NGA MU NGA MAI MAYU YANG
Hpu nau Miwa amyu ni gaw amyu ru sai hta hkan nna laklai ai atsam hte shalat la ai nyan hpaji ni rawng nga ma ai majaw mungkan kaw nga pra sa wa ai hta laklai ai akyu ara ni hkam sha lu ma ai hpe mu lu nga ga ai. Jinghku jingyu shada aten kadun hkrum shaga hkat lu ai hpe manu tawn hkat let, nga mu nga mai wa lu na matu ja gumhpraw gara hku tam mai ai lam, kadai hpe kumhpaw kumhpa kade jaw yang amyat kade lu wa mai ai, lu su ai wa kaw na arang gara hku lu la nna matsan ai wa hpe gara hku shangun sha mai na, gara shara kaw hpa baw hkai sun galaw dat nna, gara shara kaw hpa baw rem dat yang gara hku sut su wa mai ai lam shada a ningmu ni garan gachyan galaw hkat let myit ung-ang ai lam nnga ai sha, kalang ta daw dan nna ta tut galaw chye ma ai. Shanhte a matu gaw makau mayang hkan na masawp dep ai matsan masha, lu su masha hpan shagun hpe shanhte a matu akyu jashawn la chye ma ai. Ngai ma kaji ten hta anhte a Kutkai Ginwang, Nawng Heng kahtawng kaw Miwa dinggai yan dingla gaw Miwa mungdan kaw nna hkum gaman sa wa nna hkai nu hte yang yi sun sa galaw ma ai. Dai yan la galaw ai sun gaw mare masha marai 10 jan galaw ai sun hta grau kaba nga ai. Hkai nu kung ai shaloi wa kasha hpung mi tup mari rem tawn nna sun mung matut galaw ma ai rai yang, hpang 2 ning kaw sut su nga mai wa masai. Shan galaw sa wa ai ladat hpe maram yu yang, shan a asak si wa na hta, matsan nna nmu sha na hpe mahtang grau tsang ai masa nga ai. Dai majaw shan a hkum hkrang hpe matsan dum nga na malai, asak naw hhrung nga ai ten hta hkru hkru kat kat sha nga lu hkra mahtang daw dan lam tam let shakut sa wa nga ma ai hpe mung adan aleng maram la lu nga ai. Prat chyanat sun galaw sha wa ai anhte kahtawng masha ni gaw dai yan la kaw sa hpyi sha ai hta n-ga, shan kaw kun jang mung sa jang sha wa saga ai. Dai hpang Thai kaw du nna bai maram yu yang, hkun hkraw ai hta n-ga, namhpun nrawng sai Miwa mungdan na Miwa ni gaw panglai hkingau hkan let Thai du hkra li hte sa wa nna yi sun hkau na sa galaw, hpaga yum ga galaw ma yang, dai ni na ten hta shanhte gaw Thai mungdan ting a sut masa lam hpe ga-up kau lu ai hte maren, mungdan uphkang lam hta mung shanhte ra sharawng ai hku nna shachyai nga lu masai. Dai hte maren, Arab mungdan ni hta lai nna mungkan ting na mungdan ni a sut masa lam hta hpu nau Miwa ni gaw tsaw ai madang hku nna tek jum sa wa lu nga ma ai. Dai zawn re ai hta hkan nna hpu nau Miwa ni gaw lani mi hta mungkan ting kaw n-gun kaba htum ai amyu ni byin wa lu na masa nga ai. Lani mi hta grai hku hkau ai hpu nau Miwa langai hte aten la nna jahta chyai nngai. “Ngai gaw lagawn ai hta n-ga, sut su ai wa hpe mu shagu, manawn ai hte shatan mayu ai myit kalang ta paw pru wa ai. Dai majaw ngai hte hkrum shagu shatan ai lam chyu na lu na re majaw naw chye na ya rit” ngu nna tsun nngai. Dai shaloi nye a ntsa e myit tau ya let:- “Lagawn ai lam, manawn ai lam hte shatan ai lam gaw, tinang a shawng lam grit nem wa na matu dingtawk dam ari jaw nga ai lachyum re. Jinghku jingyu ni hte hkrum shagu, nga mu nga mai wa na lam mahkrun jawm tam, jawm garum hkat ai ladat gaw yawng a matu mai kaja ai lam pru wa nna amyu ting rawt jat ai lam lu wa mai ai” nga nna sang lang dan ai. Hpu nau Miwa ni rawt jat nga sai mau mwi mau sa hpe sumru yu dat yang nlaw htum shaning 5000-6000 na wa sai hte maren, shanhte a mahkrum madup hte hkam la ai madang mung, grai tsaw ai kaw du nga sai hpe maram la mai nga ai. Dai zawn rai shanhte madun lai wa sai kasi hpe anhte naw hkalung nga ai ni a matu gaw na chying manu rawng ai kasi hku nna akyu jashawn la mai nga ai ngu, ngang hta hpa ra jat hku nna tang madun dat nngai.
|