K.I.O TINGNYANG UP, K.I.C NINGBAW KABA, K.I.A DAP UP DAJU, SHA RE MUNU DU DAJU JUM LAMUNG TU JAI A LABAU KADUN
1. Shangai chyinghkai wa ai lam
Lahta Sam Mung, Kutkai Ginwang, Mung Ji Buga, Kawng Lung Mare kaw na Slg. Lamung Tu hte Jan Labya Htu yan a kasha la N tu re. 1930 ning, March (5) ya shani Kawng Lung Mare kaw shangai nna Asak (18) ning, du hkra Kawng Lung Mare kaw nga kaba wa sai.
2. Chyu Rum Kahpu Kanau ni
1. Lamung Gam Htun ( kaji ten hta n nga mat )
2. Slg. Lamung Naw Grawng ( n nga mat )
3. Sara Usa Lamung La Tawng
4. Lamung Tang ( kaji ten hta n nga mat )
3. Jawng Lung Wa Ai Lam
Bungli galaw
chye wa ai kaw nna, Yi sun hkauna makan galaw gun hpai nga nna Asak (16)
ning hta she Jawng lung laika hpaji sharin hpang wa ai.
1945-47 ning laman Kawng Lung Mare Asuya lawu tsang jawng hta lung ai.
1948-50 ning laman mungbaw man chyam kawng Asuya lapran tsang jawng hta
lung ai. 1951-52 laman hta Kutkai Asuya lahta tsang jawng lung ai. Jawng
ma prat hta pawng yawng ram rawt hpung hta shang lawm shamu shamawt lai
wa sai.
4. Munghpawm Myen Mung Asuya Hpyen Dap Hta Magam Gun Ai Lam
1952 ning
hta Munghpawm Myen Mung Asuya Hpyen Dap, Jinghpaw Dap (4) (4th Kachin
Rifle) kaw Hpyen Magam shang gun hpai lai wa sai. May Myo, Mandalay hte
Kalaw kaw hpaw da ai Hpyen Jawng ni kaw Laika hpaji hte Hpyen Hpaji ni
hpe matut sharin hkaja la nna, Dap kata Hpaji Jawng sara (Unit Education
Instrector) Makan lit hpe gun hpai lai wa sai. Maga mi de shawng lam majan
man de mung sa ai.
Mandalay kaw galaw ai Hpaji madang jep Sanpoi sa htai awng la nna Yangon
Shin Line kaw galaw ai Hpyen Du Sanpoi (O.T.T) sa htai da ai. Mahtai hpe
la nga ai ten hta Jinghpaw Dap hte Myen Dap galai gachyai gayau bang mat
wa nna, Sat lawat nhtap htuk mat wa ai majaw 1960 ning January shata hta
Myen Dap kaw nna shawk pru mat wa sai.
5. Wunpawng Mungdan Shanglawt Rawt Malan Magam Gun Hpai Sa Wa
Ai Lam
1960-61 ning hta Senwi ( Sinli ) Asuya lahta tsang jaw kaw tsang (10) matut sharin hkaja let Senwi Ginwang Ginra hta K.I.O shamu shamawt makan lit hpe gun hpai lai wa sai.
1961 ning, March shata hta Lashio Mare Asuya Lahta Tsang Jawng kaw tsang (10) Sanpoi hpe htai kau da ngut ai shani 7-3-61 ya shana Ningbaw Kaba Usa GOC Lahtaw Zau Seng hte rau K.I.O Rawt Malan Magam Dap de du sa wa ai. 1961 ning, March (8) ya shani K.I.A Dap Dabang (Camp) Falen kaw shawng ningnan hpaw hpang ai ten hta lit la woi awn sa wa sai. Maga mi de hpyen shaman shakyang shara ( Training Instructor ) Makan lit hpe mung gun hpai lai wa sai. Matut nna K.I.A Dap hpe hpaw masat wa ai shaloi Mobile Brigade (RSM) Makan lit hpe mung kapyawn jum ai. 17-6-61 ya kaw nna Training Officer hte Camp Comdent hpe mung gun hpai lai wa sai.
1961 ning October (10) ya hta 1st, Bn. de htawt sit nna 1-3-1962 ning hta 1st,Bn. 2 i/c Makan lit hpe gun hpai lai wa sai. 20-1-63 ning hta Mali Sinna hkran Wan Leng lam mayan de majen je gahkyin gumdin makan lit hte rawt sa wa sai. 2-3-1963 ya jahpawt Moh Nyin Myo sa zing ai kaw Hpyen Sinat Lau 50 jan, Short Gun Lau 70 jan, Htunghpau Lau 70 jan, Pala hpan hkum 2000 jan, Myen gumhpraw Lap - 60000/- jan hte Tsi mawan hkum sumhpa padang dip zing la lu ai hpe arang shatai nna, 1963-65 laman Dap Dung (5) hte Mung Nyang Ginwang hpe hpaw masat da lu sai. 5th, Bn.Co hte Mung Nyang Ginwang D.O Makan lit hpe gum hpawn gun hpai lai wa sai.
