MYUTSAW SAI HPUNG NI A N-DAU SHABRA LAIKA HTE YAW SHADA LAM WUNPAWNG MUNGDAN MYU SHA NI HPANG DE Anhte myu tsaw sai hpung ni a n-dau shabra dat ga ai. (1) Wunpawng myu sha ni hpang de anhte myu tsaw hpung ni a shamu shamawt ai lam hpe Du Kaba La Sang Awng wa hku nna masha n-sawn ai ga si ga ngau ni hte chya hpat da ai n-teng n-man ai sakse hkam da ai lam ni hpe myu sha ni chye na hkra shang lang dat ga ai. (2) Anhte myu tsaw sai hpung ni gaw kanu dap K.I.A(K.I.O) kaw na karan pru mat wa ai shani kaw nna lai wa sai shata aten ladaw du hkra pyaw tim yak tim Du Kaba La Sang Awng Wa a woi awn ai npu hta sadi dung let Wunpawng myu sha ni a matu tsap nga ai n rai nga ai. (3) 4-2-07 shani a mabyin hte seng nna Du Kaba La Sang Awng Wa hku nna anhte myu tsaw sai hpung ni hpe kanu K.I.A Asuya kaw na gumhpraw jaw nna Du Kaba La Sang Awng Wa hpe sat shangun ai nga nna n-teng n-man ai amyu sha ni hpe n-dau shabra da ai lam hpe na lu ai. Dai lam ni yawng gaw n-teng n-man ga ai. (4) Myu tsaw sai hpung ni a yaw shada lam hta kadai Ningbaw Ningla hpe mung asak hkra na masing n-nga ga ai. Wunpawng myu sha ni hpe jaw kaja ai hku woi awn yang madi shadaw mat wa na ga ai re lam n-dau shabra dat ga ai. (5) Ndai zawn byin wa ai lam mung Du Kaba La Sang Awng Wa a shamu shamawt ai lam shawng de na masing ni hte grai shai wa ai majaw gram sharai mayu nna 10-2-07 bungli hpe wa ai hpe mung n-dau shabra dat ga ai. (6) Du Kaba La Sang Awng Wa gaw lai wa sai shata hta machyi ai nga n-htawm lawu Myen Mung rai nga ai Mandalay de tsi tsi yu ai nga nna Nepyidaw de sa n-htawm Myen Asuya hpe lak-nak tsep kawp ap kau na matu myit hkrum kau sai lam (Myen Jarit shabrai balik Du Kaba hkam la kau sai lam) Wunpawng Myusha ni chye na hkra n-dau shabra dat ai. (7) Ndai zawn myu tsaw sai nnan hpe hpaw hpang wa ai lam gaw Du Kaba La Sang Awng Wa hpe sat na matu n-rai, shi a buga gaw sharawt ai myit hpe gang let ting gyeng magam bungli ni hpe galaw nga ai lam chye lu ai majaw dai lam ni hpe shading sharai na matu hpaw tawn da ai lam she rai. (8) Du Kaba La Sang Awng Wa Ningbaw kaja langai rai yang shi a n-pu na Du Gam Hpang woi awn ai myu tsaw sai hpung ni hpe gwi wa gyit gyit wa rawng ai lam nga na n re. Prinem htap htuk ai hku hparan ya lu na rai nga ai. Lama na shi nan n lu hparan na zawn rai wa yang mung Wunpawng Rapdaw de hparan shangun mai nga ai. Maigan amyu ni hpe kam n ra ai. (9) Anhte myutsaw sai hpung ni hpe rim ai lam hpe yu yang Du Kaba La Sang Awng Wa maigan amyu ni hte pawng mat sai lam dan leng nga ai. Du Kaba La Sang Awng Wa Wunpawng myu sha ni a ntsa sadi run ai wa nga ai hpe yawng chye nga sai. (10) Anhte myutsaw sai hpung ni gaw Myen wa a lagaw lata tai jarit sin (pyada) gaw n-ga law lu ai. Anhte myu tsaw sai hpung ni gaw moi n nan kaw nna ya du hkra grin nga ai Kanu Kawa rai nga ai K.I.A (K.I.O) de mara yin la let wa na hpe myu sha ni chye na hkra n-dau shabra dat ga ai. (11) Gyin chyum hku nna myu sha ni hpe chye na shangun ai lam gaw Wunpawng myu sha ni hpang de n-teng n-man ai shiga shaje ni hpe kam shut ai majaw shada da sai ging hka gingran rai wa na hpe n ra sharawng ai myit hte ndai zawn sang lang n-dau shabra dat ga ai.
