Wunpawng Amyu Sha Mungbawng Rapdaw (2) lang Numdaw A (1) lang na Rapdaw Salang Hkumra Zuphpawng

Knet; October 24, 2007

2007 ning October 24 ya shani Laiza Muklum, Laiza Hotel n'tsa htap hta Wunpawng amyu sha mungbawng rapdaw (2) lang numdaw a (1) lang na rapdaw salang hkumra zuphpawng galaw ai lam chyelu ai.

Zuphpawng hpe shani hkying 2:15pam hta Rev. Dr. Saboi Jum kaw nna zuphpawng ap akyu hpyi ai hte zuphpawng hpaw hpang sai. Hpawng hpa-awn Salang Hkawng Je kawn rapdaw ningbaw Sara Kaba Maran Zau Nan n'nga mat sai lam hte, shi hpe jawm makoi mayang dat sai lam shana sai. Du sa ai rapdaw salang yawng gaw n'nga mat sai rapdaw ningbaw hpe minute (1) zim sha tsap let hkungga jaw ngut ai hpang Bishop Francis Daw Tang kawn Sara Kaba Zau Nan a matu myitdum akyu hpyi ya sai.

Dai hpang hpawng hpa-awn kawn rapdaw ningbaw n nan bai lata tang la lu sai lam tang shana ai sai hte Sara Kaba Sumlut Naw kawn rapdaw ningbaw n nan Sarama Kaba M.Hkawn Lum hpe hkap tau shakram la sai. WMR rapdaw ningbaw M.Hkawn Lum kawn zuphpawng hpaw mungga tsun sai. Rapdaw amugun hpung a sumtang laika hpe hpawng hpa-awn kawn hti tang sai. Rapdaw a fund gumhpraw shang lam, rapdaw a shawng lam magam bungli hte seng n na Salang Gam Awng hte Hpawmi Roi Grawng kawn hti tang sai. Rapdaw Ningtau Amu madu kawn wunpawng amyu sha mungbawng rapdaw hpaw ninghtan tara hpe tang madun ai hte hpawng tingnyang up Sarama Kaba M.Hkawn Lum kawn hpaw ninghtan da ai rapdaw tara hpe shagrin ya sai.

Hpawng hpa-awn kawn KIO a 20,10,2007 ya n'htoi hte shapraw ai ndau laika hte seng nna wunpawng amyu sha mungbawng rapdaw kawn ka shana ai laika hpe hti shana lai sai. Rapdaw nomination komiti kawn ningbaw malai marai (2) hpe lata ai lamang galaw sai. Lata la lu sai ningbaw malai yan hpe Du Wa Howa Zau Gam kawn hkap tau shakram la sai. Tingnyang up kawn zuphpawng hpungdim mungga shaga sai. Bishop Francis Daw Tang kawn zuphpawng hpungdim akyu hpyi ai hte shana maga 5:00pm hta WMR rapdaw salang hkumra zuphpawng hpe shangut la lu sai.

(1) lang na Rapdaw Salang Hkumra Zuphpawng hta ginwang shagu na dat kasa ni hte rapdaw mu gun EC salang yaw marai 47 tup shang lawm ai lam matut chye lu ai.

Rev.Dr. Saboi Jum kawn hpawng ap kyu hpyi nga yang

WMR rapdaw ningbaw n nan hpe Sara Kaba Sumlut Naw kawn hkap tau shakram nga yang

WMR ningbaw Sarama Kaba M. Hkawn Lum kawn zuphpawng hpawng mungga shaga nga yang

Lata la lu sai WMR rapdaw ningbaw malai yan hpe Du Wa Howa Zau Gam kawn hkap tau shakram nga yang

Photos by, KNET.