12-10-1965 ning hta 2nd, Bn. de yu wa nna, dai ten hta 5th,Bn. C.O, 2nd, Bn. C.O, Mung Nyang D.O hte Kutkai D.O Makan lit (4) hpe gum hpawn gun hpai lai wa sai. 27-9-1969 kaw nna Dingda Ginwang Ginjaw Div-O Makan lit hpe gun hpai lai wa sai. 1-11-1972 kaw nna 1st,Bde. de htawt sit nna 1st, Bde. Commander makan lit hpe gun hpai lai wa sai. 16-7-73 ning hta GHQ de htawt nna G-II Makan lit hpe gun hpai sai.
19-1-76 ning kaw nna 1978 ning du hkra Dap Awn Daju (C.S) Makan lit hpe gun hpai lai wa sai. 19-1-76 ning kaw nna 2001 February shata du hkra K.I.C Ningbaw Malai Makan lit hpe shaning 25 ning, gun hpai lai wa sai. 1981 ning kaw nna 2001 ning du hkra Mungchying Uphkang Dap Lit Hkam, Hkamja Dap Lit Hkam, Hpaji Dap Lit Hkam Makan lit ni hpe mung shaning (20) ning gun hpai lai wa sai.
1980 ning kaw nna 1989 ning du hkra shaning (9) ning Sut Gan Dap Lit Hkam hte Controller Makan Lit hpe mung gun hpai lai wa sai. 20-2-2001 ning kaw nna K.I.O Tingnyang Up K.I.C Ningbaw Kaba, K.I.A Dap Awn Daju Makan Lit hpe mung gum hpawn gun hpai lai wa sai. 10-7-2002 ning hta Dap Awn Daju Makan lit kaw nna dawm n’htawm K.I.A Dap Up Daju ( Commander In Chief ) Makan lit hpe matut gun hpai sa wa sai. 25-7-2002 hta Lat Du Daju Jum ( Lt. General ) tsang de sharawt dat hkrum sai.
21-2-2005 ya shani kaw nna Du Daju Jum (General) tsang de sharawt dat ai hkrum sai.
SHARE MUNU
Tinang K.I.O ntsa sadi dung let chyoi chye ai machye machyang, rawng ai
n-gun atsam mahkra hte ten tup rawt malan magam bungli hta shaning 45
ning hpring shakut shaja magam gun hpai nga lu ai atsam marai hpe shagrau
sha-a ai masat masa hku nna (45) hpring (46) lang na Rawt Malan nhtoi
5-2-2006 hta, Wunpawng Mungdan Shanglawt Asuya kaw nna shagrau jaw ai,
Wunpawng Mungdan Shanglawt Hpyen Dap a tsaw dik ai share mu nu Ja dazik
shagrau sha-a ai hpe mung hkam la nu ai.
6. Simsa Lam Bawng Ginrat sa wa ai lam.
1963 ning hta Munghpawm Myen Asuya hte gap hkat shazim lam lu la na matu
myit mang lawm lai wa sai.
1972 ning hta kalang Munghpawm Myen Asuya hte gap hkat shazim lam lu la na matu shamu shamawt lawm lai wa sai. 1980-81 hta kalang Munghpawm Myen Asuya hte Simsa lam bawng ban ai hta shang lawm woi awn shakut lai wa sai.
1992, September (1) ya kaw nna Mungdan ting de n’dau shana ai hte maren gap hkat jahkring let simsa lam bawng ginrat ai hta Datkasa Ningbaw hku woi awn let 24-2-1994 ya shani N.W.T hte K.I.O gap hkat jahkring ( Cease Fire ) myit hkrum ga sadi laika lakmat jawm htu lu hkra shakut shaja lai wa sai.
7. dinghku de ai lam
1966 ning September (16) ya shani Saranum Lamai Hkawn Mai hte hkungran dinghku de sai. Kasha ni marai (7) hte Kashu ni marai (12) hpe shangai shaprat da ma sai.
