59th Lang Na Jinghpaw Mungdaw Nhtoi Manau Poi Hta KIO Salang ni sa du

Knet; January 7,2007

January 7, 2007 ya shani hta Myitkyina Mare Kaba Shatapru Manau wang hta galaw na rai nga ai 59th lang na Jinghpaw Mungdaw N’htoi Manau Poi Kaba hta KIO Ginjaw Salang ni hte magam gun dap shawa ni mung sa du ai lam chye lu ai.

Sa du ai Ginjaw Salang ni hpe hkap tau la ai lamang nga ai. Ndai hkap tau hkalum la ai Zuphpawng hta Htunghking Kommiti Ningbaw Yup Zau Hkawng kaw nna Wunpawng Mungdan Shanglawt Hpung (KIO) Ginjaw Komiti Tingnyang Up Ningbaw Kaba Lanyaw Zawng Hra hpe Htunghking Shat Lit hte hkap tau la ai lam galaw ai. Matut nna Wunpawng Mungdan Amyu Shayi Hpung Ginjaw kaw nna mung Htunghking Komiti de Htunghking Shat Lit gun jaw ai lam chye lu ai.

Du Kaba Dr. La Ja kaw nna Ginjaw Salang ni hpe shachyen shaga ya ai lam galaw wa sai. Dai hpang KIO Ningbaw Kaba Lanyaw Zawng Hra kaw nna chyeju dum mungga shaga ai hte zuphpawng hpe hpungdim dat sai lam chye lu ai.

Ndai poi hta tinang KIO kaw nna Ningbaw Kaba hte Ginjaw Salang ni, magam gun dap shawa ni yawng marai 400 jan sa du ai rai nna, Miwa Gumsan Mungdan Jinghpaw Htunghking Hpung kaw nna mung yawng marai 300 jan sa du ai lam chye lu ai.