ten hta n dai mungkan n’tsa e ndum ndam myit mu samsi myit yup nga ai mungdan hte amyu gaw ndum shami mat mat wa na re.

Tingba Naw Htoi, June 8, 1993