TAU MU HKA MAZUP

KNET. Buhkawm Brang.

Lai wa sai 2007 April shata laman Buhkawm brang gaw manaw manang ni hte N-mai Hka Hku maga de buhkawm mat wa ai. April shata praw rai tim ndai N-mai Hka hku ga gaw shani shana marang htu nga ai. Masha n-htat ai shara re majaw wawt, machyi mayan ni law la nga ai. Buhkawm brang gaw shani shana sa hkawm nga ai. Raitim Web-site hta la nga ai manaw manang ni a matu gade yak hkak ai shara rai tim ganawn du mat wa sai. Ndai lang na buhkawm brang woi san a shara gaw, anhte Jinghpaw bum ga N-mai hku maga de rai nga ai. Sadu chyai na shara grai law nga ai, rai tim ndai lang gaw Tau-Mu Hka Mazup de naw woi sa na rai.

Marit maroi N-mai Hka

Marit maroi N-mai Hka

An hte hpung ni 21.4.2007 shani Jaw Maw Mare kaw na rawt, Zang Yu Mare kaw wa zup hkring sa ai, Zang Yu mare gaw, moi Ninghtawn Rung hte Lapran Tsang Jawng nga ai mare kaba langai rai nga ai. Raitim ya gaw Jawng kaji sha nga sai. Ninghtawn Rung mung n-nga sai. Mare masha ni malawng maga mungdan kata majan byin nga ai ten hta bu htawt mat sai. Ya gaw kaga grau tsan ai mare Jaw Maw mare hkan na ni sha bai wa nga ai. Moi na nga ai gaw Hting gaw langai ram sha rai sai. Ndai mare hpe yu yang htinggaw 10 ram sha nga ma ai. Anhte du wa ai hte mare masha ni mung bum ga na hpraw san la ai myit jasat jasa hte hkap hkalum la ma ai. Jaw Maw kaw nna Zang yu mare gaw hkying hkum 4 daram hkawm ra ai hkrum lam hta marang hkrai katut nna Zang Yu mare du ai shaloi lagaw kaw wawt masat ram sai shaw ya taw nga sai. Anhte sai ni shangap ngut ai hte jahkring rai yang nta madu ding gai shan nga shan hpe ban kaw bang wa nna ndai shan nga shan re ju sha mu nga sa jaw ai. Kaw si ai hte hkrak sha rai mat sai. Hpang jahpawt nta madu ni grai mu ai bum ga na htung hking shat mai jaw sha nna anhte hpung ni gaw kan hkru ai hte yaw shada tawn sai ai shara de rawt na matu nta madu ni hpe shakram da sai.

Jaw Maw Mare

Jaw Maw Mare

Jaw maw mare na htunghking dum nta

U ni mung akyu hkam sha nga..

An hte buga de mung sha chyai rit le!

Pyaw dik ai Ley Ga

Pyaw dik ai Ley Ga

Kadai lit la na ta?

Zang Yu mare kaw na Tau Mu Hka mazup gaw hkying hkum 3 ram hkawm ra ai. Bum ga na hkrum lam gaw, yu yang mung yu hkrai yu, lung yang mung lung tit tit rai ra ai. Dai majaw ya hkying hkum 3 nga gaw yu ai malawng re. Ndai ga na hkrum lam gaw masha nau nlai ai, jau gawng ni sha lai ai hkrum lam re majaw lam de mung nam hkrai rai nga ai. Dai ni mung chyeju marang hte bai hkrum katut sai. Marang nhtu tim wawt grai sawng ai shara re wa! ya marang bai htu jat ai gaw kaga sang lang dan nra na sai. Sai hkaw masing bai rai sai! Hkying hkum lahkawng ram hkawm ai hte Jahpap Ga du sai. Ndai Jahpap Ga gaw ya yang mare dingsa hkang hkang nga ai sha mu lu mat sai. Ndai mare mung 20-30 ning ram shakram hkrum kau da ai mare rai nga ai. Ya yang n-lung n-hpan hta jan nna nta shadaw ni pyi n-nga mat sai. Malawng maga Mare kaba de hkawt nga masai nga chye lu ai. Wawt di let sum ru yu yang anhte N-mai hku buga de gaw shakram hkrum kau da ai mare law law rai mat sai. Ya ngam nga ai mare bu ga ni mung hting gaw 10-20 n-jan ai. Gara de mat ma ai kun?

