Ginjaw Hkamja Dap Amyu Shayi Zuphpawng

Knet; July 21,2007

July 20, 2007 ya, shana hkying 7:30 Pm aten Laiza, Woichyai Mungshawa tsi rung wang, gawk nu hta Ginjaw Hkamja Dap Amyu Shayi Zuphpawng hpe galaw lai wa sai.

Hpawng hta tsi jawng lung nga ai H.U magam gun ni hte Nursing Diploma jawng ma amyu shayi tsi sarama ni yawng marai 100 jan sa du lawm ai rai nna, Amyu Shayi Hpung Ginjaw (KWA) Ningbaw Malai Shanghtin Hkawn Tawng kaw nna sa du hpaji jaw mungga shaga ai lam chye lu ai.

Wunpawng Amyu Shayi Hpung Ginjaw (KWA) Ningbaw Malai shaga wa ai mungga hta, “ Mungkan hta myu shayi ni ahkyak ai lam, dai kaw anhte Wunpawng Myu Shayi ni grau ahkyak ai, grau shakut ra ai lam, hpa majaw nga yang, dai ni anhte anhte Wunpawng Myu Sha ni jahpan nlaw dik rai nga ai kaw, ana zinli amyu myu a majaw, Ka-ni a majaw ana ahkya kap si ma, majan prat galu let num ni sha dinghku lit la kashu kasha shangai shalaw bau maka, ana zinli hte asak gadun kanu kawa si shakram, gai daw gai da jahkrai n mai law ai hte hkamja bawng ring lam grai ning ra ai majaw rai nga ai. Ndai zawn re ahkyak nga ai ten hta, myu masha jahpan law hkra, mare buga mungchying masha shangai chyinghkai lam, bau maka lam hpaji jaw tsi lajang hkaw tsun nna, myu mayat zet let bawng ring ai tsi sara law htam wa hkra magam gun tsi saranum ni a ahkyak ai lit rai nga ai. Ya ten anhte myu shayi ni hta gung lau ai lam law law nga ai, grau nna myu kaga jan n tai na, lam amyu sumhpa hte myu shayi ni hpe jahten nga ai, anhte chye nga ra ai, kanu kaja ni byin tai lu hkra anhte myu shayi ni shakut ra ai” nga n gun jaw hpa hpaji jaw mungga shaga lai wa sai.