KIO Ginjaw Komiti Tingnyang Up Malai (I) hte Ginjaw Salang n kau mi Ban Dawng Yang Mare hte Awng Ja Hkai Sun Jawng de sa du gawan

 Knet; February 23, 2007

Dai ni hkying 12:00 daram aten, KIO Ginjaw Komiti Tingnyang Up Malai Du Kaba Gauri Zau Seng hte Ginjaw Salang n kau mi tinang KIO uhpung a gaw sharawt ginra rai nga ai Ban Dawng Yang Mare de sa du gawan hkawm ai.

Gaw sharawt ginra rai nga ai Ban Dawng Yang mare de sa du hkawm ai hta hkamja lam, hpaji lam, nam maling gawn hkang lam, gaw sharawt rawt jat na lam ni hte seng nna madung dat let ginra nga myit su salang ni hte bawngban zuphpawng galaw ai. Ban Dawng Yang mare masha ni hku n’na du sa ai tinang KIO salang ni hpe N’baw Shat Magun Lit hte hkalum la ai. Zuphpawng hta Ginjaw Komiti Tingnyang Up Malai Du Kaba Gauri Zau Seng kaw n’na lahta na lam ni hpe jin ngut ai daram anhte yawng jawm myit, jawm shakut n’gun dat let galaw sa wa ra ai lam, Hkamja Dap Lit Hkam Du Kaba N’gan Zau Hkun kaw n’na ginra nga masha ni a hkamja lam hte seng ai lam, Hkai Rem hte Nam Maling Gawn Hkang lit hkam Du Kaba Zawng Buk Htan kaw na nam maling gawn hkang lam hte seng ai lam, Hpaji Dap Lit Hkam Sara Kaba Sumlut Gam kaw nna Hpaji Jawng hte Hpaji lam hte seng ai lam ni hpe tsun bawng ban jahkrup ai.

Zuphpawng ngut ai hpang mare kata hte Laika Hpaji Jawng, Tsi Rung Tsi jaw gawk ni hpe gawan hkawm ai. Ndai zawn sa du gawan ai gaw bungli hpe hkrang shapraw sa wa lu na matu aten lu ai made hkan yu gawan ai rai nna, ya ten Ban Dawng Yang Mare hta n'ta htinggaw 500 jan daram rai nga sai lam hpe chye lu ai.

Dai hpang Awng Ja Kasi Madun Hkai Sun hta hkai rem hte nam maling gawn hkang wunkat jawngma ni hpe Tingnyang Up Malai kaw nna n’gun jaw matsun maroi mungga hkam la hpawng hpe mung galaw ai lam chye lu ai.