(32) NING HPRING SHARE SHAGAN MASAT NINGHTOI HPAWNG

Knet; August 10, 2007

2007 ning August shata praw 10 ya shani hkying 11:00 Am kaw na 12:30 Am aten laman Laiza Muklum, Myu Lawt Wunli Gawknu e Wunpawng Mungdan Shanglawt Hpung (K.I.O) a (32) ning hpring share shagan masat nhtoi hpawng hte shana 7:00 Pm aten yungwi pinra lamang ni hpe galaw lai wa sai.

Ndai hpawng hpe Ninggawn Daju Komiti kaw na lit la woi awn galaw sai wa ai rai nna, lai wa sai shaning ni hta asak ap nawng lai mat wa sai share shagan ni a lupding lup ra ni hta mung galaw lai wa sai lam nga ai raitim, dai ning gaw shawoi shaning na zawn n galaw ai sha, share shagan masat nhtoi hta myit shawai la ai hku nna mungshawa dap shawa yawng hpawng de let share shagan nhtoi hpe lachyum shaleng ai hku galaw ai re lam chye lu ai.

Shani na hpawng lamang hpe hpawng hpa-awn, Mungchying Uphkang Dap Ningtau Lithkam, Salang Kaba Labang Doi Pyi Sa kawn Wunpawng Myu Sha dawnghkawn hte hkrat sum mat wa sai share shagan ningbaw ningla ni hpe hkungga jaw ai lam woi awn galaw let, hpawng hpaw kyuhpyi ai lam hpe Hpungtau Maran Naw kaw na ap nawng ya ai lam, dai hpang zuphpawng tingnyang up, Tau Dap Awn Daju, Dukaba Hpunggan Zau Nan kawn hpawng hpaw mungga shaga ai. Dai hpang Dap Awn Daju, Du Daju Gunhtang Gam Shawng kawn shatsam mungga shaga ya ai hta, (1) share shagan nhtoi byin wa ai a labau daw, (2) share shagan nhtoi a lachyum shaleng ai daw (3) share shagan nhtoi hta hkam la ra ai myit jasat ni gara hku rai ra ai lam ni hpe tsun shatsam lai wa sai lam chye lu ai.

Dai hpang zuphpawng Tinyang Up Du Kaba Hpunggan Zau Nan kawn hpungdim dat mungga shaga ya sai the, hpawng hpa awn Slg.Kaba Labang Doi Pyi Sa kawn mungdan mahkawn woi awn mahkawn let hpawng hpe angwi apyaw awng dang let galaw la lu sai.

Ndai hpawng hta Makan Dap, Magam Dap shagu na hpa awn salang ni, wunkat shagu na wunkat jawngma ni, tsi jawngma ni hte Laiza Jawngma ni, Mung Shawa ni yawng marai 1000 jan sa du dung lawm ai lam chye lu ai.

Shana daw hkying 7:00 Pm aten yungwi pinra lamang hta magam gun kaji kaba ni a yungwi hte shangwi shapyaw ai lam, rawt malan hkrun lam a mahkrum madup sakse hkam ai lam, roi rip zing ri zing rat hkrum lai wa sai hpe hkrang shala ai lam ni hpe galaw ai lam chye lu ai.

Tau Dap Awn Daju kaw nna hpawng hpaw mungga shaga nga yang

Dap Awn Daju kaw nna share shagan masat ninghtoi mungga shaga nga yang

Tau Dap Awn Daju kaw nna mahkawn hte shangwi shapyaw nga yang

Shanglawt masa gat hkai hpung kaw nna kahkrang shala nga yang

Shana na yungwi pinra hta du sa ai mungshawa dap shawa ni