Hkawp Hpu
Nau wa, GUMSAN MAGAM WA: Daini ndai shara hta(Fort Hood) bai kalang nanhte mungshawa ji n`ban yawng hte rau “Phantom Corps” hta magam gun nga ai Amyu Shayi Hpung ni hte hkrum zup lu ai majaw grau nna nanhte a hkap tau la ai hpe mung grai kabu chyeju dum nngai. Daini mungkan a jahten sharun maw mawn ai hpyen amyu myu hpe gasat sa wa ai lam hta nanhte Ford Hood mare na hpyen la ni hte kun dinghku shagu a shanglawm ai lam hpe shakawn nngai. Nanhte nkau mi Iraq majan kaw nna bai du wa ai mung nna shi ai. Yawng a galaw gunhpai shanglawm shakut ai hpe shakawn nngai – hkap tau la nga ga ai. Anhte n`kau mi gaw nanhte a hpang de shajin tawn nga let ahkyak ai hta hkan nna ap nawng na mung jin jin rai nga shaga ai. Nanhte gara hku mi hkawm sa hkawm wa nga tim, mungdan a makawp maga lam hte mungkan masha yawng a shim sa lam a matu laklai ai hku nna atsam dat nga ndai. Daini shanglawt ahkaw ahkang ngu ai hpe mungkan chyam hkra chye na rap ra hkra su hprang dat ya ai majaw mung, America mung a arawng shadang rawt jat wa ai majaw mung na chying wa kabu chyeju dum nngai. Grau nna gaw hpyen num hpyen la ni a kun dinghku ni hpe shakawn nngai. Tinang a kun dinghku kashu kasha ni hpe tawn da nna majan shang ai ngu ai gaw nloi la nga ai. Bai nna dai zawn re kun dinghku ni hpe madi shadaw n`gun jaw ai ni yawng hpe mung chyeju dum ai, nanhte yawng mung mungdan a matu daw jau nga ndai. American Mungchying sha ni yawng nanhte a ap nawng ai hte daw jau ai lam hpe chyeju dum nga ai – nanhte a C-in-C mung kabu arawng la nga ai. Lt. General Tom Metz hte madu jan Pam, Command Sergeant Major Joe Gainey hte shi a myitsu jan, hte magam gun kaji kaba yawng hpe mung chyeju dum ai. Washington mare de Air Force One hte bai sa du chyai na hpe mung myit mada ala nga ga ai. Bai daini ndai shara kaw anhte hte rau rai nga ai Major General Pete Chiarelli hte madu jan ni yawng hpe mung chyeju dum ai. Beth; Major General JD Thurman, hte madu jan, Dee; -Command Sergeant Major Tom McMurtrie, hte magam gun kaji kaba- Hka dap, Hkarang dap, magam gun usa ni hte Fort Hood na myitrum manaw manang ni yawng hpe mung chyeju dum ai. Daini Baghdad mare a Shanglawt lu ai 2 ning ladu hkrum ai masat masa nhtoi rai nga mali ai. Mile 350 zai bru jang hkrun lam hte, nhpu htat ai laru hpe lai di nna sa du ai lam gaw nloi la nga ai. Iraqi mare daju hpe nhtoi 21 hte du lu ai ngu ai gaw mungkan a hpyen labau hta laklai ai mau hpa atsam hku nna masat masa matsing tawn mai nga ai. Ndai zawn akajawng sha htim gasat lu ai lam gaw nloi ai. Hpyen ni gaw dumbri dumbra laika sharin jawng hkan, Tsi rung hkan hprawng makoi ayai mat ma ai. Mare masha ni hpe mahtang machyu pala ningang shatai tawn ma ai. Raitim anhte hpyen la ni gaw mungshawa hpe makawp maga let she ra ai lam hpe ahkyak la hparan nga ga ai. Karbala Gap hku nna htim gasat lung let Saddam N`bungli daru hpe April 9th hta zing madu la nna, Iraq ni a Ginjaw myo kaba hpe shalawt dat lu saga ai. Daini American shawa dawtsa hte Iraq mungchying sha ni gaw ndai nhtoi hpe htawm hpang prat du hkra labau hta malap nlu na sai. Mungkan a shanglawt labau hta Berlin bunghku kadawng agrawp mat ai zawn, daini Saddam Hussein a nlung tawk sumla mung rau agrawp kadawng mat sai lam labau gaw sakse madun nga sai. Shata matsat sha naw re ai shaloi Saddam