Kachin News Group (KNG) de hpaji jaw dat ai

Mungkan prat madang tsaw mat wa ai hta hkan nna prat lep hpuntang hpaji hte shiga, news, media hpe ahkyak kaba, bungli kaba shatai nna akyu jashawn ai prat rai nga sai. Wunpawng amyu masha ni n lang mung n dai prat madang hta hkan kabye tsap lu ai ni grai law wa nga sai. Kabu n gun lu, myi man pa, arawng la shara rai nga mali ai.

Kachin News Group (KNG) kaw nna shapraw ai shiga ni hta e nteng nman ai shiga, shut ai shiga ni law pru nga ai hpe mu ai. Kalang lang shut ai sha rai na re ngu myit nna zim tawn kau ai. KNG shapraw ai shiga hpe ayan hkan hti ai KNG shiga hti masha langai mi hku nna, dai zawn n jaw ai lam, n teng ai lam matut manoi ka shapraw ai hpe gram sharai la shangun mayu ai shawang myit hte hpaji jaw ka dat ai rai nngai. Shiga bungli, reporter bungli, media bungli, journalism bungli ni hta myit lawm sharawng awng ai, galaw shakut ai gaw grai kaja nga sai, raitim hpaji hte galaw ra nga ai re majaw, sharin hkaja la nna galaw ai rai yang grai manu dan na rai nga ai. Shiga hti masha ni a matu mung grai akyu nga na rai nga ai.

Ndai nhtoi laman e n teng n man ai shiga, shut ai shiga ni matut manoi ka shapraw nga ai hpe mu hti ai.

(1) KNG a September 27, 2007 “ Kachin jade tycoon arrested for offering water to monks” ga baw hte ka shapraw ai hta, Jinghpaw Academy Limited Lung seng hpaga company woi hpaw hpang ai Lung Seng hpaga la Sut Du Bum Yun hpe September shata 26, ya shana 10:00 Pm-11:00 Pm lapran shi a Myitkyina, Shata Pru nta kaw Military Affairs Security (Sa-ya-pha) ni sa rim la hkrum sai nga nna shiga ka shapraw ai. Shiga mu hti ai ni grai myit npyaw, myit tsang ai hte san sagawn hkat yang Sut Du Bum Yun rim hkrum ai lam n teng ai, shi a Shata Pru nta e asim sha nga ai hpe hkrum shaga lu ma ai.

(2) KNG a September 29, 2007 nhtoi hte “Jinghpaw 300 jan, Myen a NC madi shadaw hpawng hpe ninghkap” ga baw hta KIO Tingnyang Up Malai Gauri Zau Seng hpe 29-9-2007 jahpawt Myitkyina mare kaw SPDC hpyendap asuya woi galaw ai NC madi shadaw hpawng kaw sa lawm ai ngu ka tawn ai hpe mu hti ai. Du Kaba Gauri Zau Seng nsa lawm ai hpe chye lu ai.

(3) Dai shani September 29, 2007 na nhtoi hta ka shapraw ai “Kachins boycott junta's rally Supporting NC” ngu ai ga baw hta ka shapraw ai hta mung “KIO's Vicc Chairman Gauri Zau Seng gaw 29-9-2007 hta Myitkyina e galaw ai NC madi shadaw hpawng sa lawm ai hku ka shapraw tawn nga ai. Nteng ai shiga hpe kahtap ka tawn nga ai.

(4) KNG a October 3, 2007 hta ka shapraw ai, “Kachins fume over KIO, NDA-K praise for junta's NC” ngu ai ga baw hte shapraw ai hta mung, 29-9-2007 jahpawt Myitkyina kaw galaw ai NC madi shadaw hpawng hta KIO Vicc Chairman Gauri Zau Seng sa lawm ai lam ka tawn ai hpe mu hti ai. Dai hta nna grau sawng ai gaw “Gauri Zau Seng told KNG on the support to the NC” nga nna ka shapraw tawn ai, raitim Du Kaba Gauri Zau Seng hpe san sagawn dat yu yang, KNG shiga ngu ai ni hte telephone matut mahkai n nga yu ai nga nna tsun ai majaw, masu ka bang ai rai ang sam ai ngu myit la ai.

(5) KNG a October 4, 2007 hta ka shapraw ai, “KIA Dap Ba 3 Daju de KDA 60 ram shang bang wa” nga ai ga baw hte ka tawn ai shiga hpe mu hti ai. KIA Dap Ba 3 Daju de san sagawn dat yu yang, shanhte kaw KDA hpyenla kadai n du shang wa ai lam, mare buga hkan na ramma 50, 60 hpe hpyen sharin shakyang ai lam gaw galaw nga ga ai lam, dai hpe shiga na nna ka bang ai she rai na nhten nga tsun dan ma ai.

KNG gaw kaja wa shiga bungli galaw ai rai yang, na lu ai shiga hpe kaja wa teng ai kun? tup hkrak jaw hkra sagawn san shakyet la nna she shiga ka shapraw ai rai yang kam hpa mai ai shiga byin lu na re. Nteng n man ai shiga, shut ai shiga, masu ka shapraw ai shiga ni hte bungli galaw nga ai rai yang, KNG hpe gumhpraw karum jaw nga ai ni myit daw hten mat na hpe mung myit dum ra na re ngu hpaji jaw dat n ngai.