Ningbaw Kaba Lamung Tu Jai hpe myit dum ai nawku kyuhpyi hpawng galaw

Knet; June 15, 2007

Nnga mat wa sai KIO Tingnyang Up, KIC Ningbaw Kaba, KIA Dap Up Daju, Share Munu Du Daju Jum Lamung Tu Jai hpe myit dum ai nawku kyuhpyi hpawng hpe dai ni hkying 10:00 Am aten Lai Za Muklum shi nga lai wa sai dum nta hta galaw ai lam chye lu ai.

Myitdum akyu hpyi hpawng lamang hpe Ningbaw kaba a ngam nga ai dum nta masha ni lit la let woi galaw ai rai nna, Jinghpaw htunghking hte maren ngam nga ai dum nta masha ni, mayu dama makin jinghku ni, Wunpawng Mungdan Shanglawt Hpung (K.I.O) Tingnyang Up Ningbaw Kaba Lanyaw Zawng Hra hte Ginjaw Salang ni, mung shawa dap shawa ni, hpung shagu na hpung woi sara ni sa du lawm ai lam chye lu ai.

Ninbaw Kaba Lamung Tu Jai gaw 2006 ning June shata 15 ya shani, Sinda Mawng ana a majaw Miwa mung, Yunan Mungdaw, Mangshi Tsirung hta tsi tsi lajang nga yang, asak hkye la lu na lam nnga wa ai majaw tinang kanu Mungdan, Lai Za dum nta de woi yu wa ai hkrun lam lapran, asak 77 ning hta asak wundoi mat sai rai nga ai.

Nnga mat sai Ningbaw Kaba Lamung Tu Jai gaw Rawt Malan Shamawt lam hta, 1960 ning October 25 ya shani, KIO hpung shang langai hku, tara shang ta masat ka n'htawm, Sinli Mare ginra ni hta K.I.O a gahkyin gumdin magam lit hpe gunhpai woi awn shamu mawt galaw sa wa sai rai nna 2006 ning du hkra shaning 47 ning tup magam gun lai wa sai hte Wunpawng Mungdan Shanglawt Hpung (K.I.O) Tingnyang Up, KIC Ningbaw Kaba, Dap Up Daju (Cin C) magam lit hpe 2001 ning February shata kaw nna 2006 ning June shata 15 ya shani du hkra gun hpai lai wa sai rai nga ai.