wa anhte a tara rung hta tsap ra wa sai. Anhte majan baw na matu hkyen nga ai ten shi (Saddam) gaw hkaw tingnyang kaw dung nga ma ai, majan ngut nna bai nhtang wa ai ten hta gaw shi gaw htawng kata matsan mayan she rai taw nga sai. Shawng nnan Fallujah mare kaw nna jebat hpyen amyu myu hte laknak lang hpung ni hpe sa gasat ai shaloi, Pratdep myawk dap -1 kaw nna shawng woi gasat htim bang wa shaga ai. Dap-1 hpung ni gaw numbat -1 hku Fallujah mare hpe shang gasat ai - dai zawn re majan pa hta wan chyi sai wan mahkup htat ai hkoi mat ai hpang, dai shara ni hta mu lu ai lam ni gaw anhte hpe dai shara hta hpa majaw majan byin lai wa sai ngu ai hpe myit dum shangun lu na re: dai shara ni hta masha sat jeyang ai arung arai amyu myu hte, masha hpe gara hku zingri lai wa sai lam ni, laknak amyu myu makoi kyem tawn ai shara ni sakse mu lu na re. Phantom Corps hta shanglawm nga ai magam gun num/la kaji kaba yawng daini anhte hpa majaw Iraq kaw du taw ra ai lam chye chyalu rai na re. First Team hpyen hpung hpe woi awn nga ai Lt. Mike Erwin shi a myit hta mu mada hkam sha nga ai lam hpe ning nga tsun ai; “Middle East hta na n`gun kaba dik htum ai mungdan ni hpe daini anhte rau jawm shading sharai sa wa ai rai yang, ngam ai ni mung hkan nang hkan sa na sha re, bai nna American amyu sha ni 20 ning mungmasa hkring sa la nga tim, September, 11th 2001 na zawn gaw n`kyin ra na sai”. Mungdan jahten sharun ai jebat hpyen(terrorists) ni gaw Iraq mung hpe n`gun da hpran shara ginjaw shatai tawn ma ai. Nanhte a atsam dat ap nawng daw jau ai a marang e daini anhte awngpadang dip la lu shaga ai majaw anhte kanang nga dam tim dai zawn re nhpru nmai ai lam matut nna nhkrum kadup ra na re. Nanhte (U S Army) a majaw daini Iraq mungchying sha ni mung hkrit hpa si ari amyu myu n`tara ai lam ni kaw nna lawt wa lu manu ai. Nanhte a majaw daini Iraq gaw awmdawm shanglawt a ru pawt kasi kamang nsam madun nga sai. Daini Iraq hta awngpadang dip la lu ai lam gaw America hte anhte ni yawng a matu mung, htawm hpang ban prat a matu mung ndai zawn re hkrit tsang hpa lam kaw nna lawt lu ai lam mung rai sai. Nye a shanglawt mungga hta Iraq ni hpe ga sadi jaw mayu nngai, “Nanhte a hkrat sum mat sai mungmasa hte nanhte a mungdan kade nna yang bai lu madu na myit dai”. Ngai matut nna tsun mayu ai gaw, “nanhte hpe nga mu nga mai ngwi pyaw hkra mungshawa a gawngmalai tai ya ai shim sa ngwi pyaw ai hte woi awn na asuya ningnan gaw de lu na matu madi shadaw garum la na ga ai, ra ai lam ni hpe shajin ngut jang she anhte hpyen la ni madu a mungdan de bai n`htang wa na ga ai. Nanhte hpe jahkrai zawn n`tawn da na re. Shawng ningpawt kaw nna anhte a myit yaw shada ai lam mung Iraq myu sha ni a mungmasa madang rawt jat wa na hpe pandung tawn ai rai ga ai – madu awmdawm ahkaw ahkang lu ai mungdan, madu a gamaka hpe madu hparan lu ai mungdan byin tai wa hkra garum madi shadaw la ai lam rai ga ai. Dai hte maren lai wa sai 2ning hta Iraq amyu sha ni tinang a lagaw hta chye tsap, hkawm sa hkawm wa nga sai hpe mung mu mada lu sai. Daini Iraq amyu sha ni uhpung uhpawng a galu kaba nga mu nga mai ai lam hpe Saddam a tingyeng akyu hta hkan sa nga na malai, madu a awmdawm ningpawt ninghpang gaw sharawt nga ai lam hta amyu myu hku shakut shaja nga ai lam hpe mu lu sai. Mungmasa party amyu myu