MYIT SU KABA NI GA KABA TSUN NGA MA AI

Myu Tsaw Myit

- Tinang amyu hte mungdan nganggrin nga hkra tsawra makawp maga da mayu ai myit.
- Tinang a mungdan hte amyu shanglawt na hpe ra sharawng ai myit.
- Tinang a mungdan hte amyu hpe rawt galu kaba wa shangun mayu ai myit.
- Tinang a amyu sha ni hpe myit hkrum kahkyin gumdin nga shangun mayu ai myit.
- Tinang amyu hte mungdan hta arawng la chye ai myit.
- Tinang amyu hte mungdan a matu tinang asak, tinang a hkum hte tinang a ngu-mu nga-mai lam    yawng hpe apnawng kau lu ai myit.
- Tinang a mungdan hte amyu a ntsa tut nawng dinggrin sadi dung ai myit.

Wunpawng Mungdan Shanglawt Hpung a
Ninggawn Mungmasa Lam Yan
Daw III. Daw Kaji 1

U hpung uhpawng shagu, masha hkum shagu hte mung simani lu nna, ntsa ka-up ai lam n nga ai sha uhpung hpe woi awn ningbaw lu na kun ?

Du Kaba Gauri Zau Seng

“ Lung seng prat hta lung seng hpe htung hking kaw bang ra na re"

"Du magam ni lai mat wa, Mung shawa gaw a nga nga"

Dip sha ai sha a nga dingsang rawt malan ai gaw nga ra chyalu re"

Rev. Nngai Gam

"Shimggyim masha gaw, tinang a shingdu labau, tinang prat pra sa wa ai lam hpe chye ra ai. Shaloi she gara de shading nna matut hkawm sa wa ra ai ngu ai shawng lam hpe chye na re.”

“Tinang hpe masha ni roi sha ai, dip sha ai, ngu nna masha ni hpe mara shagun nga ai hte sha, roi sha hkrum, dip sha hkrum ai kaw nna lawt na n re. Masha ni tinang hpe nroi sha, ndip sha lu u ga, tinang mahtang hpaji chye hkrang hkra, sut gan n-gun rawng hkra shakut ra nga ai”

Du Kaba Gauri Zau Seng

Nanhte Jinghpaw ni Nat kabai kau ai shaloi, nanhte a kaja ai amyu htunghking ni hpe hkum kabai shalawm kau mu, nanhte a htunghking hta Karai Kasang a lagaw hkang hkang ai.
Jinghpaw masha ni e, nanhte tara hkaw sara galaw na shawng sharawng mu, kaga bungli galaw na garai hkum tin.

Dr. Ola Hanson

“ Jinghpaw ni e, Nanhte Jinghpaw ga n chye sai.”

Crider

(1927 ning sa sana (50) ning hpring jubili hta shadum shahprang ga lami n kau mi) “ Lai wa sai shaning ni hta na makam masham ni hpe n galai kau yang gaw, mungkan ga e, Jinghpaw ni a matu, myit mada shara hpa n mu ya nngai. Rai tim ya sa sana sara ni a mau hpa amu a majaw, myit hte hpung shingkang gaw, yat e shabyin wa na rai. “Hkristan htunghking, Jinghpaw bumga e, bra ayai shang wa ai majaw, hpang de Jinghpaw amyu ni bra wa sana n rai”

Sagaing Minggyi Thornton

“Myen mung na mung masha baw ni hta nanhte gaw kaji a hkyep kachyi mi sha rai myit dai, Shawng e gaw bum e chyu matep nga myit dai. Ndai prat gaw mi na prat zawn n nga mai sai, masha wa hte shadang bung shingjawng ra sai, Ga shagawp langai mi nga ai; Pyending mi hta, pyending mi hpe bai shatu set yang, nhtoi gaw n yawm ai”
Dum mu, nanhte madu nga ai bumga gaw, nanhte a rai nga ai. Htawm hpang de nanhte a kashu kasha ni, grau nna galu kaba chye chyang kung hpan wa na lam yaw yu na gaw, nanhte a amu majing rai nga malit dai.

Major Blandy

“Tara hkaw sara ni hpe bau mu, jawng hpe makawp mu, Chyum laika hti mu, akyu pyi ai hta shaja mu, Yesu a mungdan a matu aja, gumhpraw, n-gun atsam, hpaji byen-ya yawng ap ya kau mu, dai galu kaba wa na lam nhpawt madung majing rai nga ai”

Sara Kaba yan mama Hanson
(October, 1928)

“La ni num lahkawng la mai yang gaw num ni mung la lahkawng la mai ai, n rai ni ? Shing rai galaw yang nta dinghku gaw hpa byin na rai ta ? hten run wa chyalu sha rai nga ai n rai ni ? Dai gaw Karai Kasang naw ai htunghking majing n re”
“Myit n malai yang, hpaji kade sharin, English laika kade chye tim, galu kaba wa lu na n rai. Sanat gaw n hkru a rai matse hpe gap sat kau na matu, grai akyu nga tim, mana myit n gring ai wa sanat lang yang gaw, tinang kahpu kanau jinghku wa hpe rai timung gap sat wa na re. Dai majaw myit n galai ai wa laika hpaji chye yang, tinang amyu hte tinang hkum hpe jahten kau na ra ai.”

