(3) Lang Na Wunpawng Amyu Shayi Masat Ninghtoi Hpawng

Knet; 19 August 2007

(3) Lang ngu na Wunpawng Amyu Shayi masat ninghtoi hpawng hpe dai ni Laiza Muklum, Sinpraw Majoi Manau Gawknu hta galaw la lu sai.

Ndai hpawng hta magam dap, makan dap shagu na amyu shayi ni, Ginjaw Ginra kata na amyu shayi hpawmi, ramma ni, Ginjaw Salang ni yawng marai 500 daram sa du hpawng ai lam chye lu ai.

Hpawng hpe 11:00Am aten, hpawng hpa-awn rai nga ai Wunpawng Amyu Shayi Hpung Ginjaw Amu Madu, Maran Ja Seng Hkawn kawn hpawng hpaw hte hkalum mungga shaga sai. Shawng nnan Wunpawng Myu Sha dawnghkawn hpe hkungga jaw let, Hpungtau Maran Nga Mai Naw kaw nna zuphpawng ap kyu hpyi ya ai.

Zuphpawng hta Rev. Lahpai Shing Rip kaw nna Karai Kasang a Chyum mungga hte n'gun jaw mungga shaga ai. Dai hpang Wunpawng Amyu Shayi Hpung Ginjaw (KWA) Ningbaw Hpawmi Hpawre Hkawn Ja kaw nna, (3) lang na Wunpawng Amyu Shayi masat ninghtoi shatsam mungga hpe shaga ai.

Wunpawng Amyu Shayi Hpung (K.W.A) gaw 2006-2007 ning laman hta, ginjaw ginra hte ginwang ginjaw (4) kata hta Wunpawng Mungdan Amyu Shayi Hpung a lam hkaw tsun ndau nna Wunpawng Amyu Shayi ni a kata kahkyin gumdin ai lam, Ma shapan jawng ni hpe hpaw let asak (5) ning lawu ma kaji ni hpe shalat shapan ai lam, ma kaji ni hte kanu ni a hkamja lam ni hpe hkaw tsun hpaji machye machyang jaw ai lam hte tsi mawan ni hpe dangdi dang dep ai daram garum ai lam, Repchywi (Jakchywi) dap ni kanbau bungli na matu sharin ya ai lam, ramma daw asak aprat ram ai ni hpe hpaji jawng ni pat ai ten hta ramma ni chye la mai ai lata hpaji, hkai sun hpaji, hkrang pan, ri da maka hte wunpawng htung hking labau lam ni hpe sharin ya ai lam, Amyu sha lam yan hte buga rawt jat wa na lam ni hta dang di dep ai magam bungli hte garum shingtau ai lam ni hpe galaw lai wa sai lam Ningbaw Malai Hpawmi Shang Htin Hkawn Tawng kaw nna tsun sang lang dan ai. Bai nna Amyu shayi ni chye da ging ai, ya ten Wunpawng Myu Shayi ni hta byin hkrum nga ai mabyin ni hte seng nna hpaji jaw lam madun shatsam mungga jaw ai lam chye lu ai.

Ginjaw Komiti a gawng malai hku nna, Ginjaw Komiti Tingnyang Up Malai ( I ) Lat Du Daju Jum Du Kaba Gauri Zau Seng kaw nna mung Amyu Shayi ni hpe sa du hpaji jaw shatsam mungga shaga ai lam chye lu ai. Hpaji jaw mungga hta, mungkan hta num shayi sha ni gaw Panglai rai yang Wunpawng Amyu Shayi ni gaw Hkanu rai u ga. Wunpawng Myu Sha nlang rawt jat tsaw wa lu na matu myu shayi ni tsaw ra na re. Wunpawng Myu Shayi ni madang nyem yang Wunpawng Myu Sha nlang hte mung madang nyem wa na re. Hka tsaw yang she wawn mung tsaw ai. Dai majaw hka tsaw wawn tsaw rai wa lu hkra amyu shayi ni mung shakut shaja ga nga shatsam mungga jaw lai wa sai. Dai hpang Mungdan mahkawn hte Zuphpwng hpe ginchyum dat sai.

Matut nna, Wunpawng Mungdan Amyu Shayi Hpung a yaw shada lam mahkawn hpe du sa ai Amyu Shayi ni yawng hkum hkum ra ra hte mahkawn ai lam nga ai. K.W.A, K.W.A.T, Balik Dap, Immigration ni kawn masha dut sha hkrum ai hte seng nna atsam madun ai lamang, Laiza Tsi jawngma amyu shayi ni kawn H.I.V, AIDS a lam hte seng nna atsam madun hpaji jaw ai lamang, Laiza Amyu Shayi Komiti ni a gamung nau ra kadun tsun shaga ai lamang ni hpe mung galaw mat wa sai lam chye lu ai. Dai hpang manhkrum malu masha ni jawm sha ai hte ndai hpawng hpe hpungdim dat sai lam chye lu ai.

Amyu Shayi Ningbaw Malai kaw na mungga shaga nga yang

Ginjaw Komiti Tinyang Up Malai (I) kaw nna n'gun jaw shatsam mungga shaga nga yang

Wunpawng Amyu Shayi Hpawmi, Mahkawn ni yawng hkum hkum ra ra hte Wunpawng Amyu Shayi Hpung (KWA) a yaw shada lam mahkawn hpe wu wu di di rai jawm hkawn nga yang