hpaw ninghtan sai, madu a ra sharawng ai lam hpe wanglu wanglang shiga amyu myu hku ka shabra lu sai, hpaji jawng law law hpaw wa sai re. Sut hpaga yumga lam mung wanglu wanglang hpaw ninghtan tawn sai, maigan mung ni hte pru pru shang shang wanglu wanglang kanawn majum hpang wa sai re. Fort Hood a hpyenla ni mung shanhte a gambum hte maren galaw shakut lai wa sai. Numbat -1 myawk dap kaw na ni gaw Baghdad mare hpe grau ngang kang ai hku jahtim dat manu ai(operation). Daini nanhte a garum ningtum dat ai a majaw Iraq amyu sha ni a ban prat ningnan ni gaw tinang a lagaw hta tinang chye tsap wa hpang sai. Masha wan sen a matu nga mu nga mai lam hpe chye galaw hpang wa sai. Daini shanhte a uhpung uhpawng gaw mungdan tara hte hkrak hkawm sa lu na ningpawt ninghpang gaw da tara lam ni hpe mung maigan mung rai nga ai Bahrain, Jordan, Czech Republic, Britain, Italy zawn re hkan sharin hkaja la let, mungdan kata shara shagu amyu sha ni a ahkaw ahkang makawp maga lam hpe hkrak ahkyak tawn madung dat wa sai. Ya kaw nna ningbaw ningla kadai hpe raitim Saddam Hussein zawn mung masha hpe lam woi shadam ai n`hkru nshawp ai wa hpe myiman n`tam ai sha jeyang dawdan na matu tara rung ni hpe mung hpaw tawn hpang wa sai. Kadai raitim tinang woi awn nga ai ten amyu sha ni a matu akyu nrawng ai hta sha n`ga mung shawa a ahkaw ahkang hpe gare jai lang ai wa hpe gingdan ai hte maren jeyang ari jaw ai hpe hkam la ra na. Daini ndai lamu ga (Iraq) kaw nna chyaloi nhkoi shingyim htung tara ningpawt ninghpang hpang wa ai lam hpe bai kalang dai htung tara ni hpe mu mada lu sai, ndai lam hpe Middle –East hta shanu nga ai mungdan amyu sha ni yawng a matu kasi la mai nga ai. Iraq amyu sha ni gaw madu uphkang ai asuya byin tai wa lu hkra ngang kang ai ningpawt ninghpang gaw tawn lu sai. Daini Iraq amyu sha ni madu uphkang asuya ra lata poi a matu galaw sa wa ai lam hta laklai ai hku mu lu sai, du daw sai hkaw ai lam hpe tsep kawp nmu lu sai lam hpe mungkan ting gaw jawm yu mau nga ma ai. Ndai zawn byin lu na matu gaw myit hpraw san ai myit hte tengman ai lam hta tsap gwi ai lam rai nga ai – sakse hku nna asak 29 ning sha naw re ai Abdul Amir ngu ai pyada wa Baghdad mare me bang ai rung hta shi yu n`chyen ai masha langai mi hpe gwi gwi sa magra ai hte jep dat yu ai shaloi kapaw ai baw arai rai nna shi mung kalang ta dai lam hpe chye ai hte maren dai masha wa hpe shinggan de ahpum dun garawt mat wa let mungshawa a matu asak ap nawng kau hkam manu ai. Daini shi gaw shanglawt lu sai Iraq myu sha a matu share shagan ninghkring hku shi a asak ap nawng kau gwi ai hpraw san ai myit masin hpe mungkan kaw nna shagrau sha-a masat masa hkam la nga sai. Daini Iraq amyu sha ni a magrau grang kang ka ai Abdul Amir zawn re masha a majaw Iraq amyu sha ni n`hkrit ntsang wanglu wanglang madu ra ai ningbaw ningla ni hpe me bang ra lata poi galaw nga lu sai-President, Deputy President(2). Dai ningbaw ni gaw amyu sha a ra sharawng ai lam hpe madung tawn hkan sa ai ni she rai ma ai. Ngai (Bush) Iraq President Talabani wa hte- Assembly Speaker al-Hassani yan hpe mung hkrum shaga ga sadi jaw dat lu ni ai. Shanhte a awngdang ai lam hpe mung kabu gara hkap tau shakawn nngai. Ngai shanhte hpe ga sadi jaw ai lam gaw Ya kaw nna Iraq amyu sha ni a rawt jat galu kaba wa na magam bungli galaw sa wa