Mung Hpawm Myen Mung Rapdaw Zuphpawng Dat Kasa Hkap Hkalum Hpawng Galaw

Knet; January 14, 2007

General (Dr) Manam Tu Ja woi awn ai KIO, Munghpawm Myen Mung Rapdaw Zuphpawng, Dat Kasa marai (5) hpe Hkap Hkalum Hpawng hpe Laiza Muklum hta shana de hkying 3:00 Pm kaw nna 5:00 Pm lapran galaw ai lam hpe chye lu ai.

Ndai Zuphpawng hta Ginjaw Salang ni, Ginjaw Magam Dap/ Makan Dap shagu na Hpu-awn kaji/ kaba ni, Nawku Hpung shagu na Hpung woi ni hte Mung shawa masha yawng marai (500) jan sa du lawm ai lam hpe mung chye lu ai.

Zuphpawng Hpu-awn hku nna KIO Ninggawn Amu Madu Brigadier (Dr) Lahkyen La Ja woi awn mat wa ai lam hpe chye lu ai.

KIO Ningbaw Kaba Lanyaw Zawng Hra kaw nna Mung Hpawm Myen Mung Rapdaw Zuphpawng (National Convention-NC) hte seng nna Wunpawng Mungdan hte Myusha yawng a malai hpa majaw KIO shang lawm ai ngu ai lam ni hpe azin ayang tsun sanglang mat wa ai lam hpe chye lu ai. KIO woi awn nna NC shang lawm ai lam gaw tinang ra ai lam ni hpe tang madun na matu hte kaga amyu sha ni hte bawng ban jahkrup na matu re lam hpe chye lu ai. NC hta KIO sha n rai, NDA(K) hpung hte mung gara hku matut galaw sa wa na lam ni hpe laika hte shana bawng jahkrup hkat ai lam hpe mung chye lu ai. Lama wa NC kaw anhte n bawng ban lawm ai rai yang manang ni shanhte ra ai hku daw dan kau ya na re ai lam hpe Ningbaw Kaba Lanyaw Zawng Hra kaw nna tsun sang lang dan mat wa sai lam hpe mung chye lu ai.

General (Dr) Manam Tu Ja kaw nna shaning (13) ning na ai NC a lam hpe kadun dik ai hte sang lang dik ai hku tang madun sang lang mat wa ai lam hpe chye lu ai. Dr. Tu Ja tsun sang lang mat wa ai lam ni gaw NC hpe galaw na matu 1992 ning kaw nna Tara Hpaji Sara ni lawm nna NWT Asuya hkyen lajang nga sai re lam, Polisi (6) jahkrat ai kata hta woi galaw mat wa ai re lam, NC a kata hta Dat Kasa hpung (8) shang lawm na matu galaw da ai lam ni hpe tsun sang lang mat wa ai. KIO gaw Laksan saw shaga ra ai Dat Kasa hpung hta shang lawm ai lam, NC hpe hpang ai kaw nna 1996 ning, March (30) ya shani Numdaw-I hpe jahkring da ai lam, 2004 ning May (17) ya shani hpang ai Numdaw II kaw nna KIO shang lawm lai wa ai gaw 2006 ning December (29) ya shani du hkra re ai lam ni hpe tsun sang lang dan mat wa ai lam chye lu ai.

Ndai lang na NC Zuphpawng hta NYK Asuya kaw nna Ninggam (7) lawm ai Nephprang Masing (7 stage Road Map) ngu ai hpe n lang ai lam Mungdan a matu Shawng Man Lam Masan (7) ngu ai hpe 2003 ning May (30) ya shani galai shaming wa ai lam hpe chye lu ai.

KIO, Mung Hpawm Myen Mung Rapdaw Zuphpawng, Dat Kasa ni gaw Tinang KIO Ginjaw Komiti a matsun ai lam(2) a npu e n shut n shai galaw sa wa ai re lam, NC salang ni kalang bai hkrum na re hte Kaga kaw nna NC shang lawm ai Dat Kasa ni hpe March shata hta bai hkrum na re lam ni hpe tsun sang lang mat wa ai lam hpe chye lu ai.

Hpungdim hku nna, NC shang lawm ai a yaw shada ai lam, anhte n sa yang mung shanhte ra ai hku galaw na hpe tsang ra ai re majaw shang lawm ai gaw kaja dik ai lam rai nna ndai Lau Lau re ai hpe anhte grai chye ra ai lam tsun hpung dim mat wa ai lam hpe chye lu ai.

KIO, Munghpawm Myen Mung Rapdaw Zuphpawng, Dat Kasa Salang ni;-

(1) Du Kaba Dr. Tu Ja

(2) Du Kaba Lahpai La

(3) Sara Kaba Kumhtat Hting Nan

(4) Du Kaba Waw Hkyung Sin Wa

(5) Du Kaba Kumje Seng Naw

KIO, Munghpawm Myen Mung Rapdaw Zuphpawng, Dat Kasa ni

Du wa ai Salang ni hpe Mung Shawa, Dap Shawa kaw na hkap tau nga yang

KIO Ningbaw Kaba Lanyaw Zawng Hra kaw nna Hkalum ga shaga nga yang

Du sa ai myit su Du Salang ni

Du Kaba Dr. Tu Ja kaw nna NC hte seng nna tang madun sang lang dan nga yang