KIO, Hkamja Dap kaw na hpaw ai Masat Yan (2) Nursing Diploma jawng yu

Knet; July 5, 2007

Dai ni, Wunpawng Mungdan Shanglawt Hpung (KIO), Hkamja Dap kaw nna lit la woi awn hpaw ai Masat yan (2) Nursing Diploma jawng yu hpawng hpe Laiza, Woi Chyai lawk, Mung Shawa Tsi Rung, Laiza Wunjat Gawknu hta galaw lai wa sai.

Hpawng hpe jahpawt hkying 10:00 Am aten hta galaw ai rai nna, KIO Ginjaw Salang ni, buga shagu jawngma ni a kanu kawa ni, Amyu Shayi Ginjaw rung magam gun ni, Ginwang Ginjaw shagu na myit su Du Salang ni hte Magam Dap shagu na hpa awn ni sa du dung lawm ai lam chye lu ai.

Shawng nna zuphpawng hpa awn Du Kaba Lamai Seng Hkum kawn hpawng mahkyen hpe ndau ngut ai hpang, Du Kaba Hing Wawm kaw nna hpawng hpaw hkalum mungga hpe shaga ai. Tsi Jawng Up Du Jum Lahtaw Myu Bra kaw nna tsi jawng yu sai tsi magam gun ni hkan sa ra ai tara hkam la hpawng hte Nursing Diploma jawng awng lek mat shagrau ya ai. Dai hpang dawn jan ningtawn ai, kasi la ging ai jawngma ni hpe kumhpa shagrau ya ai lam nga ai. Bai nna Laiza Mung Shawa Tsi Rung, Ningtau Tsi Rung Up, Du Kaba Htu Bu kaw na jawng yu ai Sara num ni hpe Nurse Cap gup ya ai.

Hkamja Dap Ningtau Lit Hkam Du Kaba N Hpang Naw Bu kaw nna Tsi sara ni hkan sa ra ai lam, galaw gun hpai sa wa na magam bungli ni hte seng nna lit jaw shatsam mungga hte, Mung Shawa kam hpa ging ai Tsi sara ni byin tai lu wa hkra lit jaw matsun maroi mungga shaga lai wa sai. Ningtau Ninggawn Amu Madu Du Kaba Nja Naw Rip kaw nna mung Myu Tsaw Masa, Democracy Masa, Mung Shawa nga mu nga mai lam ngu ai KIO a policy hte Hkamja lam ahkyak ai lam ni hpe kadun ai hku mungga jaw lai wa sai rai nna, zuphpawng hpa awn kawn zuphpawng hpungdim dat sai lam ndau ai hte, hpawng hpe hpungdim dat sai.

Shana hkying 7:30Pm aten hta jawng yu sai Sara Num/La ni a yu ngwi pinra hpe matut galaw sai lam chye lu ai.

Ndai Nursing Diploma jawng sharin ladaw hpe lai wa sai 2005 ning July shata 5 ya shani kawn dai ni du hkra lahkawng ning tup sharin ai hta jawng ma yawng 45 tup sharin awng la lu sai rai nna, sharin hpan hpe Myen mung hta sharin ai sharin hpan ma hkra hpe sharin ya ai re lam chye lu ai.

Du Kaba Htu Bu kawn jawng yu sai Sara num ni hpe Nurse Cap gup ya nga yang

Amyu Shayi Ningbaw Malai kawn ningtawn ai shayi sha hpe kumhpa shagrau nga yang

Hkamja Dap Ningtau Lit Hkam kaw nna lit jaw matsun maroi mungga shag nga yang