ai lam hta anhte US amyu sha ni yawng mung nanhte hte galoi mung rau rai nga ga ai lam ga sadi jaw dat ni ai. Ya mung shawng lam de grai naw shakut ra na lam nga ai. Dingbai dingna manawn masham lam amyu myu hte hkrum kadup ra na re. Dai hte maren Iraq amyu sha ni hta mung ninghkap dang manga kau lu ai myit marai rawng nga na hpe mung kam nngai. Iraq pyada hte hpyen la ni dai zawn mayit marai sadi dung kang ka ai lam hpe shanhte a ra lata poi ten hta tatut kasi ningli mu la sharin la manu ai.N`hkru n`kaja ai hpe dang kau ai akyu ara hkam sha chye masai. Daini Iraq amyu sha ni shanhte a hpyen la, pyada magam gun ni madu a hkum hpe kam ai myit hkam la lu sai. Daini Iraq amyu sha ni mungdan a gamaka tsawm htap wa lu hkra gwi gwi asak ap nawng ai lam hpe mu lu sai, lai wa sai shata 6 laman na majan hta sha pyi gaw mungdan a matu asak ap nawng kau ai hpyen la marai 800 daram rai ma ai. Fort Hood mare na hpyen la ni mung shanhte (Iraq) a tatut atsam dat ai hte tinang a nden marai hpe hkam sha chye wa sai lam hpe mu lu sai. Sergeant First Class Troy Hawkins wa shi a hkam sha ai lam hpe, “Iraq hpyen la ni galoi mung shingdu kayin na nre. Shanhte a hkum hta bomb chyen she agat bun hkra sai she lwi nga tim mung masha ni hte ma ni a makawp maga lam hpe mung rau galaw nga let gwi gwi htim gasat nga ma ai. Tinang a atsam marai hpe n`byin byin hkra shakut nga sai. Dai hte maren American ni mung ndai bungli awngdang hkra galoi mung nanhte hte rau rai nga na re. Daini Iraq asuya ningnan gaw tinang a mungdan grau ngwi pyaw shim sa wa lu hkra lit kaba nga sai hpe mung hkam sha chye sai, shim sa lam nhten hkra galoi mung jin jin rai nga ma ai. Iraq mungdan a makawp maga hpyen dap na ni mung tinang a hkum hpe grau kam sham wa lu sai hta n`ga tinang a lit hpe grau chye na wa sai. Mungdan a galu kaba lam grau rawt jat wa hkra America ni a garum gahtau shanglawm ai lam mung n`gun kaba jaw ya nga ai. Daini Iraq hpyen la ni marai 150,000 jan hpyen hpaji hte arung arai hkum hkra, shawng na lang mungkan ningtsa Iraq amyu sha ni mungdan makawp maga hpyen hpung, hpyen dap, pyada dap, magam gun hpyen num /la ni hpe yu ai shaloi Iraq kaw shang garum nga ai US hpyen la ni hta pyi jan hkra nga wa sai hpe mu lu ai. Daini Iraq myu sha ni mung kaga mungdan masha ni zawn wanglu wanglang tinang a mungdan makawp maga dap a npu e shim lam hpe hkam sha chye wa sai. Dai majaw ndai bungli ni shajin ngut ai hpang she anhte US hpyen la ni mung madu a mungdan de sari shadang hte bai du wa na hpe myit mada nga nngai. Daini anhte a shakut shaja ap nawng ai lam hpe Iraq myu sha ni chye na ai, nanhte hpe shakawn nga ma ai, nanhte a kun dinghku ni yawng hpe mung chyeju dum nga ma ai. Iraq hpyen du langai wa tsun ai; “ US hpyen la ni gaw tinang a asak hpe n`hkrit n`tsang madu jan nta masha ni hpe tawn kau da nna anhte a lawt lam a matu apnawng nga ai hpe chyeju dum ra ai”. Nanhte a galaw daw jau ai magam bungli gaw Iraq ni hpe shim sa lam lu jaw sai, kaga mungdan ni zawn tinang a shanglawt ahkaw ahkang hte mungdan a shim lam mung galaw la lu sai. Nanhte a magam bungli gaw tsaw dik htum ai rai sai, nanhte a kangka ai lam hpe mung chyeju dum nga nngai. Iraq hta democracy awngdang sai hte maren dai shiga ni gaw mungkan chyam hkra, Beirut kaw nna Tehran du hkra awmdawm shanglawt ngu