(8) Lang Na Wunpawng Mungdan Amyu Shayi Hpung Komiti Hkumra Zuphpawng

Knet; March 22, 2007

(8) lang na Wunpawng Mungdan Amyu Shayi Hpung Komiti Hkumra Zuphpawng hpe Laiza Muklum, Amyu Shayi Ginjaw Rung hta dai ni hkying 7:30 Am aten kaw nna galaw hpang wa sai lam chye lu ai.

Zuphpawng hpe Hpung Up Sara Tu San kaw nna karai kasang hta akyu hpyi ap nawng shaman ya ai hte hpawng hpang sai. Wunpawng Mungdan Amyu Shayi Hpung Ginjaw Komiti Ningbaw Hpawmi Nahpaw Kaw Mai kaw nna du sa ai tsang hte tsang na Komiti Salang Kanu Kana ni hpe hkalum mungga hte shatsam mungga jaw ai. Dai hpang Ginwang Ginjaw shagu na Komiti Tsang hte tsang ni hku nna 2005- 2006 ning ladaw laman hta galaw lai wa sai sumtang ni hpe tang madun ai rai nna dai ni na hpawng hpe hpungdim dat sai.

Ndai Zuphpawng hta Wunpawng Mungdan kata ginwang, ginwang daw, Ninghtawn hte laksan ginwang rai nga ai Sadung hte Laiza, mare buga shagu na Komiti tsang hte tsang ni yawng marai 100 jan sa du lawm ai rai nna Zuphpawng hpe ndai shata 28 ya shani du hkra galaw mat wa na lam chye lu ai.

Zuphpawng hta Wunpawng Mungdan Amyu Shayi Hpung kata Komit shagu na 2007-2008 ning hta galaw sa wa na masing ni (1) Amyu Shayi Magam bungli masing (2) Ma Shapan Jawng Masing (3) Ma Kanu ni hte Ma kaji ni a hkamja lam hte hpaji jaw ra ai lam ni (4) Nang Hpam lu sha hte HIV, AIDS ning hkap na lam (5) Rep Chywi Wunkat, Ri da maka masing (6) Wunpawng Amyu Sha ni a masat dingsat ninghtoi ni (7) Wunpawng Htunghking jai lang ai lam (8) Wunpawng Amyu Shayi ni, tinang a Amyu Sha lam yan hte mung masa a ntsa tang madun mayu ai lam ni hte lak san bawng ban mayu ai lam ni hpe bawngban jahkrup mat wa na re lam matut chye lu ai.

Hpung Up Sara Tu San kawn zuphpawng ap akyu hpyi nga yang

Wunpawng Amyusha Dawnghkawn hpe hkungga jaw nga yang

Wunpawng Amyusha Dawnghkawn hpe hkungga jaw nga yang

Amyu shayi ginjaw komiti ningbaw Hpawmi Nahpaw Kaw Mai kawn hkalum mungga shaga nga

Du sa ai ginwang shagu na tsang hte tsang komiti salang kanu kana ni

Photos by KNET.