KIO& Jadeland Myanmar Co.LTD lam/mahkrai Komiti bungli ginchyum dat hpawng galaw
Knet; July 2, 2007 Lai wa sai June shata 29-30 ya shani Laiza Muklum, Sinpraw Majoi gawknu hta KIO& Jadeland Myanmar Co.LTD Lam/ Mahkrai Komiti bungli ginchyum dat zuphpawng galaw ai lam chye lu ai.
Zuphpawng hta KIO Ningbaw Kaba Lanyaw Zawng Hra, KIO Ginjaw Salang ni hte KIO& Jadeland Myanmar Co.LTD Lam/ Mahkrai Komiti malawm ni sadu ma ai. Shawng ningnan KIO Ningbaw Kaba Lanyaw Zawng Hra kawn hpawn hpawng mungga hpe shaga lai sai. Zuphpawng hta galaw la ngut sai lam/ mahkrai hte seng nna sanglang jahkrup lai sai.
KIO& Jadeland lam/mahkrai Komiti hpe 2002 ning hta hpaw hpang let lam/mahkrai magam bungli hpe galaw sa wa ai rai nga ai. 2002-2007 ning du hkra galaw la lu sai lam/ mahkrai ni gaw Man Maw- Myitkyina lam, Myitkyina- Tang Hpre lam, Gwi Htau- Hting Nan Lam, A Ye Zup- N-Jang Yang lam, Myitkyina- Sum Pra Bum- Putao lam, Ga Ra Yang- Sam Pai lam, Na Lung- Mali Hka No.1 Hka Gyip-Sin Bo lam, Hopin-Sin Bo lam rai nga ai. Ndai lam ni hta Ka noi lam (Kat-ta-ya lam) 26 miles, AC lam 11 miles, nlung nyep lam 68 miles, zai bru lam 79 miles, hpri mahkrai 191, hpun pyen mahkrai 33, hka shale shara 325, hpun pyen hka shale shara 26 galaw la ngut sai lam chye lu ai.
Ndai zuphpawng hta KIO& Jadeland lam/mahkrai Komiti hpe2007 ning June 30ya hta dawm kau na dawdan sai rai nna, matut galaw sa wa na rai nga ai lam/mahkrai magam bungli ni hpe Jadeland Co.LTD kawn lit la galaw sa wa na rai nga ai. KIO Asuya gaw, ra wa ai lam magup hta e mai mai byin ai made karum madi shadaw mat wa na re lam daw dan masai hpe chye lu ai.
30.6,2007 jahpawt daw e Laiza Muklum gawknu kaba kaw chyeju dum shagrau ging ai ni hpe KIO& Jadeland Myanmar Co.LTD lam/mahkrai Komiti hku nna shagrau kumhpa jaw ai lam, Jadeland Myanmar Co.LTD kaw na mung shagrau chyeju dum ging ai magam gun ni hpe kumhpa shagrau jaw let awng dang ai hte KIO& Jadeland myanmar Co.LTD lam/mahkrai Komiti bungli ginchyum dat zuphpawng galaw la ngut sai lam chye lu ai.
KIO Ningbaw Kaba Lanyaw Zawng Hra kawn hpawng hpaw mungga shaga nga yang 
KIO & Jadeland Myanmat Co.LTD lam/mahkrai komiti Ningbaw, Du Kaba Nban La kawn mungga shanga nga yang 
KIO & Jadeland Myanmat Co.LTD lam/mahkrai komiti malawm, Salang Tang Ji kawn galaw ngut sai lam/mahkrai magam bungli hpe tsun sang lang nga yang 
Zuphpawng hta du sa ai KIO Ginjaw Salang 
Zuphpawng hta du sa ai lam/mahkrai komiti salang ni
Photos by KNET. |