MYU TSAW SAI HPUNG NI A YAWN SHADA LAM
(1) Anhte myu tsaw sai hpung ni gaw Wunpawng myu sha ni a ntsa galoi mung sadi n-run na ga ai. (2) Anhte myu tsaw sali hpung ni gaw myu sha ni hpe lam woi dam nga ai Ningbaw ni a n-pu hta galoi mung magam n lu gun ai. (3) Anhte myu tsaw sai hpung ni gaw Wunpawng myu sha ni hpe lam woi dam nga ai Ningbaw ni hpe mung, amyu hpe tsaw ai Ningbaw gaja ni bai byin wa hkra shakut na ga ai. (4) Karai n hkrit, ari n hkrit Mungkan pyaw hpa lam, Mungkan sutgan, Mungkan arawng sadang hpe sha ra marit nna amyu sha ni a ntsa sai chyup nga ai ningbaw ni sha nga nga ding sa gaw Wunpawng Mungdan rawt galu kaba na lam byin wa na n re. (5) Wunpawng Mungdan kata na Ja, Hpun, N lung, Nhprang sutgan ni sha ma mat na re. Wunpawng Mungdan kata na myu sha ni gaw maigan myu ni a n-pu na lawt lu na lam n nga na re. (6) Anhte myu tsaw sai hpung ni a yaw shada lam gaw Wunpawng Mungdan myu sha ni tsawra ai asak rawng ai K.I.A, Asuya langai sha byin wa na hpe myit mada let yaw shada ai lam re. (7) Hpa majaw ndai yak la ai lam hpe yaw shada ai gaw Bum langai, Du langai sha nga nga ding sa gaw Wunpawng Mungdan bai lu la na lam n nga ai majaw yaw shada ai lam re. (8) Wunpawng myu sha ni myit hkrum ai shani du na matu gaw Wunpawng asuya langai sha bai byin wa ai shani sha rai na re hpe kam let yaw shada ai lam re. (9) Wunpawng Mungdan Asuya langai sha bai byin wa shani gaw Wunpawng Mungdan bai lu hpyi la ai shani re ngu kam ai. Hpa majaw nga yang maigan amyu ni a man hta Wunpawng nga nna lata gwi gwi lata sharawt lu ai shani bai du lu sai majaw re. (10) Asuya langai sha rai yang Ningbaw langai sha rai na. Ningbaw langai sha rai yang Wunpawng myu sha ni myit hkrum lam langai sha rai wa na hpe mung kam ai majaw ndai zawn yaw shada wa ai re. (11) Anhte myutsaw sai hpung ni a yaw shada ai lam gaw lam dam nga ai wa hpe lam kaja de bai woi wa na. Masha langai a asak hpe majoi sat na masing n nga ai. Wunpawng myu sha ni a man hta sagu hpyi hpun ai jahkyawn zawn sakse n hkam gwi ai. (12) Anhte myutsaw sai hpung ni a yaw shada lam hta shut shai ai lam nga yang mung mara raw let hpaji jaw la rit ngu Wunpawng myu sha ni hpang de anhte myu tsaw sai hpung ni a yaw shada lam hpe n-dau shabra dat ga ai.
Galoi Mung grin nga let, Myutsaw Sai Hpung Komiti
|