Wunpawng Amyu Sha ni hte Kahkyin Gumdin Lam
Archbishop Paul Zinghtung Grawng WUNPAWNG SHA NI A NGA PRA LAM Anhte amyu sha ni gaw makyin jinghku, kahpu kanau, mayu dama hku nna hku hkau nga pra ai ni rai nga ai. Dinghku kaba langai a nta masha ni zawn, rau hpawng de, rau magam galaw chye nga ai. Ndai mat kaja ai htunghking ntsa e, ngang lu hta hpa ra, makam masham e bai shangang shagrin ya ai shaloi, myu sha ni a makyit mahkai lam grau makai hkak wa lu nga ai. Wunpawng sha ni myit hkrum kahkyin nga ai shaloi, kaga amyu hpu nau ni hpe n shinggan kau ai sha, shanhte hte mung hku hkau dingyang rai chye nga ai. Anhte a buga de du sa ai ni hpe "jinghku", nga nna, hkungga shagrau hkalum la chye ga ai. Dinghku kaba langai mi a nta masha ni hku nna nga pra ai re majaw, dum nta gap shara hte galaw lu galaw sha shara ni hpe ra ang ai hku gam karan, hparan lang nga ai. Lama wa, hpu nau langai ngai grau dam lada ai hku magam shachyen sa wa na rai yang, shawa a akyu hpe n hkra ai sha, grau sung, grau yak ai maga de, share shagan majen je, galaw sa wa chye ngaai. NAW MAI HKAN A NI ? Dai ni dai
na. Wunpawng sha ni kahpu kanau, makyin jinghku ni hku nna naw hku hkau
nga pra mai nga ai kun? Kaga hpu nau amyu sha ni hpe hkungga manu shadan
nna, jinghku naw hku lu nga ai kun? Anhte a mungdaw mungdan a sutgan rai
nga ai bum pa layang, hkashi hkanu, hpun kawa nam maling, tsi hkrung tsi
nan, dusat dumyeng, kagyin kayang, nhprang sut rai ni hpe jawm madu nna
galaw sha na naw mai nga ai kun? Prat masa a majaw, dai hku nga pra na
n mai byin sai, ngu ai ung ang myit ni nga yang nga na re ai. Hpa majaw
nga yang, shinggyim hpaji, shinggyim hku hkau lam, dinghta myit masa,
dinghta ladat ni hte galaw shakut tim, galung kahkyin lam hta n-gun n
lu ai mahkrum madup nga nga ai. Dai zawn re ai lam ni a marang e, Wunpawng
sha ni a mai kaja ai myit hkrum mang rum. kahkyin gurndin ai lai masa
hte, kaga hpu nau ni hpe hkalum shagrau ai nga sa lam gaw, dai ni tek
da n lu, tat kau ra sai, prat a masa hpe mahtang hkan ra sai, nga nna,
myit daw asum jaw kau mayu ai myit ni rawng wa na nhten. Raitim, ji woi ji wa ni a kasi nga nga mali ai. Shanhte gaw n byin byin hkra, sharai shatsawm, hparan lajang nna, simsa lam shagrin la chye nga ai hpe mu lu ai. Shada shut shai hkat ai lam nga yang, maga lahkawng, tinang a ningmu hte tinang a ra sharawng lam hpe shada tsun sang lang dan hkat ai hku n re ai sha, du salang ni kaw mahtang tang madun nna, shanhte dawdan ya ai hpe madat mara hkan sa chye nga ai. Du salang ni mung, maga lahkawng a tang madun ai hpe azin ayang madat la nna, maga lahkawng a matu chyu n rai, mare buga uhpung uhpawng ting a matu hte hpawn, bawngban sumru jahkrum nna, rap ra, mai kaja ai hku hparan ya na shakut ma ai. Dai zawn buga ginra, shawa dawtsa, htunghking masa yawng a mai kaja ai akyu ni hpe sawn sumru shalawm nna jahkrum bawngban, dawdan ai hpawng hta, na chye mayu ai ni, myit lawm sharawng ai ni, kadai rai tim sa dung madat lawm mai nga ai. N-gun jaw, madi shadaw la ai lam ni mung galaw mai nga ai. Dai majaw, dawdan masat ya ai hpe, sari sadang langai hku nna hkap la, hkan nang shajang lu ma ai. Dawdan ai hta, kadai gaw hpa baw, gara madang, gara hku galaw na ngu ai mung lang ta matsun shalawm ya nga ai. Dai hpe maga lahkawng de nna hkan shadik let, mi moi na raw, jinghku masa n hten n run mat ai sha, hku hkau dingyang bai rai lu nga ai.
Ndai hpe yu yang, teng man lam, tsawm htap lam, ngu ai shadawn shadang gaw nga nga chyalu rai nna, dai hte shabung shapre nna sha, masha ni tinang a lai kyang hpe shading sharai la ra ai, ngu ai masa hpe ji wa ni hkan sa ai hpe mu lu ai. Tingkyeng akyu hte matut manoi nga ai shawa a akyu mung nga nga ai hte maren, dai shawa akyu hpe hkungga manu shadan ai hte, myit hkrum kahkyin lam hpe shagrin shangang la ma ai hpe mung mu lu ai. Masha a myit masa hpe maram yu nna hkan lang ai ladat mung rai, makam masham e n-gun jaw matsun la ai nga sa lam mung rai, re ai hpe sawn shachyaw yu lu nga ai.
Ndai gaw Hpan Madu nan tawn da ya ai tara masa rai nga ai hte maren, maga shagu rawt jat bawng ring wa nga sai prat ndai hta, dai hpe hkan sa yang she, mungdaw mungdan hku nna rai rai, amyu langai hku nna rai rai, masha langai hku nna rai rai, ngang grin galu kaba wa lu nga ai. Ndai masa hkan yang, gyip gyeng ai tingkyeng myit hkoi mat wa na myit mada shara nga ai. Shaloi,shawa yawng a akyu hpe jawm gun hpai lu na, yawng. a man na manghkang ni hpe hparan la ai ladat ni hpejawm tam lu na, shinggyim masha hpe jahten shaza ai lam ni hpe hkap-manga lu na, rau ngwi pyaw rap ra ai hku shawng lam de n-gun lasang hte sit nawt hkawm sa lu na rai nga mali ai re. Wunpawng sha ni yawng ngwi pyaw ai hte myit hkrum kahkyin, hku hkau nga pra lu nna, hpu nau amyu mahkra hte mung simsa masin shabawn let, kung kyang dingyang, bawng ring dinggrin rai nga lumi galaw!
Source: Chyurum Shalat Magazine 2004-2005, JLH Mandale. |