Tsawm dik ai chyinghkrang yi

January hte February shata laman hta Mai Ja Yang Pa, Ja Reng Yang na hkauna pa ni hta ahtoi nsam hte tsawm dik ai chyinghkrang pu pu ten rai nga ai. Ndai chying hkrang yi ni gaw hkauna hte kahti galai hkai ai rai ma ai.

Ja Reng Yang na chyinghkrang yi galaw ai hpawmi dinggai langai tsun dan ai “ndai chyinghkrang gaw chyinghkrang sau re, mam dan ngut ai hpang Octorber shata hta hkai hpang ai re” ngu tsun dan ai. Yu mada dat yang dam lada dik ai shara hta ahtoi rai mu dat ai shaloi myit hta ram ram pyaw dik mat sai.

Ndai hkauna hte chyinghkrang sau gaw ndai kahtawng buga na mare masha ni a shang gumhpraw madung rai nga ai hpe chye lu ai “ya March shata kaw gaw chyinghkrang dan ai ten rai sai, de hpang gaw hkauna bai hkai na re” ngu hpawmi dinggai tsun dan ai.

Na lu ai hte maren ndai kahtawng mare na mare masha ni gaw ram ram nga mu nga mai ai hku na mu mada ai, Miwa Gumsan Mungdan lamu gajarit hte ni gahtep ai hte maren, galaw lu ai nsi nai si ni hpe Miwa mung de lu dut bang nga ai.

Adup ngut ai chinghkrang tum ni gaw gin mi Yuan 4.5 ram lu ma ai, anhte hkran de mihprap wan jahpu grau hpu ai majaw Miwa hkran, Jehkai hte Humun de sha chyinghkrang sau jakrung nga ai, dai jakrung lahkawng gaw galoi mung chyinghkrang tum hkap mari ai jak rung rai nga ai hpe chye lu ai.

Ndai kahtawng mayan hta htinggaw 30 ram chyinghkrang hte hkauna kahti galai galaw sha nga ai hpe chye lu ai, hpawmi dinggai tsun ai “anhte gaw shaning shagu ndai hku sha galaw sha nga ai, hkauna kaw sum yang chyinghkrang kaw na bai lu ai”

Ndai chyinghkrang hkai sha ai lam hta, latung a majaw tsi shaning hte shaning bai jat gat ra wa ai, dai gaw lamu ga shingra tara hpe jahten sharun shangun ai rai wa na kun ? buga mare masha ni yawng mung hpaji sa jaw garum na hpe la nga ai.

Photos by KNET