UPHKANG DU NI A HKAI REM HPAJI SHARIN YA AI MAJAT WUNKAT YU HPAWNG GALAW

Knet; October 10, 2007

Wunpawng Mungdan Shanglawt Kongsi Ningbaw Malai Lat Du Daju Jum Nban La kaw nna hkum dingnum, chyip makup hpaji jaw mungga shaga nga yang

Wunpawng Mungdan Shanglawt Asuya, Ginjaw Hkai Rem hte Nam Maling Gawn Hkang Magam Dap (HKRM) kaw nna galaw ai Mungchying Uphkang Dap, Uphkang Du Ni a Hkai Rem Hpaji Sharin Ya ai Majat Wunkat Yu Hpawng hpe Lahta Tsang Hkai Rem Hpaji Sharin Jawng (Agricultural Training School), Awng Ja Mare hta jahpawt hkying 10:15 kawn galaw ai lam chye lu.

Zuphpawng hta Wunpawng Mungdan Shanglawt Kongsi Ningbaw Malai, Lat Du Daju Jum Nban La, Wunpawng Mungdan Shanglawt Hpung Ginjaw Komiti Salang rai nga ai HKRM Lit Hkam, Du Daju Zawng Buk Htan, Mungchying Uphkang Dap Lit Hkam, Salang Kaba Lajawng Hkawng Lum, Ginjaw Buga Gaw Sharawt Magam Dap Lit Hkam, Du Up Jum Nbang Bum Sin Wa, Wunpawng Myu Shayi Hpung Ginjaw Komiti Ningbaw Hpawmi Hpaure Hkawn Ja, Ningbaw Malai Hpawmi Shanghtin Hkawn Tawng, kaga Magam Dap Makan Dap na Du, Salang ni, Nawku Hpung woi ni, Awng Ja Mare na mare Komiti salang ni hte Myen Asuya Laja Yang Makyit Mahkai Rung na salang ni, du sa ai masha yawng marai (200) daram dai hpawng hta sa du n-gun jaw kabu lawm ai lam chye lu ai.

HKRM Lit Hkam, Du Daju Zawng Buk Htan kaw nna numhet numra mungga shaga nga yang

Dai hpawng hta Wunpawng Mungdan Shanglawt Kongsi Ningbaw Malai Lat Du Daju Jum Nban La kaw nna hkum dingnum, chyip makup hpaji jaw mungga shaga la ai lam chye lu ai. Ningbaw Malai tsun ai hta anhte Wunpawng Amyu sha ni matsan nga ai lam gaw hkai rem ladat hpaji ningra ai, mungding galaw lu galaw sha ai ladat a majaw, tsam mari mara di nna lu la ai n law n la re ai nai-mam, dusat yamnga ni hpe hkun hkraw ai aten du wa jang rung shingra, lamang ni galaw, daw lu daw sha ai lam ni hta shama kau ai majaw matsan nga ai re lam; mungding galaw lu galaw sha ladat hte ya na prat dep hkai rem ladat hpe gayau lang ra ai lam, yi langai galaw yang hkai nmai hpan law law hkai matsut bang nna madung hkai nmai (mam) pru madang n law ai lam, Mungchying masha law malawng, tsa hta 40 sha yi sun atsawm galaw nga ai lam, ngam ai 60% gaw shani shagu chyang sha ai lam ni hpe tsun dan mat wa ai lam chye lu ai.

Bai nna, Ningbaw Malai a mungga hta Uphkang Du ni gaw Mung shawa hte ta tut ni gatep let ganawn mazun sa wa nga ai ni re majaw hkai rem ladat hpaji chye da ra ai lam hte sharin la lu ai hpaji ni hpe lata tut hkrang shapraw, kasi madun mat wa na lam ni hpe mung Wunkat sharin hkam la ngut sai Uphkang Du ni hpe numhtet numra dat ai lam chye lu ai. Shi a mungga hta ya yang byin nga ai Ramma nkaumi a kasu gabrawng lam hte daini na KIO woi galaw sa wa ai mung masa lam ni hpe mung gadun ai hku tsun sanglang mat wa ai lam chye lu ai.

Dai tsun sang lang mat wa ai lam hta KIO gaw Myen Asuya woi galaw ai Mungbawng Zuphpawng (National Convention) ngut sai lam hte teng man ai Mungdan a Ningpawt Ninghpang Gaw Da Tara (constitution) pru wa na matu madi shadaw ai she re; ya ka dai ai tara hpe madi shadaw ai mung n ngu ai, anhte tang shawn da ai lam ni pru wa na hpe madi shadaw nga ai lam, dai n lu dingsa Saboi ntsa kaw lang lang dara sa wa na re lam, masha ni gabrawng shagu gabrawng lawm ai baw n re lam hte KIO gaw sung sung myit diklik, sawn maram yu nna lai wa sai aten na zawn mung shawa hpe machyi hkra ai lam n byin hkra jaw ai lam hku ding yang woi galaw sa wa ai lam ni hpe tsun sanglang mat wa ai lam chye lu ai. Matut nna, Wunkat shang lawm hkaja ngut sai Uphkang Du ni hpe Wunkat Yu Lakmat hte kumhpa shagrau shatsam ai lam ni hpe mung galaw mat wa ai lam chye lu ai. Ginjaw Hkai Rem hte Nam Maling Gawn Hkang Magap Dap Lit Hkam, Du Daju Zawng Buk Htan kaw nna chyeju dum, numhtet numra ga shaga ai hte hpawng hpe jahpawt hkying 11:30 hta ngut kre la lu sai lam chye lu ai.

Wunpawng Mungdan Shanglawt Kongsi Ningbaw Malai Lat Du Daju Jum Nban La kaw nna Hkai Rem Arung Arai Dut Seng Hpaw Pan Grang Rep di nga yang

Dai hpang, Wunpawng Mungdan Shanglawt Kongsi Ningbaw Malai a shatsam ai lam hte maren Ginjaw Hkai Rem hte Nam Maling Gawn Hkang Magam Dap kaw nna Mung shawa a matu hkai rem arung arai ni hpe manu mai ai hku dut garan jaw lu na matu, Myitkyina-Manmaw lam kaw galaw da ai Awng Ja Kasi Madun Sun hta “Hkai Rem Arung Arai Dut Seng” hpe Nambat langai lang hku nna hpaw dat ai lam, dai seng hpaw ai hta hpung woi ni akyu hpyi ya ngut ai hte Ningbaw Malai kaw nna pan grang rep di shaman ya ngut ai hpang seng hta dut shale ya na Hkai Rem arung ni hpe yu shatsam mat wa ai ai lam chye lu ai. Dai hpang shana de hkying 2:30 daram hta Laiza de ginhtang mat wa ai lam chye lu ai.

HKRM Kasi Madun Sun hte Noikret (Rubber) bawng ni ndai zawn kaba wa nga

KNET.