K.I.O Share Shagan Masat n'htoi hpe madi shadaw ai gawdin shingjawng hpaw poi galaw

Knet; July 11, 2007

2007 ning, July shata praw (10) ya shana de daw, hkying (3:00) aten hta Laiza Muklum Gawdin Ginsup woi awn komiti kaw na woi awn ai, gawdin shingjawng hpaw poi hpe Laiza Muklum, Zup Awng Gawdin Ginsup pa e, galaw ai lam chye lu ai.

Ndai gawdin shingjawng poi a yaw shada lam gaw, K.I.O Share Shagan Masat N'htoi hpe madi shadaw ai ginsup lamang rai n-na, zuphpawng hpa-awn hku nna Ginsup Woi Awn Komiti Amu Madu kawn zuphpawng mahkyen hti ndau ai hpang, Ginsup Woi Awn Komiti Ningbaw, Salang Kaba Latau Tu Rin kaw nna hpawng hpaw mungga shaga ya sai. Dai hpang, Mungchying Uphkang Dap, Laiza Muklum Uphkang Du kawn shatsam mungga shaga ai lam chye lu ai.

Ndai shingjawng poi hta, ginsup ninghkring hpung (5) Shanglawm shingjawng na rai nna, (A) hpung hta Laiza lawk 2 ni;(B) hpung hta Laiza lawk 3 ni; (C) hpung hta Laiza lawk 4 ni; bai nna Lawa Yang mare hte Laja Yang mare pawng hpawn nna (D) hpung; Laiza lawk (1) hte Laiza lawk (5) pawng hpawn nna (E) hpung ngu masat da ai lam chye lu ai. Dai hpang ginsup ninghkring hpung ni rai nga ai Laiza lawk 2 (A) hpung hte Laiza lawk 3 (B) hpung kawn hpawng hpaw ginsup hpang ai hta maga mi Goal (4) hpra rai maren ren hte ngut mat wa sai lam chye lu ai.

Ndai gawdin shingjawng poi hta Tau Dap Awn Daju Dukaba Hpunggan Zau Nan hte magam dap,makan dap shagu na myitsu Du Salang ni hte mungshawa masha ni wu wu di di rai sa yu n'gun jaw ai lam chye lu ai.

Dai hpang, July shata (12) ya shana de hkying (3:30) aten hta C hpung hte D hpung, (14) ya shana de hkying (3:30) aten hta A hpung hte E hpung,

(16) ya shana de hkying (3:30) aten hta B hpung hte C hpung,

(18) ya shana de hkying (3:30) aten hta D hpung hte E hpung,

(20) ya shana de hkying (3:30) aten hta A hpung hte C hpung,

(23) ya shana de hkying (3:30) aten hta B hpung hte E hpung,

(25) ya shana de hkying (3:30) aten hta A hpung hte D hpung,

(27) ya shana de hkying (3:30) aten hta C hpung hte E hpung,

(30) ya shana de hkying (3:30) aten hta B hpung hte D hpung, hpra rai hpung hte hpung, tsang hte tsang, Ninggang kashun ginsup shingjawng sa wa na lam chye lu ai.