GINRU GINSA LABAU NMAI SHAMAT AI Rev. Hpanang Lamung Htin Nung Lung Mi ngau ai amyu ni gaw, Putao maga de Ma Jang, Ding Ra Ga kaw na sinpraw maga Sang Lup Hkyet, U Ring Bum du hkra, ding da maga de a bup jahtung Htaw Gaw, Htaw Lang kaw na N-gaw Bum du hkra hta nga ai amyu re. Jinghpaw hte Rawang ni a lapran e nga ai amyu mung re ai, dai majaw Jinghpaw ga hte Rawang ga hpe chye tsun chye shaga ai ni mung re ai, Jinghpaw ni hte mung, Rawang ni hte mung, moi prat kaw nna mayu, dama matut mahkai re ai lam ni nga ai. “ Jinghpaw hte rau ni ai ni gaw masha mying hpe Gam, Naw, La nga nna gayau shamying ai lam” nga ai. Nung Lung mi ngu ai mying hpe kanang na lu ai lam gaw, labau gawn ai ni chye chyalu re. Pawng Yawng wa hte Madai Ja Hkawng a kasha La mahtang Nung La amyu ni a kaji re. Bai kau mi Nung Tu, Nung ni a kaji gaw Tu mahtang re ai lam tsun ma ai. La raitim,Tu raitim lahkawng yan jaw ai hku re. Hpa majaw nga yang, moi prat hta laika nnga ai majaw baw nu hta sha matsing ai lam re ai majaw re nga ai. Moi prat na salang ni kau mi gaw Kara hpe galu tawn nna, baw pungding hta manai majaw da ma ai. Dai hpe “Nung jaw” ngu shamying ai, bai nna di shadun ai hkra hpe mung, “Nung Hkra” nga shamying ma ai. Dai gaw Nung amyu ni dup shapraw ai rai re majaw Nung Hkra ngu shamying ai lam rai nga ai. Nung Lung Mi ngu ai mying hpe tsun shaga lang ai lam hta Sam ga hte gaw Hkun Nung nga ma ai. Jinghpaw ga hte Nung ngu shaga lang ma ai. Rawang ni a ga hte gaw Damang ni ngu shaga lang ma ai, Tingnan madu tsun shamying shaga ai lam hta Lung Mi ngu ai ga hpe lang nga ai. Nung Lung
Mi myu a kata hta mare kahtawng ni ai, tsan ai hta hkan nna ga kaji kajaw
n bung hkat ai lam ni nga ai. Raitim tsun shaga ai shaloi gaw yawng langai
hte langai shaga yang yawng chye madat hkat ai hkrai rai nga ai. Dai lam hpe yu yang dai lam teng nga ai, hpa majaw teng ai ngu yang dai ni Miwa mung Yunan mung daw hta Nung ngu ai amyu ni nga ai lam hpe chye lu ai, Yunan de du yu ai ni hpe san yu yang, Yunan de nga ai Nung ni shaga ai hte Nung Lung Mi ni shaga ai ga ram ram bung ai ngu tsun ma ai. Raitim ni dik, bung dik re ai gaw Nung ngu ai mying rai nga ai. (Nung Lung Mi amyu ni gaw kaga amyu hte maren mara kahtawng up hkang ai lam hta, Du magam mare agyi salang ni up hkang nga lai wa sai). Nawku makam masham hte seng nna nat jaw ai htung hta lai nna, kaga hpara hpe naw ai lam n nga. Ya dai ni na ten hta gaw yawng Hkritstan tai nna nat jaw ai n nga ai daram rai sai. Hkalup Hpung de shang ai, Roman Catholic de shang ai, Hkristu de shang ai, A.G de shang ai, Rawang Hpung shang mat ai hta ayai aya re ai lam hpe mu lu ai, amyu lakung mahkra nawku lam langai sha tai na gaw tinang amyu a ginru ginsa lam labau hte amyu hte seng ai lam re ai majaw, amyu lakung langai mi gaw tinang a amyu lakung hte shang lawm ra nga ai. Englisha ni up ai ten na mying jahpang hpe yu yang Nung ngu ai mying jahpang hpe kaga hte kayau ai lam n nga ai. Lakung langai mi re ai hku madun da nga ai. Dai gaw hpa majaw rai ta? Nga yang, tinang amyu a ginru