Sadung Bum Mare hta Mung Shawa ni hte Myen Pyada ni a lapran Mang hkang byin

Knet; Febuary 13, 2006

Laiwa sai February 11 ya shana aten hta K.I.O Laksan Up Hkang Ginra, Dap Ba -5 ginra rai nga ai Sadung Bum Mare hta Mung Shawa ni hte Myen Pyada ni a lapran mang hkang kaba langai byin wa sai lam na chye lu ai.

Ndai mabyin hte seng nna mare masha Sara Tu Nau tsun ai hta, “ Manghkang gaw shana hkring 10 jan hta byin wa ai. Hpai da sum nna wa ai Myen Pyada marai 3 gaw gumhpraw ( A Chyan a Hpan) galaw na matu Karaoke Seng de sa wa nna, Seng kaw nga taw ai asak 14 ning daram sha nga ai Jawngma marai 2-3 hpe gumhpraw hpyi ai, nlu hpyi jang gayet adup ai. Ni nawn ai mare masha ni sa wa jang she, dai Myen Pyada marai 3 gaw hprawng mat ai,” lam na chye lu ai.

Manghkang byin ai, hpang shani February 12 ya shani hta mare masha 200 jan Myen Pyada Rung de yen sa wa. Sa wa ai lam hta Hka.L.Ya-260 kawn (Tat Yin Mu) gaw yen sa wa ai mung shawa ni hpe (Tawng Ban) hpyi nyem let shawa zuphpawng woi galaw ai lam chye lu ai. Dai zuphpawng hta Sadung Mare (Myo Ne Hkwe Mu) Kyaw Tu hte Wai Maw (Hkayai Ye Min Gyi) ni sa du nna ndai mang hkang hte seng nna rap ra hkra hparan ya na hte gayet hkrum ai ni hpe mung tsi tsi ya na re lam matut chye lu ai. Ndai ginra e nga ai Myen Pyada ni hte kaga Myen Asuya masha ni pawng nna hpun lauban ni hpe Miwa gumhpraw hte Myen gumhpraw ( Sen 40) jan ( Da Mya Mya ) ai lam mi chyaw mu, mung masha langai dai zuphpawng hta tsun wa sai lam, Sara Tu Nau kawn matut chye lu ai.

Danai - Hting Shung Mawdaw lam Kaba galaw hpang wa jang she Myen Asuya Rung ni ndai ginra hta agajawng sha Rung jung wa ai lam rai nna, ndai ginra ni hta nga ai Myen Pyada ni hte Myen Asuya masha ni pawng let mung masha ni a ntsa ga baw amyu myu hte gumhpraw hta sha nga ai lam matut chye lu ai.