DAW – VI DINGDA GINWANG GINJAW GAW SHARAWT GINRA SUMLA SHIGA NI.
1. HKRUN LAM WAW AI LAM
Shawng de Kachin Sub - state rai nga ai, ya KIO a Ding da Ginwang Ginjaw kata hta mi moi shanglawt majan garai n hpang ai prat kaw n na gumra lam, mawdaw lam ni nga ai raitim, mawdaw lam n kau mi gaw Mung Du ni tinang atsam hte sha waw da ai ni she re majaw ginhtawng aten ngu na hta aten kadun sha mawdaw naw lai lu ai hte Shanglawt majan pru wa n na tawn kau ra mat sai.
Lahta na mawdaw lam dingsa ni hpe simsa sai hte tinang hpyen hpung hte mung shawa ni moi na hta dawn jan n na mawdaw bai lai lu hkra gram shagreng ai lam ni, mahkrai shagreng ai lam, maga mi de moi n nga ai lam ningnan ni hpaw jat ai lam ni hpe ginhtawng shagu galaw sa wa ai re majaw n dai (10) ning laman hta ginhtawng aten hta e ganoi shara shagu ngu na mawdaw hte hkawm sa lu ai shara hkrai rai mat shajang n na grai akyu hkam sha nga sai.
Ta Mung Ne hte Manje lapran Nam Sa hka hpe pe-120 galu n na pe-40 tsaw ai Nlung wa kawng ma hkrai, Manje mare lawu lahta Mawun hka hpe Bilat Mahkrai 2, Mung ya pa na Ningmui hka hpe pe-135 galu n na pe-35 tsaw ai Bilat Mahkrai hpe MDA hte jawm galaw ai NamMaw pa hte lung wai lapran Nam Sa hka hpe K.D.A. Dung 5 hte pawng n na pe-120 galu pe-60 jan tsaw ai N Lung wa kawng mahkrai hte lung hpra hku lam ningnan waw ai lam 2002-ning hta galaw ngut sai.
2. HPAJI JAWNG NI A LAM.
Dingda Ginwang Ginjaw kata e Shanglawt majan byin nga tim, kahtawng ni nau n hprawng yen ra ai re majaw laika sharing jawng ni Munghpawm Asuya wa e hpaw da ai lam dingyang rai nga ai. Tinang Shanglawt Asuya hku hpaw da ai ni mung byak mat hkra ai nau n law ai.
Simsa sai hte chyawm gaw mi moi ayak ahkak re ai laman hta n lu hpaw ai shara hkan lu hpaw hkra shakut wa ai hta lawu tsang jawng 5 hpe hpaw jat dat da lu ai. Lahta tsang jawng hpe mi moi majan naw rai nga ai aten kaw n na hpaw nga dingyang re. Ya n dai sumtang ka nga ai aten hta shanglawt Hpaji Dap kaw n na yu gawn lit la ai lawu tsang jawng (11)tup rai sai.
3. MUNG SHAWA HKAMJA LAM
Manje kaw Mung shawa tsi rung hpe hpaw da lu sai, tsi jaw Gawk 9 hpe mung Nma Sung, Zup Awng, Hka San Yang, Hka Hpawk, Daknai, Awng Nan, Kawng Ra hte Loi Kang mare kaw hpaw da lu ai lam ni nga sai. 2002 ning hta Loi Kang mare kaw machyi masha yupku 16-tsi Rung n ta hte tsi Sara n ta ni hpe wut dek hte gaw gap da sai.
4. HKAU THING HKAUNA LAM
Ding da Ginwang Ginjaw Ginra hta hkauna galaw mai ai lam gaw Yawng mayawng ngu na hpe mi moi kaw n na ladat a myu myu hte galaw sha nga sai daram re majaw, sim sa ai htawm hpang e kaga ginwang ginjaw ni zawn hkauhting hkauna, hkai sun ngu n na grak lagra laklai waw jat ai lam nau n nga sai loi li tsun n mai daram sha she ginra lamu ga e ahkang jaw ai hte maren waw jat ai lam woi galaw lu ai hku re.
Rai tim, grau n na hkauna n nan waw jat lu hkra shakut ai hku n na Huhpyet, Hpaudaw mare kaw pe 1,500 galu ai hkahkawng hte hka madim galaw n na hkauna galaw maden jat lu hkra 2002-2003 ning hta lu galaw da sai.
5. SHAWA GAT HPAW AI LAM
Mung shawa ni a dut lu dut sha lam htap htuk rawt jat u ga matu simsa sai hte gat seng nta ni tsawm htap ngang kang ai hku woi awn gap sa wa ai. Moi garai n hpaw lu ai gat ni hpe hpaw ya ai.
Hpang jahtum 2000-2003 ning na ginhtawng ladaw hta Buga Gaw Sharawt masing kata e Nam Sung Wunzup Gat hpe gumhpraw lap Sen sanit shi mali hte shawa n gun lawm rai n na Zup Awng gat hpe gaw lap sen lahkawng tsa manga shi sanit hkrat hkra mai n na woi galaw tawn sai.
1999-ning hta Kutkai gin wang Dap dung 9 ginra Dak Nai mare kaw Bilat Nep, Hpri tsut galup ai gat dut nta yan 10 jan hte Manje mara kaw gat makau nta htap 2 shing grup galaw n na gat wang kata Bilat nep hpri galup gat dut yan nta galu 10 jan hpe ngang kang tsawm ai hku gaw gap da lu sai.
WUNPAWNG SHA NI HPANG DE LAJIN DAT AI
Tinang Buga ginra ni hta rawt jat galu kaba wa na matu Munghpawm Asya hte Shanglawt Asuya e garum jaw ya ai hte sha anhte a Buga Ninghtawn, anhte a amyu sha ting rawt jat galu kaba lawan na hpe n mu lu ai.
Mungdan gaw anhte a mung shawa (Wunpawng Amyu ni chyu sha n rai, Wunpawng Mungdan kata e nga ai Mungchying sha yawg hkra) hta lu su nga mai ai n’gun rawng shajang ra nga ai ngu mu lu ai.
Ndai zawn mung shawa kaji kaba hta lu su nga mai rawt jat na matu hpa baw hpe kaning re ai ladat ni shaw n’na galaw sa wa hpang ga ngu, nu wa myitsu ni kaw n’na ningmu, masing masa ni hpe KIO Buga Gaw Sharawt Magam Dap Ginjaw hte dantawk KIO Ginjaw Komiti de tang madun hpaji jaw la na hpe hpyi lajin dat ga ai law.
KIO
Buga Gaw Sharawt Magam Dap Ginjaw