Laiza hta Camera Wunkat Hpaw

Knet; 21 August 2007

Wunpawng Mungdan Shanglawt Asuya, Ginjaw Shi Sumla Makan Dap kawn woi awn hpaw ai, masat yan (6) camera wunkat hpaw hpawng hpe mani hkying 11:00 Am aten, Laiza Muklum lapran tsang jawng hta galaw lai wa sai lam chye lu ai.

Ndai zup hpawng hta hpawng tinyang up rai nga ai Ginjaw Shi Sumla Makan Dap Du, Du Jum Gumtung Naw Awng kaw nna hpaw hpaw mungga shatsam nna hpaw hpang wa sai lam chye lu ai.

Jawng Up rai nga ai, Zai Ninggawn Ningtau Matsun Du, Du Kaba Maran Zau Tawng kawn shatsam mungga tsun shatsam ai hta, “ ya dai ni simsa lam la da ai ten, Buga gaw sharawt bungli ni hta n'gun dat sa wa ai lam nga ai zawn, magam dap, makan dap shagu hta mung gawgap ai lam, shaman shakyang ai lam galaw nga ai lam, ya ten mungkan gaw rawt jat nga ai mungkan re hte maren, rawt jat ai mungkan hta, anhte gaw manang ni kaw hkan apa nang gaw n mai sai lam, anhte nan shakut ra sai, shachyut ra sai hte, dai zawn shachyut ai shaloi hpaji hte kung kyang ai lam nga ra ai, kung kyang na matut gaw sharin ra ai, hkaja ra ai. Shi sumla hta mung arung arai grai kaja ai ni jai lang ra ai majaw, dai hpe hkang zing jai lang ai masha a myit masa, myit marai ni mung madang nga ra ai, bai nna ya dai ni na ten, hpaji gaw ding yang hkaja ra ai prat re, n sharin hkaja lu ai wa gaw ngam nan na sha re lam, dai majaw shakut shaja let hpaji hpe hkaja la ra ai” nga tsun shatsam n'gun jaw lai wa sai lam chye lu ai.

Dai hpang zuphpawng tinyang up Du Jum Gumtung Naw Awng kawn hpungdim dat shaga ya sai hte hpawng hpungdim dat sai lam chye lu ai.

Ndai wunkat hta ginjaw ginra hte Dap Ba shagu na magam gun ni, buga shara shagu na ramma ni yawng marai 28 hte Dap Ba de na shi sumla makan dap Du ni, saw shaga da ai Salang ni mung sa du dung lawm ai lam, ndai wunkat hta jawngma yawng marai 50 daram hpe sharin ya sa wa na re lam chye lu ai.