Sara Geis, April, 1930

“ Karai Kasang a mungdan hpu htum ai chye yang, alu gumhpraw jaw na kadai mung myit n ru, n lahpawt dum na re ai. Nanhte alu nlu nga nna, tsun shadut nga ai gaw Karai Kasang a mungdan hpu htum ai hpe n chye ai jaw e re ai”

Sara Weodbuary, April 1930

Karai Kasang gaw, masha amyu baw shagu hpe shagrau shatsaw lu ai wa re ai. Karai Kasang hpe kumhpa jang anhte hpe mung, shagrau sharawt na ni ai”

Sara Lashi Naw

“Nanhte Jinghpaw ni e, madat mu law; nanhte chyawm gaw Karai Kasang a mungdan hte shi a dinghpring ai lam shawng tam nga mu. Shaloi dai nalang nanhte hpe kahtap jaw na marin dai”. “Anhte Jinghpaw ni shawng e, hpa tam ra a ga ta? Hpaji n rai, sabya n rai, sutgan n rai, tsawm ai hpun palawng n rai, shawng nnan e hpa ra nga ga ta? Myit nnan Karai Kasang a myit, nhtum nwai ai asak, lamu mungdan a myit, tsawra myit, chyoipra ai myit, dai yawng shawng tam yang gaw kaga ndai ga na hte seng ai baw sumhpa n yak wa na rei”

Sara Sword, June, 1930

“Ap nawng ai prat lai sai, galaw sha ai prat rai sai. Ya na ni ap nawng ai gaw majen je ai n rai sai. Galaw sha ai gaw tinang amyu hpe hpya sha ai re. Ap nawng ai myit rawng ga. Galaw sha ai myit tawn kau saga.”

Lahtaw Gum Se, June 6, 1996

“Ring chying ai amyu ni gaw hka hta shawng galu kaba ma ai, Mali hka gaw anhte a asak, wenyi, Sutgan majing re.

Lahtaw Gum Se, January 30, 1996

“Jinghpaw laika gaw Karai wa a mungga a majaw dai ni du hkra asak hkrung nga ai re”

Lahtaw Gum Se

“Karai Kasang hpe chye ai amyu ni gaw kaja ai magam bungli galaw ma ai, Karai Kasang hpe chye ai ni a sat lawat gaw grai si mani ai, grai tsawm htap ai”

Maran Ja Gun, August 1, 1996

“Mungkan hpe ngai n kam ai, ngai hpe kawsi shangun ai”

Nngai Gam

“Mung masa myi n hpaw ai majaw anhte chyum jawng sara ni pyi shat lu sha na matu Myen Party shang ga ngu bawng ai ten nga lai wa yu sai.”

Nngai Gam

“Hpan da ai maumwi ni yawng reng ai, Wunpawng sha ni a maumwi gaw reng htum re.”

Nngai Gam

“Htunghking gaw galai ra ai. Nawku htung gaw sharai ra ai. Teng man ai gaw jahkrung re. Lungseng prat hta Lungseng hpe htunghking hku lang ra sai.”

Nngai Gam

“Wunpawng sha ni a Hpan wa ning sang chye wa ning chyang gaw Yesu hkristu hte bung ai”

Lahtaw Gum Se

“Gap hkat ai aten hta hpyen la n kam galaw ai, Simsa ai lam hta bungli galaw ga ngu yang mung n kam ai, Dai wa i myu hpe saw.”

Lahtaw Saboi Jum, February 8, 1996

“Byin mayu ai hpe shawng n hpang ga, Byin mai ai hpe shawng tam ga, Shada n jahpyak ga.”

Lahtaw Saboi Jum, February 8, 1996

“Mung masa chye nna mung masa ningbaw galaw ai n re, Myu hpe tsaw ai majaw, rawt malan mayu ai myit a mjaw, mung masa galaw ai re.”

Wabaw Zau Rip June 29, 1996

“Mungdan gaw shanglawt lu sai, Mung masha gaw shanglawt n lu shi ai.
Mung byak ai hta masha byak ai gaw grai hkrit tsang hpa re.”

Wabaw Zau Rip June 29, 1996

“AIDS ana gaw mung masa a majaw byin pru wa ai ana re.”

Dr. Lu Ja

“Nang hpe dinghku a kawa langai hku nna grai myit machyi ai, Rai tim, Karai a magam gun langai hku nna grai hkungga ai hte grai tsawra ai.”

Tauba Lum Naw (Mrs. L. Gam Se)