N shang hkrat kasha ni
1. Hkawn Nan
2. Brang Ja
3. Bawk Mai
4. Mali Sin Wa
5. Roi Nu
6. Mungdang La Seng
7. Htu Hkaw
Kasha masat la ai ni
1. Ji Tawng
2. Di La
3. Seng Seng
4. Hkawn Ja
5. Tang Mai
6. Naw Mai
Kashu ni
1. Ja Seng Ing
2. Ja Seng Awng
3. Gum Ring Seng Dan
4. Hpung Jai Li
5. Seng Ra
6. Jaw Seng
7. Jat Len Awng
8. Lu Pan Hkawng
9. Htoi San Shawng
10. Dan Myu Awng
11. Htoi Li Seng San
12. Nang Seng Hkawng
8.
Kasi la mai ai lam ni
1. K.I.O Shanglawt Rawt Malan hpe ningnan woi awn hpaw hpang ai shani
kaw nna, daini nsoi nsa hkyet wa ai shani du hkra tinang Amyu sha lawt
lam a matu aten tup ap nawng nna ang wa ai Magam Bungli Makan lit ni hpe
kang ka htep lahti shakut shaja gun hpai ai.
2. Wunpawng Mungdan Shanglawt Hpyen la Rit Kawp Tara ni hpe tut nawng hkan sa shatup ai.
3. Tinggyeng akyu ara lam hta nchyun shanang ai lam n nga ai.
4. Matsan jahkrai, yak hkak ai ni hpe tsawra matsan dum let lakawn lanawn chye ai lam nga ai.
5. Myit kri dung, Myit ngang kang ai.
6. Matsan jahkrai, kaji kaba n ginghka kadai hpe rai tim tsawra hku hkau ganawn mazum chye ai lam nga ai.
7. Atsam marai rawng ai hte nsim nsa shakut shaja ai, lak lai ai, atsam ningja a majaw, 2006 ning February (5) ya hta ang ai (45) ning hpring (46) lang na Rawt Malan masat ninghtoi hta Wunpawng Mungdan Shanglawt Asuya kaw nna shagrau jaw ai Wunpawng Mungdan Shanglawt Hpyen Dap a tsaw dik ai share mu nu ja dazik shagrau hkrum ai kaw du hkra magrau grang, shakut shaja lai wa sai re.
8. Dai re ai majaw, Wunpawng Mungdan Shanglawt Asuya Ningbaw Kaba Magam Lit hpe gun hpai lai wa sai, Du Daju Jum Lamung Tu Jai a tsawm htap ai kasi kamang kaja lam law law hpe dinglik yu nna anhte ngam nga ai myit rum manang yawng, anhte a rawt malan lam yan hta matut nna dating shakut sa wa na mai kaja nga ai law.
9. Machyi makaw hkrum wa ai lam
2006 ning January shata 11 kawn 13 laman Yangon kaw tsi jep yu ai shaloi
lahkra maga Sin chyen mi Cancer byin nga sai lam chye lu ai. Aten la nna
tsi tsi na matu Salang ni myit ai. Raitim bungli ni nhkring nsa nrau nhtau
byin mat ai.
14 lang na Ginjaw Komiti Hkumra Zuphpawng ngut ai hpang Myitkyina, Manmaw ni de Zuphpawng ni matut manoi sa galaw ai. 4-5-06 ya hta Myitkyina WMR Rung hta hpawng ai WMR, EC Zuphpawng ngut ai kaw nna jahkru hpang sai.
6-5-2006 ya shani Myitkyina kaw nna Laiza dum nta du wa ai hte grau hkum n’pyaw machyi gazut mat sai. 19-5-06 ya shani Miwa Gumsan Mungdan Mang Shi Tsi Rung kaba de tsi jep tsi tsi lajang na matu Laiza dum nta kaw nna rawt sa wa sai.
20-5-06 ya kaw nna 15-6-06 ya jahpawt du hkra Mang Shi Tsi Rung kaba kaw tsi tsi lajang nga yang Asak hkye la lu na lam n nga wa ai majaw tinang Kanu Mungdan, Laiza dum nta de woi wa nga yang Miwa Gumsan Mungdan kata Leng Haw hte Yin Jang jarit Ta Haw Hka makau kaw 10:00 Am tup hta jum nga ninglen tat, ma-um nga ninglen prat, nsoi yum, nsa htum, Karai hta manoi Sumsing Mungdan wundoi mat wa nu ai rai.
Ndai zawn n-gun atsam hpring aten tup woi awn Agaw Ningbaw sa wa sai Ningbaw Kaba a tsun shaga mani sumsai mawn nsam ni hpe myit dum shingran mu nga let nja nhpra hkungga lara masat masa galaw dat ga ai law.
Ka
lajang ai,
1. Slg. Kaba Lama Gum Hpan
2. Du Jum Hkumboi Zau Jun
3. Lat Du Hpunggan Yaw Nan