15 LANG NA, WUNPAWNG MUNGDAN SHANGLAWT HPUNG (KIO) GINJAW KOMITI HKUMRA ZUPHPAWNG NDAU SHABRA LAIKA

Knet; October 20, 2007

1. (15) lang na Wunpawng Mungdan Shanglawt Hpung Ginjaw Komiti Hkumra Zuphpawng hpe 2007 ning October (15) ya shani kaw nna 2007 ning October (20) ya shani du hkra Laiza Muklum e awng dang ai hte galaw la lu sai.

2. Munghpawm Myanmar Mungdan a mungbawng zuphpawng (National Convention) hpe 2007 ning September (3) ya shani galaw shangut sai hte, Mungdan a Ningpawt Ninghpang Gaw da ai Tara (Constitution) ka lajang Komishin hpe 2007 ning October (18) ya shani hpaw ninghtan dat sai lam chye lu ai. Ndai Komishin kaw nna Ningpawt Ninghpang Gaw da ai Tara hpe ka lajang sa wa ai shaloi Rudi amyu sha (Ethnic Nationalities) ni myit mada ra sharawng ai lam ni hpe ka bang shalawm ya na gaw ahkyak dik htum rai nga ai.

3. Mungkan Wunpawng Hpung (United Nations) kaw nna Munghpawm Myanmar Mungdan a manghkang hpe shada hkrum bawng ban nna hparan la lu na matu ladat shaw sa wa ai lam ni hpe hkap tau madi shadaw ai.

4. Munghpawm Myanmar Mungdan kata amyu sha ni yawng rap ra ai ahkaw ahkang lu nna simsa ngwi pyaw nga na hpe ra sharawng ai lam hte byin paw pru wa ai mang hkang ni hpe si mani ai ladat hte hparan sa wa na matu htingbu Miwa Gumsan Mungdan kaw nna n-gun jaw nga ai lam gaw mai kaja ai lam rai nga ai.

5. Tinang KIO gaw Munghpawm Myanmar Mungdan hpe jet ai Munghpawm hkrang hte gaw de nna amyu sha mungdaw ni hta tinang gam maka tinang daw dan hparan lu ai ahkang aya hte Rudi amyu sha ahkaw ahkang (Rights of Ethnic Nationalities) hpring tsup lu na hpe dinggrin dingnawng ra sharawng shatawng shada nga ai.

6. Jet ai Munghpawm Mungdan gaw de sa wa ai hta grau masan sa ai hku galaw sa wa lu na hpe yaw shada let tinang KIO gaw htap htuk ai aten hta htap htuk ai hku nna KIO ngu ai mying hpe galai shamying lang sa wa lu na matu Wunpawng Amyu sha Mungbawng Rap Daw hta mung, mungchying mungshawa ni hte mung matut bawngban nna daw dan shagrin la sa wa na.

GINJAW KOMITI

WUNPAWNG MUNGDAN SHANGLAWT HPUNG