Ya dai ni na ten mungkan hta amyu sha law law gaw tinang amyu sha n htum n mat na matu lam amyu myu hku nna makawp maga ai lam hpe galaw nga ai. Dai hte maren anhte Wunpawng amyu sha ni mung, Mungkan shara shagu du hkawm chyam bra mat wa nga ai raitim shada matut mahkai, hku hkau lam lu la nna tinang amyu sha law htam rawt jat wa lu na matu Wunpawng myusha shayi shadang matut mahkai shachyen shaga ya ai lam mung ra wa nga sai ngu mu mada let ndai Match Maker hpe Kachinnet kaw nna lit la galaw wa ai lam rai nga ai.

Hpan Madu Karai Kasang gaw Wunpawng Amyu masha (Kachin) hpe mung amyu masha langai mi hku mayat maya law htam nga pra na matu hpan tawn da sai rai nga ai. Mayat maya law htam wa hkra gaw shangai pra sa wa nga sai Wunpawng Amyu masha nlang hkan sa galaw la ra nga sai. Shangai pra sa wa sai Wunpawng amyu masha ni hkamja bawng ring galu kaba kung zet wa na matu mung, asak naw kaji yang nsi mat shajang na matu mung, Wunpawng amyu masha nlang galaw la ra nga ai lam rai nga sai. Amyu masha langai mi, masha jahpan nlaw ai gaw hkrat sum machyi hkrum lam ni a ningpawt rai nga ai.

Wunpawng amyu masha ni hta, hpu nau, kahkri katsa, mayu dama htung hking lam, nawku makam masham lam, hpuja hpaga lam ndai zawn re ai lam ni mung kun dinghku de wa na matu sharam tawn kau ya ai hku byin nga ai. Prat hta hkan nna hpaji tam ai, kan bau ai, galaw ra ai magam bungli amyu magup hta galaw hkawm ai lam ni a majaw mung, galu kaba wa ai ramma shayi shadang ni kun dinghku de wa na hta asak aprat aten shalai ai ni mung law la nga ai. Dai re majaw, Kachinnet Website gaw, Computer hpaji prat rai nga sai hte maren, Wunpawng amyu sha shayi shadang ni, mahkawn shabrang ni sha nrai, aprat asak naw ram ai shingkra la, gaida num ni kadai rai timung, kun dinghku ningrum ningtau matut la mayu ai ni hpe Kachinnet Website hta manu jahpu n la ai Free bang shalawm ya nna, TSAW RA AI, NGWI PYAW AI, SHANGAI CHYINGHKAI MAYAT MAYA AI, Wunpawng amyu masha kun dinghku in law htam jat wa u ga matu karum ya mat wa na rai nga ga ai law.

Myit sharawng ai ni gaw, (1) Madu a tsawm ai sumla,(2) Mying (3) Amyu ru sai htinggaw mying, (4) Asak (5) jawng lung ai laika atsang,(6) chyoi chye tawn ai kan bau hpaji (7) kan bau nga ai bungli (8) matut mahkai la na hkringdat, telephone nambat, e-mail address ni hpe shalawm jaw dat ya nna, tinang myit mada ra sharawng lata mayu ai ningrum ningtau Wa/Jan gaw, kaning re ai myit jasat arawn alai, laika hpaji atsam, kan bau machyoi hpaji kaning re ai hpe chye ai ngu ai lam ni hpe ka madun shalawm nna, Kachinnet Website de shagun jaw dat ai rai yang, kabu n-gun jaw let, shabra ya na ga ai law.

Kachinnet Website de shagun na hkringdat hte matut mahkai la na matu:-

Email Address:- kachinnet@yahoo.com

Shawang tsaw ra myit hte

Kachinnet.