Up Hkang Du ni hpe hkai rem hpaji sharin ya ai majat wunkat hpaw

Knet; 27 August 2007

Dai ni 10:00 Am aten, KIO a Awngja, Kasi Hkai Sun Jawng hta Up Hkang Du ni hpe hkai rem hpaji sharin ya ai majat wunkat hpaw hpawng hpe galaw ai lam chye lu ai.

Hpawng hta Hkai Rem hte Nam Maling Gawnhkang Makan Dap Lit Hkam Du Kaba Zawng Buk Htan, Mungchying Up Hkang Dap Lit Hkam Salang Kaba Lajawng Hkawng Lum, ginwang shagu na Ginwang Up Hkang Du ni hte saw shaga da ai makan dap shagu na Du Salang ni sa du ai lam chye lu ai.

Ndai Hpawng hta hpawng hpa awn kaw nna hpawng mahkyen hti ndau ngut ai hpang, hkai rem hte nam maling gawn hkang makan dap lit hkam kawn hkai rem hte nam maling gawn hkang dap hte seng nna galaw sa wa ai magam bungli hpe tsun sang lang dan mat wa ai.

Mungchying Up Hkang Dap Lit Hkam kaw nna mung matsun maroi mungga shaga lai wa sai. Mungga hta, hkai rem hpaji hte mung shawa a nga mu nga mai lam sharawt shatsaw mat wa na matu, hkai rem dawnghkawn hpe sharawt let mung shawa hpe gahkyin kumdin sa wa lu na matu, mung shawa kata hkru kat, lu sut lu su, nga mu nga mai wa lu hkra yaw shada ai re lam hte hpaji jaw shatsam mungga hpe mung shaga lai wa sai lam chye lu ai.

Dai hpang hpawng hpa awn kaw nna hpawng hpe angwi apyaw ngut kre la lu sai lam ndau let hpawng hpungdim dat sai.

Ndai jawng hta Ginwang, Ginwang Daw shagu na Ningtau Up Hkang Du ni yawng marai (35) sa sharin hkaja hkam la ai lam, matut nna mung tinang a ginwang kata hkai rem hkai lu hkai sha lam ni hpe galaw sa mat wa na masing nga ai lam chye lu ai.

Du Kaba Zawng Buk Htan kawn hkai rem a magam bungli hte seng nna tsun sang lang nga yang

Mungchying Up Hkang Dap Lit Hkam kaw nna matsun maroi mungga shaga nga yang