Langai lang na Myitkyina Ginwang MCC ramma ganawn mazum nawku dawjau hpawng galaw

Knet; July 30,2007

2007 ning July 29 ya shani hta Myitkyina, Du mare hkalup hpung nawku jawng hta Myitkyina Ginwang Nawku hpung shagu na ramma ni a ganawn mazum nawku dawjau hpawng galaw ai lam chye lu ai.

Ndai nawku dawjau hpawng hpe shani hkying 2:30pm hta galaw hpang sai. Shawng n'nan Sara Hawng Hkawng kawn du sa ai hpung shagu na ramma ni hpe hkap tau hkalum mungga shaga sai. Sara Hawng Hkawng tsun ai hta, " n'dai ramma ganawn mazum nawku dawjau hpawng galaw ai yaw shada lam gaw, anhte nawku hpung n'bung ai wunpawng ramma ni hta hten za taw nga sai ramma, n'hten za shi ai ramma, kaja ai ramma hte n'kaja ai ramma ni yawng, shada da n'ging hka ai sha karai kasang man hta rau gahkyin gumdin ta gin dun let nawku dawjau lu na matu yaw shada let galaw sa wa ai," re lam chye lu ai.

Fr.Peter Nhkum kawn du sa ai hpung shagu na ramma ni hpe karai mungga hte n'gun jaw sai. Sara. Daw Ma Nic kawn hkum tsup akyu hpyi sai. Myitkyina Ginwang MCC Ningbaw Rev. Zung Chyang kawn nawku hpung shagu gaw karai man hta rau langai sha re ai lam hte, MCC hte seng nna chye la ging ai lam ni hpe tsun lai sai. Dai hpang Myitkyina Ginwang MCC ramma woi awn komiti lithkam Shadang La Nu kawn du sa ai hpung shagu na ramma ni hpe chyeju dum ai lam hte MCC ramma woi awn komiti kawn shawng lam hta galaw sa wa na rai nga ai magam bungli ni hpe shana sai. Du sa ai ramma ni nawku shakawn mahkawn hpe rau jawm hkawn ngut ai hte Fr. Peter Nhkum kawn shaman ya let nawku hpawng hpe hpung dim dat lu sai.

Ndai ramma ganawn mazum nawku hpawng hpe MCC ramma woi awn komiti kawn lit la galaw ai rai nna nawku hpung (8) kawn ramma marai 800 jan sa du nawku lawm ai lam chye lu ai.

Sara Hawng Hkawng kawn hkalum mungga shaga nga yang

Rev. Zung Chyang kawn MCC hte seng ai lam tsun dan nga yang

Choir hte nawku shakawn

Du sa ai hpung shagu na ramma ni

Du sa ai hpung shagu na ramma ni

Du sa ai hpung shagu na ramma ni

Rau sha nawku shakawn mahkawn nga yang

Fr. Peter Nhkum kawn shaman ya

Photos by, KNET.