Jinghpaw Mungdaw Nhtoi Manau Poi Knet; January 10, 2007 2007 ning January 10 ya shani ang ai 59 lang na Jinghpaw Mungdaw Nhtoi hpe Wunpawng Htunghking Hpung Ginjaw Komiti woi awn let hkik hkam ai hku nna dai hpawt hkying 8:00 Am aten Jinghpaw Mungdaw Nhtoi poi lamang hpe galaw ai lam chye lu ai. Ndai hpaw poi lamang hta, shawng nnan Wunpawng Htunghking Hpung Ginjaw Komiti Ningbaw Majoi Gintawng Yup Zau Hkawng hkalum ga shaga ai. Jinghpaw Mungdaw Myen Hpyendap Daju Du Kaba Ohn Myint kaw nna mungga kadun tsun lai wa sai. Jinghpaw Mungdaw Nhtoi Manau Poi hpe Wunpawng Htunghking Hpung Ginjaw Komiti woi awn let Wunpawng Htunghking manau nau hpang ai. Ndai Manau poi hta Myen Asuya kaw na General Ohn Myint hte Salang ni, Wunpawng Mungdan Shanglawt Hpung KIO Ginjaw Salang ni hte magam gun kaji kaba ni, NDAK myit su Du Salang ni, JLH jawngma ni, Ginwang shagu na myit su ni sa du shanglawm ai lam chye lu ai. Shana maga hkying 1:00 Pm aten Wunpawng Htunghking Hpung Ginjaw woi awn let Jinghpaw Mungdaw Nhtoi Wunpawng Htunghking Manau kalang bai nau ai lam nga ai. Ndai hta Wunpawng Mungdan Shanglawt Hpung KIO Ginjaw Salang ni hte magam gun kaji kaba ni, NDAK myit su Du Salang ni, JLH jawngma ni, Ginwang shagu na du sa ai myit su ni hte Mungchying shawa masha ni shanglawm ai lam chye lu ai. Matut nna hkying 5:00 Pm aten, Jinghpaw Mundaw Myen Hpyendap Daju Du Kaba Ohn Myint hte Du Salang ni, NDAK na du sa ai myit su Du Salang ni, KIO kaw nna du sa ai Ginjaw Salang ni, Lasang Awng hpung na du sa ai Salang ni, lak san saw shaga da ai sumtsan manam ni hte makam masham hpung shagu na hpung woi sara ni shanglawm let Mungdaw Nhtoi lak san manhkrum lu sha poi hpe rau jawm sha ai lam chye lu ai. Shana maga hkying 7:00 Pm aten kaw na KIO hpung a ka hkrang hte ka manawt dan ai lamang, Jinghpaw Mungdaw Nhtoi Manau Shadang lata shingjawng ai lamang, mying gumhkawng ai yungwi shayi shadang ni a yungwi pinra ni hpe matut galaw ai lam nga ai rai nna dai ni na poi hta du sa ai poi sa manam yawng marai 20000 daram re lam hpe chye lu ai.
|