Hkinlum Hpaji shalat masing kawn tsang (10) awng ai jawngma ni hpe shagrau sha a hpawng galaw

Knet; 20 August,2007

2007 ning August shata (18) ya, jahpawt hkying (8:00) kawn shani hkying (12:00) laman Myitkyina Dapkawng Nawku jawng e Hkinlum Hpaji shalat masing kawn tsang (10) awng ai Jawngma ni hpe shagrau sha a ai hpawng galaw lai wa sai lam chye lu ai.

Ndai hpawng lamang hpe myitkyina Dakkasu na Saranum Dashi Hkawn Tsin kawn tingnyang up galaw ya n-na, Hkinglum hpaji shalat masing ningbaw, Sara Palawng Naw Tawng kawn hkalum mungga shaga ya let hpawng lamang hpang wa ai lam, dai hpang Myitkyina Dakkasu na Saranum Kaba Gaidaw Nang Bawk kawn hpaji hte seng ai n-gun jaw ga tsun shatsam n htawn, Hkinlum Hpaji shalat masing Amu madu rai nga ai Sara Hprup la san kawn, sharin sara ni, Guide ni 2006-2007 ning hpaji lagaw hta ningtawn ai jawng ma ni, awng ai jawngma ni, sharin ginra hte lithkam ni hpe shagrau Kumhpa jaw ya lai wa sai lam, bai nna tsang (10) awng ai jawngma ni matu Rev.Hkawng Lum kaw ginlawm kyu hpyi ya ai hte Dr.Hkyen Naw kaw nna chyum mungga hte n-gun jaw shatsam lai wa sai lam chye lu ai.

Ndai hpawng hpe Amu madu sara Hprup kawn chyeju dum ga tsun ya ai hpang Rev. Kumshin Bawk Naw shaman ya nna hpumdim dat sai lam chye lu ai. Ndai hpawng hta saw shaga da ai dakkasu na sara num ni dakkasu jawngma ni, Nawngnang chyum dakkasu jawngma ni hte tsangshi awng ai jawngma ni yawng masha marai (400) ram ndai hpawng de sa du dung lawn ai lam chye lu ai.

2006-2007 Jawng lung shaning hkinlum hpaji shalat masing kaw na tsang shi awng ai jawng ma ni gaw Dap Kawng ginra na marai(23), Mammaw Ginra na marai (25), Putao ginra na marai(9), Ziun ginra (1) yawng marai(76) re lam chye lu ai.

Hkinlum hpaji shalat masing a lachyum gaw anhte Wunpawng sha ni a matsun maroi labau hta Kinseng Shabrang hte Hpungdin Kai Nang hpe jaw dat ai sumsing wunli wungau hta hpaji hparat hte zai byeng-ya rawng nna reng hkik ai amyu ni hpe lam woi u ga nga Hkinlum Htu Shan hpe da ya ai. Ndai Hkinlum Htu shan a mying hpe lakap nna ndai masing mung hpaji hparat lam, shalat jahpat ai lam hta Jinghpaw Wunpawng sha ni hpe jut shara mi kaw na sha pyi shang lawm lu na matu Hkinlum hpaji shalat masing ngu amying shingteng jaw da ai re lam chye lu ai.

Bai nna yaw shada ai lam gaw, Ja gumhpraw yak nna tsang (10) sanpoi hpe atsawm sha nlu htai n lu lung ai jawngma ni hpe tsang (10) awng hkra laika sharin ya na.

Lahta tsang Dakkasu hpaji sharin nga ai Jinghpaw W.P jawngma ni hte jan mau lu ngut sai ni yawng, tinang lu ai atsam, lu ai aten hpe amyu sha lam hta ap nawng mayu ai myit byin pru wa na matu,

Amyu sha ni yawng hpaji lam hta chye chyang kunghpan wa na matu re lam chye lu ai.

2006-2007 hta galaw ai bungli ni gaw,

(1) 2006, December shata e Hkinlum Hkristmat hpe Akyena hte Manmaw ginra ni hta galaw la lu sai.

(2) 2007 ning April- praw 3-8 ya laman Myitkyina ginwang hpung shawa zuphpawng hta MaZa wa hta ai.

(3) 2007 ning April shata hta Dvelopment Training( PAR ) galaw la lu ai.

(4) 2007 ning April- May hta Putao de Pragram nnan jat la lu ai.

(5) 2007 ning September hta shagrau sha a hpawng hpe Akyena hte Manmaw ginra ni hta gawlaw la lu sai lam chye lu ai.

Wan shadaw, maisau buk, mahkret zawng re jawngma langai hkrai a ra lam ni hta garum madi shadaw ai hku mung ra wa ai lam ni hpe lajin wa ai shaloi tinang myit hkawn ai made shang lawm ai hku nna mung, hpaji jaw hte akyu hpyi garum ai hku nna mung, Hkinlum hpaji shalat masing a manang tai ya na matu mung Nu Wa hpu-nau ni yawng hpe Hkinlum hpaji shalat masing kawn hkalum nga ai lam mung chye lu ai.

Ya dai ni du hkra rai yang 2003-2007 ning laman tsang (10) awng la sai jawngma yawng (201) rai sai lam chye lu ai.