ginsa labau a majaw byin wa ai lam rai nga ai. (Nung Lung Mi ngu ai mying hpe shamat kau mayu ai wa kadai rai ta?) Mung kan hta masha n kau mi gaw amyu a ga hte amyu lakung hpe shamat kau mayu ai ni nga ma ai, n kau mi gaw ra lata Me lu na matu amyu a mying hpe dat kau ai ni nga ai. Kau mi dung lahkum lu na matu hte arawng aya lu na matu amyu a mying hpe nyet kau ai, kaga lam amyu myu a majaw , kajam galam rai galaw sha ai ni nga ma ai. (Dai ni masha langai lahkawng a n-gup ga hte sha Nung Lung Mi, Rawang ngu ai gaw langai sha re, pawng ai re ngu nna masu tsun ai ni nga ma ai) Pawng ai rai jang gaw, Nung Lung Mi Rawang ngu ang ai. Ya gaw pawng ai lam n re, shamat kau ai lachyum rai nga ai, Lung Mi ngu ai ga hpe sha lang jang Rawang rai dum ai wa gaw n hkap la lu na re. Dai majaw (Wunpawng ngu ai hta lakung 6 sha n re ai lakung 7 she re ai) Hpa majaw nga yang Nung Lung Mi ngu ai mying gaw dai ni dai na sha daidaw shamying la ai mying n re, moi shingra prat kaw nna nga chyalu rai sai mying re, ndai lam teng gaw labau nan sakse rai nga ai. Dai ni Wunpawng ngu ai hta lawm ai ni yawng gaw kaji langai hpra, labau langai hpra lu ai ni hkrai rai nga ai. Moi prat Ji Nat ginra nga sai mying hpe ya dai ni hpa majaw shamat kau na rai ta? Moi shaning law law prat law law kadai mung kadai tinang a amyu mying hte nga lai wa sai, dai ten e shada a lapran hta mying hte seng nna hpa baw manghkang mung n nga ai, Nung Lung Mi ngu ai mying a majaw Nung Lung Mi wa hta machyi ai lam, yawm ai lam hpa mung n nga ai. Kaga kadai wa hpe raitim, hpa dingbai dingna jaw ai lam n nga ai. Dai ni Nung Lung Mi wa rai dum nna, Nung Lung Mi ngu ai mying hpe n ra ai ningdang kau mayu ai wa lama nga yang dai wa gaw tinang nan tinang hkum hpe masu nyet kau ai hte amyu ting hpe nyet kau ai wa tai na re. Dai majaw Nung Lung Mi ngu ai mying gaw kumpyuta hta bang nna lama wa mat tim, Nung Lung Mi ngu ai mying gaw n mat mat ai, hpa majaw ta? Kumpyuta (Computer) ngu ai arai gaw, masha a lata hte galaw shachyaw ai rai re ya she ningnan nga ai re nga ai. Nung Lung Mi ngu ai mying gaw masha lata hte galaw la ai mying n re. Chye Ningchyang wa mu ya ai, chye ya ai mying re ai. Dai majaw Nung Lung Mi ngu ai amyu ni gaw Pawng Yawng wa hte Madai Ja Hkawng yan a kasha La kaw na prat mayat wa ai amyu ni rai nga ai. Dai ni Nung La kaw na prat pru wa ai Nung amyu ni gaw Jinghpaw mung, Myeng mung , Yunan mung ga du hkra chyam bra nga ai. Moi kaw nna ya dai ni du hkra labau ginru ginsa lam gaw ding yang gring nga ai. Labau ginru ginsa nga ai hte maren Nung amyu ni mung Wunpawng ngu ai hta lakung langai mi rai nga ai lam hpe gaw gadai wa mung n lu ning dang kau na re. (Amyu kaba ni gaw amyu kaji ni hpe mayu ai, nga kaba ni gaw nga kaji ni hpe mayu ai, ga mayu yang amyu n mat ai, masha mayu yang amyu mat ai) nga ai hte maren, dai ni amyu kaba ni gaw amyu kaji ni hpe mayu kau na matu galoi mung hpaji daw nga ma ai. Anhte amyu kaji rai nga ai amyu lakung ni gaw shada mayu hkat na malai, shada da madi shadaw makawp maga hkat nga ga law.
|