SHINGTE SHARA

JJ Lum Dau, 26 July 2005

Masha langai hte langai lata ai SHINGTE shara nbung nga malu ai. Sharaw gap ai wa a shingte shara gaw sharaw rai nna, majan gasat ai wa a shingte shara gaw hpyen wa rai nga ai. Matsa gamak hkat ai ni a matu shingte shara gaw tinang nju ai wa rai nga ai. Raitim, prat dep nna sumtsan mu ai ni a majan shingte shara lata ai ladat hpe maram yu yang, shanhte a amyu hte mungdan kaw hten run machyi kaba nbyin wa hkra koi yen let, htap htuk dum ai mungdan ginra hpe mahtang shingte shara majan pa shatai la chye ma ai.

Ga shadawn, American ni gasat wa ai Nazi majan, Japan majan, Communist majan hte dai ni na ten hta matut gasat nga ai terrorist majan ni a ntsa e maram yu yang shingte shara hku nna maigan mungdan ni a ginra hpe chyu lata lang wa masai. Dai zawn rai majan kade gasat timung, shanhte a mungdan hpe hten run ai lam nbyin shangun ai hta n-ga, maigan majan pa kaw sum mat ai shanhte a ja grumhpraw hte hpyen la ni a asak malai, mahkrun amyu myu hku shanhte mungdan a matu aten galu hta asum kaw nna amyat pru wa hkra jahtuk la chye ma ai.

Raitimung, ngai zawn rai prat naw hkalung ai ni a matu gaw sumtsan de yu na matu atsam rai nnga ga ai rai nna, shingte shara tam shagu, ni nawn ai tinang a amyu hte tinang a ginra hpe chyu mu lu ai majaw shingte dat shagu mung, tinang a myu tsaw ni kaw chyu sum machyi ai lam pru wa ai. Dai zawn rai sum ai hta grau sum wa nna anan hta akan she rai wa magang sai. Dai ni rawt jat nga sai mungdan ni a shingdu labau hpe hkaja yu ai shaloi, shanhte mung grit nem ai madang kaw na rawt jat wa ai ni hkrai rai nga ma ai. Ga shadawn:- Hpu nau langai gaw, ningmu madang naw grit nem nga ai ginra kaw, “SHAWA A NSEN” ngu ai ga baw lang nna shi laika kaw, shing nrai internet kaw ka shabra dat ai rai yang, mu hti ai ni gaw dai lachyum hpe kam ya na ma ai. Raitim, dai laika hpe sha, ningmu dam lada sai ginra kaw ka shabra dat ai rai yang, mu hti ai wa kadai raitim, dai laika hpe marai langai a ningmu hku mu ya na mara ai.

Hpa majaw madang nbung ai ginra lahkawng kaw na masha ni a ningmu shai taw nga a ta… ngu ai hpe hkaja yu ai shaloi, ningmu dam lada sai ni gaw masha ni tsun shagu hpe kam ging ai rai kun… nga nna atsawm shen maram nna daw dan chye ma ai. Raitim, ngai zawn rai prat naw hkalung ai wa a matu gaw, Karai Kasang shaman da ya ai machye machyang hpe nlang ai sha, masha ni tsun ai hpe na shagu, ka tawn ai hpe mu hti shagu kam kau ya nga ai. Raitim, hpu nau nkau gaw prat she hkalung timung, Karai Kasang jaw da ya ai machye machyang hpe manu chye shadan ma ai majaw tsa dan ni e hkalem gunglau ai hpe atsawm sha dum chye ya let mani kau ya chye ma ai. Dai zawn re ai ni a shingte shara gaw, tinang amyu hte ginra hpe shading na malai, tsa dan ni a sinda de mahtang shingte chye ma ai.

Dai majaw Yawhan a shagun dat ai laika langai, 4:1 kaw matsun da nga ai hte maren, ngai gaw, masu ai myi htoi law law mungkan ga de sa wa ai ni kaw na myi htoi masu langai rai sai, ngu nna hkam la let ngai galaw shut wa ai hpe mara raw ya na matu tsaw htum ai Wa Karai Kasang kaw akyu hpyi dat nngai law. “Wa Karai Kasang e, ngai hpe aten dep shadum la ai majaw na chying chyeju dum nngai law. La ma ngai zawn rai lam dam nga ai Wunpawng sha ni naw nga ang yang mung, amyu hte mungdan a ntsa e tsaw ra shawang myit dam lada wa nna, Karai Kasang a mungdan maden zinghka wa hkra shakut sa wa lu na matu lam madun la rit law” ngu nna kam hpa ai kraw lawang myit masin ma hkra hte kyu hpyi dat nngai law.