SARA HPAJI SHARIN JAWNG (10) NING HPRING MASAT POI GALAW

Wunpawng Mungdan Shanglawt Hpung (KIO) a lak san uphkang ginra, Sinpraw Ginwang Ginjaw, Mai Ja Yang Muklum hta sara hpaji sharing jawng hpaw ai (10) ning hpring masat poi hpawng hpe dai ni galaw ai lam chye lu ai.

Dai hpawng hta Wunpawng Mungdan Shanglawt Hpung (KIO), Ginjaw Komiti Tingnyang Up Malai (I) Lat Du Daju Jum Du Kaba Gauri Zau Seng hte Ginjaw Salang nkau, KIO Ginjaw Hpaji Dap lit hkam hte Salang ni, Sinpraw Ginwang Ginjaw kata magam dap makan dap shagu na myitsu Du Salang ni, makam masham shagu na hpung woi salang ni, Mung shawa myit su salang ni, shara shagu na saw shaga da ai magam gun Sara ni, magam gun Sara usa ni Miwa gumsan mungdan, Lungchawn ginwang kaw na du sa ai Salang ni yawng marai 1000 daram sa du ma ai.

Hpawng hpe dai hpawt hkying 10:00 kaw nna galaw hpang ai rai nga ai. Hpawng hta Zuphpawng Tingnyang Up Salang Kaba Langjaw Yaw kawn hpawng hpaw mungga hte hkalum mungga shaga ngut ai hpang Ginjaw Hpaji Dap lithkam Sara Kaba Sumlut Gam kaw nna Sara Hpaji Sharin Jawng hte seng ai magup sumhpa mungga shaga ai. Hpaji Dap lithkam shaga ai mungga hta, "Ndai jawng hpaw ai gaw hpaji chye ai hkum tsup ai amyu masha byin tai lu na matu, Mungdan masha ramma yawng tsang 10 awng let hpaji chye na matu re lam", ya hpaw tawn ai sara lawu tsang hpaji sharin jawng hpe lapran tsang sara hpaji sharing jawng atsang du hkra galaw lu na matu myit tawn ai lam hte jawng hte seng ai magup sum hpa hpe tsun sanglang ai. Bai nna lai wa sai ten hta magam gun wa ai sumtsan de na du sa ai magam gun usa Saranum/la Kaba ni, jawng nnan hpaw ai ten kaw nna dai ni du hkara ding yang aten nhprai magam gun nga ai magam gun jawng sara ni hpe shagrau sha-a masat kum hpa shagrau jaw ai lam nga ai.Dai hpang Ginjaw Komiti Tingnyang Up Malai (I) Du Kaba Gauri Zau Seng, Ginjaw Komiti Ninggawn Amu Madu Du Kaba Dr. La Ja, Saranum Kaba Maran Hkawn Lum ni kaw nna mung hpaji jaw shatsam mungga ni shaga lai wa sai.

Ndai jawng gaw lai wa sai 1997 ning June shata praw 1 ya shani kaw na hpaw hpang ai re. Ndai jawng hpaw ai hta KIO Ginjaw Komiti a lam woi jasat jasa ai masing kata yak hkak ai lapran tinang KIO kata ja gumhpraw hte shinggan NGO kaw na garum ntum hpyi shawn let Amyu Sha, Mung Shawa ni laika hpaji chye wa lu na matu yaw shada galaw hpaw wa ai rai nna, dai ni du hkra rai yang ndai jawng hta sharin mat wa ai jawngma yawng marai 565 tup rai sai lam chye lu ai. Shana hkying 7:00 aten Sara Hpaji Sharin jawng (10) ning hpring masat poi yu ngwi pinra hpe mung matut galaw ai lam chye lu ai.

Hpaji Dap Lit Hkam kawn mungga shaga nga yang

Du Kaba Gauri Zau Seng kaw nna mungga shaga nga yang

Sara tai jawngma ni kawn mahkawn shakawn nga yang