Madi yang hte Nam San Yang lapran Mawdaw galau, masha si

Knet; February 17, 2007

Laiza hte Myitkyina lapran kagat ai, Ko La Shwe ngu ai wa gau nna, marai 9 hte kaga malu masha arung arai ni hpe htaw let Myitkyina de yu wa ai Bus, Modaw No. 3(hkahkwe)/ 5460 gaw lai wa sai February shata 15 ya shana maga hkying 6:00 Pm daram aten Madi yang hte Nam San Yang lapran hta galau ai majaw masha si ai du hkra laja lana rai hkala nba hkrum ai lam chye lu ai.

Ndai zawn galau ai hta, lam hka-ang du hkra kapat jahkring tawn ai Modaw hpe yen ai majaw, Pe 30 jan sung ai hkaraw de hkrat mat ai re lam chye lu ai.

Ndai zawn Galau ai majaw num kasha langai gaw galau ai hta nan si lawm, ngam ai ni mung laja lana rai hkala nba hkrum ai majaw Myitkyina Tsi Rung Kaba de htaw mat wa sai re lam hpe na chye lu ai.

Dai ni na ten du hkra, hkala hkrum ai kaw na mung marai 2 si sai lam, modaw driver hpe gaw Myen Asuya Balik Dap kaw na lit la hparan sa mat wa na re lam na chye lu ai.