(1) LANG NGU NA LAIZA GINWANG MA SHAPAN SARA TAI SHARING JAWNG YU HPAWNG

Knet; 31 May, 2007

2007 ning May 31 ya shani jahpawt hkying 9:00 Am aten, Wunpawng Mungdan Shanglawt Hpung (KIO) uphkang ginra Laiza mare hta Jinghpaw Wunpawng Amyu Shayi Hpung Ginjaw kaw nna woi awn let galaw ai (1) Lang ngu na Laiza Ginwang ma shapan sara tai sharing jawng yu hpawng hpe galaw lai wa sai lam chye lu ai.

Jawng yu hpawng hta Amyu Shayi Ginjaw Komiti Ningtau Ningbaw Malai Hpawmi Shanghtin Hkawng Tawng hte Ginjaw Hpaji Dap Hpaji Du Sara Kaba Hkun Nawng ni kaw nna hpaji jaw shatsam mungga shaga lai wa sai. Amyu Shayi Ginjaw Komiti Ningtau Ningbaw Malai Hpawmi Shanghtin Hkawn Tawng kaw nna tsun lai wa sai mungga hta “ma shapan sara ni gaw sharin ai hkaja ai ngu ai hpe shawng nnan hpang wa ai ma ni hpe sharin ya ai Sara, Sara num ni re majaw ahkyak dik ai shinggyim uhpawng a ningpawt ning hpang hpe gaw gap nga ai ni rai nga ai. Ritkawp lam, hkungga la ra lam, akyang lai len gram ya ai lam ni, madu hkum hpe madu kam mat wa na ndai zawn rai galu kaba wa ai hta hkan nna anhte a shinggyim uhpung kaja mat wa na, ndai zawn re ahkyak ai lam hpe sharin ya nga ai sara ni re majaw ahkyak dik ai sara ni re. Laika hpaji hparat ngu ai gaw, madat mara chye ai atsam, hte tinang hkum hpe tinang kam ai atsam jaw ya ai rai nga ai, dai majaw ma kaji kawn madat mara chye ai ni byin wa hkra KG Sara ni gaw grai ahkyak la nga ai, madat mara chye ai lam nlu shabyin yang, shakung la nmai, kungzet manu dan ai ningbaw byin pru wa lu na nrai, tinang ahkum hpe tinang kam ai atsam sha n lu sharin la yang anhte Wunpawng Amyu masha ni, masha amyu langai mi tai nna grin nga lu na nrai” ngu shatsam mungga shaga lai wa sai. . Dai hpang Sara Lasang Tu kaw nna tinang buga shara shagu de matut nna magam gun hpai sa wa na sara num ni hpe kyu hpyi shaman ya ai hte ndai hpawng hpe hpungdim dat sai. .

Ndai sharin hpawng hpe Lai wa sai May shata Praw 1 ya shani kaw nna dai ni du hkra shata mi tup sharin lai wa sai rai nna, sharing hpawng hta RCM, KBC hte Buga ginra shara shagu na sara num ni yawng marai 27 tup sa du sharin hkam la ai re lam chye lu ai.

Amyu Shayi Ningtau Ningbaw Malai Hpawmi Shanghtin Hkawn Tawng

kawn shatsam mungga shaga nga yang