Hting Cheung- Myitkyina Lam Hpaw

Knet; April 27, 2007

Lai wa sai April 26 ya jahpawt 8:30 am aten hta Sadung Ginwang Kampaiti Mare hta Hting Cheung-Myitkyina lam hpaw poi hpe galaw ai lam chye lu ai.

Ndai lam hpaw poi hta Miwa Gumsan Mungdan, Hting Cheung Mungdaw Hkayaing Wun Mr. Chyan We Chyin hte Yunnan Mungdaw Uphkang Du Liu Hping, Dingdung Ginwang Ginjaw M.P.Hk Du Tai Mu Brg.Gen Tsan Htun ni sa du ai lam chye lu ai.

Mr. Chyan We Chin hte Mr. Liu Hping ni kaw na ndai lam hpaw poi lamang kaw mungga shaga ai hta, " Ndai lam hpaw ai hta Myen hte Miwa Mungdan lahkawng a lapran hku hkau lam, sut masa lam hte mung masha nga mu nga mai lam hte hkawm sa hkawm wa grau kaja wa na matu yaw shada let hpaw ai re lam," tsun ai. Ndai lam hpaw na hte seng nna 2004 ning May 19 ya shani Miwa Mung hte Myen Mung Asuya Mungdan lahkawng na Salang ni Yangon Mare hta myit hkrum lekmat htu nna, 2004 ning May shata kaw na lam galaw ai bungli hpang wa ai lam chye lu ai.

Ya hpaw hpang wa ai Hting Cheung-Myitkyina lam gaw Myen hte Miwa Mungdan Dingda maga lamu ga jarit masat shadaw ( 4 ) shara rai nga ai Kampaiti Mare kaw nna hpang wa ai gaw Wai Maw Ginwang Washawng Mare du hkra ( 96 km ) rai nna, Miwa Gumhpraw Yuan Wan 800 ma hkam let galaw da ai lam chye lu ai. Bai Kampaiti Mare kaw nna Hting Cheung Mare kaba du hkra lam kaba galaw ai lam hta ngut kre na matu loi li naw ngam ai lam mung matut chye lu ai.

Hting Cheung-Myitkyina lam hpaw poi hta Miwa Gumsan Mungdan Yunnan Mungdaw Uphkang Dap shara shagu na Du Salang ni, Myen Mungdan Dingdung Ginwang Ginjaw Magam Dap shara shagu na Du Salang ni, KIO Ningbaw Kaba Lanyaw Zawng Hra, NDA-K Ningbaw Kaba Zahkung Ting Ying, Du Kaba La Sang Awng Wa hte mungdan lawhkawng na Mungchying masha (1000) jan sa du lawm ai lam chye lu ai.

Hting Cheung-Myitkyina lam hpe yu gawan hkawm nga yang

Photos by KNET.