DAW III. SINPRAW GINWANG GINJAW GAW SHARAWT GINRA SUMLA SHIGA NI.

1. Mai Ja Yang mare kaba kaw Sara Hpaji Sharin Jawng , Lahta Tsang Laika Hpaji Sharin Jawng (htap 2), G-l (Hpri) pipe hte lu hka len ya lu ai, Pan Kachin kaw nna hpaw da ai English, Computer Jawng, Hkai Sun Jawng,Jak Chywi Sharin Jawng, Manam Htingnip (htap 2), Hotel kaba, Tsi rung, Ma shalet Jawng hte hpaga gat lawk kaba ngu na hpe mung gaw de da lu ai lam nga sai.

2. Momawk makau , Dagaw Namsai ngu ai ginra kaw hkauna waw , mare de rai sa wa na masing hpe 96-97 ginhtawng ladaw kaw nna galaw hpang sai. Pe 12300 galu ai hkahkawng hpe htu na masing jahkrat nna galaw nga sai.Chyari hka mahkrai ni galaw yak, hkahkawng la hkrat wa re ai hta mung yak hkak ai lam law law nga mat nna ndai shaning du hkra mai byin ai made NYK Asuya pawng hpawm n'gun la nna shakut nga ai madang naw re. Ngangkang ai Hka la hka hkawng n lu gaw gap ai majaw myit mada da ai daram galaw awngdang lu ai lam n nga ai masing naw re.

3. Ndai Sinpraw Ginwang Ginjaw kata, grau nna Manmaw Ginwang hta ma shalet jawng 30 hpe Metta Development Foundation e garum ya ai hte hpaw da lu nna anhte a ma kaji ni aten dep grai kungzet jat wa lu ai akyu hpe hkam sha lu sai.

4. Hkrun lam mahkrai ni hpe maju jung galaw sa wa ai lam nga ai re majaw ahkyak ai kahtawng kaba ni, gaiwang ginra langai hte langai matut mahkai ai mawdaw lam kaja, Wakawng mahkrai law law hte yak hkak ai shara hkan gumra lai lam ni waw da sa wa lu sai rai nna (10) ning a wawra maga na Sinnparaw Ginwang Ginjaw n rai mat sai hpe mu lu shajang na saga ai. Mai Ja Yang hte Loi Je lapran Nam Sang hka hpe nlung hte lam gaw shatsaw nna ngangkang ai R.C mahkrai hte Dawng Ngaw hka hpe mung lam gaw shatsaw ai hte ngang greng ai mahkrai nga sai majaw lanam ta hta mung nsin nhtoi n lata ai sha hkawm sa lu nga sai. Shwigu Ginwang kata Nammak hka nlung mahkrai, Man Wing mare makau Namya hka hpe ngangkang ai Concret mahkrai hte kaga shara ni kaw ngangkang greng ai mahkrai ni gaw gap da lu ai majaw ginhtawng lanam n lata ai hkawm sa lu nga sai.

5. Hkai sun sara ram daw sharin shapraw lu sai hte maren, shara mi kaw hpawng chyawm nna gyin rai nlu galaw tim kahtawng ningchyawng law malaw hta dum hprang ai ni hte jin ngut ai ni gaw aten kadun, aten galu hkai ning mai ni hpe lu hkai shalat jat sa wa nga sai lam nga ai.

6. Laika hpaji sharin jawng hpawjat sa wa ai lam, majan aten hta mung kahtawng nkau mi hta nga chyalu rai madang kaw na, ya ning htum wa ten du hkra, Sinpraw Ginwang Ginjaw kata kaw chyu sha tinang KIO, a Hpaji Dap kaw nna tatut yu reng hpaw da lu ai gaw, lawu de na hte maren rai nga sai.Lahta Tsang Jawng 1, Lapran Tsang Jawng 3, Lawu Tsang Jawng 26 rai nna, tinang hpaji dap e lit garai nla ya ai mare sumbu jawng law law naw nga ai.

7. Mung Shawa a hkamja lam hku nna mung, Sinpraw Ginwang Ginjaw kata Nba pa e hpaw da ai Masat (3) Mung Shawa Tsi Rung kaba hte 2004 ning hta Mai Ja Yang mare kaw yup ku 50, htap 2, wutdek Tsi Rung hpe gaw gap la lu sai. Bai nna Buga Tsi Jaw Gawk hkrai 20 hpe hpaw da lu sai. Health Unlimited ni garum ya ai Tsi jaw gawk 3 lawm ai.

8. Mung Shawa a sut lu nga mai lam hpe lam hpaw hpang ya ai hku Gat ni hpe htap htuk akyu rawng na masing ni, tara ni jahkrat, gat nta hkrak re ai ni woi gap rai hpaw da lu sai.

[NEXT]