ai gaw mungkan mungdan shagu a myit mada ai gamaka ninghtoi nan rai nga ai lam shiga shapoi dat ya sai. Ndai zawn Middle-East shingra ka ang hta Iraq mungdan na n`hkru n`kaja ai lam hpe shagrawt kau lu ai lam gaw mungkan ting a matu kasi la mai ai laklai ai mabyin masa maka kumla nan rai sai. Lai wa sai 2 ning shawng daw de galaw ai magam bungli chyawmra mi awng dang sai re, raitim matut nna galaw na grai naw ngam nga ai. Lawt lu sai lam gaw dingbai dingna amyu myu hkrum kadup na re. Anhte amyu sha ni hpe amyu myu jahten sharun mayu ai ni naw nga nga ai. Raitim anhte awngpadang dip la lu sai re. Anhte hpyen la ni kaw nna aja awa manat tawn ai majaw shanhte ni matut nna shamu shamawt na grai yak wa sai, matut nna mung hkyam sa jaw na nre. Shanhte gaw hkrat sum na sha re,hpa majaw nga yang n`jaw ai labau maga tsap nga ai. Daini Middle-East hta na awmdawm shanglawt lam gaw mungkan chyam hkra gara dat lu sai. Afghanistan mungdan mung lai wa sai ten hta nhpru nmai ru yak ai lam law law kaw nna daini shanglawt ngu ai hpe hkam sha lu manu ai. Palestine amyu sha ni mung lai wa sai ten na n`hkru n`kaja ai gumshen lailen hpe ninghkap ai lam jawm madi shadaw nga sai. Lebanon amyu sha ni mung daini awmdawm shanglawt a matu nsen sharawt hpang wa sai. Saudi Arabia hta gaw shawng na lang myu mare uphkang lam hpe ra lata me bang ai lam galaw hpang wa sai. Egypt mungdan hta gaw democracy hpe grau nna shangang shakang ai lam galaw hpang wa sai. Dai shara (Middle-East) a makau grupyin na mungdan ni yawng su hprang wa ai lam laklai ai hku mu lu sai. Nanhte gaw n`hkru n`kaja hkrit tsang hpa lam ni a majaw majan gasat sai, shanglawt ahkaw ahkang a majaw ap nawng daw jau manit dai. Dai majaw nanhte hkam la lu ai lam gaw nanhte a gumrawng shara mung rai nga manit dai. Daini na awngpadang dip la lu ai ninghtoi gaw ap nawng daw jau hkam ai ninghtoi mung rai nga mali ai. Anhte a hpyen la n`kau mi gaw hkala nba hte rau bai du wa ai ni mung lawm ai dai wan ma hkang ni gaw prat htum du hkra a matu mung masat masa hku lawm mat na sai. American ni mung tinang a lit ngu ai hpe machyi masha ni hpe atsawm gawn lajang ai hku nna mung n`yit nhprai hkra shadik shatup sa wa na re, n`kau gaw tinang a asak ap nawng kau hkra shakut shaja lai wa sai-nanhte a myitrum manaw manang ni, nanhte a myitrum share shagan ni, shanhte hpe galoi mung myit dum hkungga jaw nga ga ai. Kyu hpyi ai hta mung galoi mung n`malap ga ai. Shanhte a ap nawng ai lam hpe galoi mung hkam sha nga ai mungdan amyu sha ni kaw nna myit dum nga na re. Daini nang ngai zawn re kahpu kanau ni a ap nawng ai a marang e daini anhte mayam zawn nnga ra sai. Daini ngai ndai shara kaw sa du ai lam gaw nanhte a magrau grang nden marai hte ap nawng daw jau ai lam hpe tatut hkrum mayu chyeju dum mayu ai lam tsun mayu nngai. Daini nanhte a majaw mung America gaw grau dam lada ngwi pyaw wa sai. Grau nna mungkan ting mung ngwi pyaw shim sa ai lam hpe hkam sha lu sai. Daini anhte
a tsawm htap wa sai mungdan a matu nanhte a galaw daw jau ai lam shagu
hpe chyeju dum mayu nngai. Karai Kasang mung nanhte a kun dinghku hte
nanhte yawng hpe shaman ya nga u ga. Matut nna mung Karai Kasang gaw awmdawm
shanglawt hpe jahtum du hkra makawp maga ai lamu mungdan USA a ningtsa
e mung tut nawng ashaman ya nga u ga law. Sara Lawt
Awng |