Jahpap Ga kaw na hking hkum mi tup bum bai yu, dai shaloi tsan tsan kaw na nta kasha lahkawng mu lu ai. Nta kasha dai gaw Tau Mu Hka sin-na hkrang kaw na N-mai hka hta wa zup ai nawng kasha ntsa kaw nan gap da nga ai. Tau Mu Hka mazup kaw na ganoi mile mi ram tsan ai sinpraw maga gaw N-mai hka hte lwi shang ai hka mazup rai nga ai. Ndai shara makau grup yin hta du sat yam nga tsawm ra nga ai shara rai nga ai. Mare kahtawng hte tsan sai re majaw kalang lang hkawm nga ning len woi hpung, jahkyi, ya, wa du ni hte mung jahkring hkring hkrum katut nga ai.

Tau Mu Hka Mazup

Tau Mu Hka Mazup

Tau Mu Hka Mazup

Tau Mu Hka Mazup

Tau Mu Hka Mazup

Tau Mu Hka mazup makau hta gap tawn da ai nta de du wa ai shaloi dingla langai hte hkrum ai . Asak maram yu yang 80 ning ram gaw du sana re. Shi gaw Jahpap Lum Hkaw ngu ai wa rai nga ai. Ya yang Jahpap ga hta gadai n-ngai sai, shi mung Zang Yu mare kaw she wa htawt nga nna shata man 4-5 laman aten she ndai hka mazup hta yu wa nna moi kaji kawoi hkring htawng dagraw let Nga-ra nga hpe hkwi sha nga ai. Dai nga gaw sep n-kap nna langai mi joi mi hte joi lahkawng lapran kaba ai ( Jinghpaw Selmon Fish ngu tim nshut na re ). Dai shi gap da ai nta hta pinra htap hte htap galaw nna lu la ai Nga-ra nga hpe garap hta jahkraw da ma ai. Jahkraw ai gaw wan hkut hte re. Shani shana wan wut tawn nna jahkraw la ai rai ma ai. Dai shi jahkraw dai ai nga hpe kam ai hku sha mu nga majaw anhte mung n kaya ai sha htim bang wa sai. Nga n-ra mung nau nlawm, shan kaw mung sau sau nga, ngai chyu pyi nga hkum masum ram she nsha kau sai dawng.

Dingla wa hte jahta pyaw taw nga yang asak 7 ning ram re ai ma kasha gaw shi baw ram kaba ai nga langai hpai kagat pru wa ai. Aw.. dingla wa shi hkrai nga shadu ai wa dingla wa hpe na kashu i? ngu san dat yang, ding la wa mani sum let tsun dan ai gaw, “ Ma ndai gaw Jahpap Hra Hkaw re ngye kasha rai nga ai”. Myit kata hta mahtai pru sai ngu Nga-ra nga hpe law law sha ra sai...

Lu ai nga hpe wan wawn nna garap ntsa hta chyahkraw tawn

Lani mi Nga-ra nga ram ram lu ja ai Jahpap Hra Hkaw

N-mai hku hka gaw n-lung kaba hkrai rai nna hka rum grai law nga ai. Ginhtawng Yinam jak-li n-mai lai ai shara rai nga ai. N-mai hka sinpraw hkran hte sin-na hkran na makin jing hku ni ram sha lu hkrum hkat ma ai. Lamu ga ginra ni mung lung rawk kaba hkrai rai nga ai. bum nkau ni gaw bum ting nlung pa langai sha rai nga ai hpe mu mada ai. Mare buga masha ni hkauna galaw sha n-mai ai shara ni rai nna Yi sha galaw sha ra mat sai law.

Ndai hka hpe shaw la nna Jum shada na rai ma ai

Maru Jum Company kasha rai ma ai da!

Ndai zawn Jum shadu

K.I.O, N.D.A.K, mung shawa ngun hte gram galaw da ai Bashe Shat Law hkrai noi mahkrai

Mau hpa.. hpun ru kanoi mahkrai

KNET. Buhkawm Brang.