KIO SARA TAI JAWNG MA NI HTE KIO HPAJI DAP NI MAN HKRUM BAWNG BAN HPAWNG GALAW

Knet; June 14, 2007

Mai Ja Yang Muklum sara tai jawng jawngma dingsa ni hte hpaji dap a man hkrum bawng ban hpawng hpe June 13, 2007 ya shani 10:00 Am kaw nna 6:00 pm du hkra Wunpawng Mungdan Shanglawt Hpung Uphkang Ginra Sinpraw Ginwang Mai Ja Yang Muklum Sara hpaji sharin jawng kaw galaw lai wa sai lam chye lu ai.

Zup hpawng hta,lai wa sai  10 ning laman na (ya shara shagu de jawng saara magam gun taw nga ai ) jawngma dingsa 200 jan shang lawm nna,ginjaw hpaji dap lit hkam Sara Kaba Sumlut Gam woi awn let hpaji du ni yawng shang lawm ai let hpawng lai wa sai.

Bawng ban tang madun ai lam hta; jawngma dingsa ni kaw nna hkrum katut ai n-gun lu hpa lam, mayak mang hkang lam, kabu hpa lam,yawn hpa lam, hte hpaji du ni a gawng kya ai lam, n-gun dat ai lam ni hpe asan brang lang tang madun jahkrup mat wa sai rai nga ai. Grau nna KIO hpaji dap gaw myen asuya hpaji dap a kata de du wa magang nga sai lam ni hpe tang madun mat wa ai lam chye lu ai.

Tang madun mat wa ai lam yawng hpe Hpaji Dap Lit hkam, Ningtau Lit hkam hte Amu madu ni kawn myit galu galang hte woi awn jahkrup mat wa sai lam chye lu ai.