Jinghpaw Wunpawng Laili Laika hte Htung Hking hkaw tsun hpawng galaw

Knet; August 4,2007

2007 ning August 4 ya shani hta Myitkyina mare Nawng Nang, Jaw Masat Nawku Htingnu hta Jinghpaw Wunpawng Laili Laika hte Htung Hking hkaw tsun hpawng galaw ai lam chye lu ai.

Hkaw tsun hpawng hpe jahpawt 9:30am aten hta galaw hpang sai. Shawng n'nan Dr. Nalaw Dai Hkawng kawn hpawng ap kyu hpyi sai. K.T.C Nawng Nang Laili Laika Komiti hpu-awn Sabaw Gum Ja Awng kawn hkalum ga tsun lai sai. Dai hpang Jinghpaw Laika a Shawng Lam gabaw hte Rev. Manam Hpang kawn hpaji jaw hkaw tsun lai sai. Rev. Manam Hpang tsun ai hta, "lai sai prat na jinghpaw laika, dai ni na prat hta jinghpaw laika gaw gade daram madang nga wa sai lam, hpawt ni na prat hta jinghpaw laika hpe madang grau nga hkra matut galaw sa wa ra ai lam", ni hpe hpaji jaw hkaw tsun sai. Rev. Manam Hpang gaw Kachin Dictionary hpe shawng ka shapraw ai wa rai nna jinghpaw laili laika komiti hta hpu-awn lit hpe gun hpai nga ai lam matut chye lu ai. Shani 12:30pm aten hta hkaw tsun hpawng hpe daw mi hkring sa sai.

Shani 1:30pm aten hta hkaw tsun hpawng hpe matut galaw sai. Shawng n'nan K.T.C Nawng Nang Laili Laika Komiti kawn woi awn galaw ai, ga shagawp, sumroi, shagun laika, hkrang sumla shing jawng ai hta ningtawn ai ni hpe shagrau kumhpa jaw lai sai. Dai hpang Jinghpaw Htung Hking lam hte seng nna Sara Pung ga Ja Li kawn hpaji jaw hkaw tsun lai sai. Shi tsun ai hta," Jinghpaw Wunpawng amyu hte Karai makam masham lam, manau lam, manau shing ra maka lam, dinghku htung hking lam, wunpawng sha ni a dinghku hpe shabyin ai lam madung ni", hpe hpaji jaw hkaw tsun lai sai. Dai hpang K.T.C Nawng Nang Laili Laika Komiti hpu-awn kawn chye ju dum ga hte sa du hpaji jaw hkaw tsun ya ai sara ni hpe chye ju dum kumhpa jaw lai sai. Rev. Tang Ji kawn kyu hpyi shaman ya ai hte Jinghpaw Wunpawng laili laika hte htung hking hkaw tsun hpawng hpe 4:30pm aten hta ngut lu sai.

Ndai hkaw tsun hpawng hpe K.T.C Nawng Nang laili laika komiti kawn lit la galaw sa wa ai lam chye lu ai. Jinghpaw Wunpawng laili laika hte hkung hking hkaw tsun hpawng hta K.T.C chyum jawng ma, Myikyina Dakkasu jawng ma hte shawa masha 400 jan sa du ai lam chye lu ai.

Sabaw Gum Ja Awng kawn hkalum ga tsun nga yang

Rev. Manam Hpang kawn Jinghpaw Laika a shawm lam hte seng nna hkaw tsun nga yang

Sara Pung ga Ja Li kawn Jinghpaw Htung Hking hte seng nna hkaw tsun nga yang

Chye na mayu ai lam ni hpe tsun san nga yang

Du sa ai shawa masha

Du sa ai shawa masha

Rev. Manam Hpang kawn chye ju dum kumhpa hkap la nga yang

Rev. Tang Ji kawn shaman kyu hpyi nga yang

Du sa ai Sara Kaba ni hte K.T.C Nawng Nang laili laika komiti malawm ni

Photos by, KNET.