Laiza Muklum Hta 47 Ning Hpring Rawt Malan N’htoi Hpe Hkap Tau Hkalum La Ai Sumtsan Kagat Shingjawng Lamang Galaw

Knet; February 4, 2007

Laiza Muklum, Zup Awng Simsa Gawdin Ginsup Pa hta 47 ning hpring Rawt Malan N’htoi hpe hkap tau hkalum la ai Sumtsan Kagat Shingjawng Poi lamang hpe dai hpawt hkying 6:50 Am hte 9:00 Am lapran galaw ai lam chye lu ai. Ndai Sumtsan Kagat Shingjawng Poi lamang hpe Ninggawn Daju Ginsup Komiti kawn lit la woi awn ginsup ai re lam chye lu ai.

Shingjawng poi lamang hta Makan Dap hte Magam Dap shagu na Dap Shawa ni, Mung Shawa kaji kaba ni yawng La marai 190 hte Num marai 66 tup sa du shingjawng lawm ai lam chye lu ai. Kagat shingjawng ai hta Laiza, Zup Awng Simsa Gawdin Ginsup pa kaw na sharawt ai rai nna La Ja Yang du hkra tsan shadang Kilometer 15 re lam chye lu ai. Masat kumhpa hpe No. 10 du hkra masat lata ai rai nna, Masat Pandung du ai yawng La marai 122 hte Num marai 33 re lam chye lu ai.

Ndai zawn Kagat Shinjawng ai hta masat da ai hte maren Amyu Shadang kaw na (1)Maran Naw Seng (2) Mahkaw Hting Nan (3)Lasang Di La (4) Lahtaw Brang Awng(5) Maji Naw Li (6)Lakang Zau Mai (7)Naw Lawt (8)Maran Zau Hting (9)Maran Naw San (10)Hkrawng Muk Lung ni hpe Ninggawn Daju Ginsup Komiti Ningbaw Du Kaba Zau Hpan kaw na shagrau kumhpa hpe shagrau jaw ai. Masat da ai hte maren Amyu Shayi ni shingjawng ai kaw na (1) Maran Bawk San (2) Maran Luk Myaw (3) Hkangda Hkawn San (4)Lashi Ji Mai (5)N’hkum (6)Ning Shin (7)Hkinggau Hkawng Naw (8)Hpauchyang Htu Raw (9)Hpauchyang Htu Ing (10)Gunhtang Htu Bu ni hpe Ninggawn Daju Ningtau Tingyang Up Salang Kaba Doi Pyi Sa kaw na shagrau kumhpa hpe shagrau jaw ai. Bai nna ndai shingjawng poi hta asak kaji tim myit marai hte masat pandung du hkra shakut ai (1) Maran La Ring asak 11 ning (2) Lahtaw Gum San Awng asak 9 ning (3) Lahpai Zau Hpan asak 13 ning (4) Maran Doi Awng asak 14 ning ni hpe mung Ninggawn Daju Ginsup Komiti Ningbaw Du Kaba Zau Hpan kaw nna shagrau kumhpa hte shagrau ngut ai hpang Ninggawn Daju Tingyang Up, (VCS) Du Up Daju Hpunggan Zau Nan kaw nna mung laksan shagrau kum hpa shagrau ya ai lam nga ai.

Hpawt ni na 47 ning hpring Rawt Malan N’htoi e mung Zup Awng Simsa Ginsup Pa hta Rawt Malan Mungga hkamla hpawng ngut ai hpang ginsup shingjawng ai lamang ni hpe matut galaw mat wa na re lam chye lu ai.

Masat Pandung du mahka Lahtaw Gum San Awng(Asak 9 ning)

Du Up Daju Hpunggan Zau Nan kawn shagrau kumhpa shagrau nga yang

Du Kaba Zau Hpan kawn shagrau kumhpa jaw nga yang

Salang Kaba Doi Pyi Sa kawn Shagrau kumhpa hpe shagrau nga yang