Wunpawng Amyu Shayi Hpung Ginjaw Komiti (KWA) a Ningbaw galai sai

Knet; October 6, 2007

Amyu Shayi Hpung Ginjaw Komiti a Ningbaw Hpawmi Nahpaw Kaw Mai hpe Shakram ai Hpawng hte Ningbaw nnan Hpawmi Hpaure Hkawn Ja hpe hkalum la ai kyu hpyi hpawng hpe dai ni 10:00 Am aten Laiza, Amyu Shayi Hpung Ginjaw Rung hta galaw ai lam chye lu ai.

Zuphpawng hpa-awn Amyu Shayi Hpung Ginjaw Amu Madu Maran Ja Seng Hkawn kawn zuphpawng mahkyen hti ndau nna, Hpungtau Maran Naw kawn chyum laika hti ai hte hpawng hpaw kyu hpyi nna hpawng hpang sai. Wa Jau N'bwi Naw kawn Karai Kasang a Chyum mungga hte shatsam mungga jaw ai. Amyu Shayi Hpung Ginjaw komiti Ningbaw Malai Hpawmi Shanghtin Hkawn Tawng kaw nna ningbaw nnan hkalum la ai hte ningbaw tai lai wa sai Nahpaw Kaw Mai hpe shakawn shagrau shakram mungga shaga ai. Kanu Kawoi Hpawmi Nahpaw Kaw Mai hpe shakawn shagrau shakram mungga hta “anhte kanu kawoi gaw Wunpawng myu shayi hpung ni a labau hpe galaw tawn ya ai Ninghkring kanu rai mali ai, nnga ai kawn nga ai de, n lu ai kawn lu ai de, n chye ai kawn chye ai de dai ni shaning (30) ning kabye hkra, dai ni na madang du hkra woi awn ningbaw ya ai kanu rai mali ai hte maren, anhte myu shayi ni chyeju dum dik ga ai, nang kanu kawoi anhte Wunpawng myu shayi ni hpe woi awn sa wa ai shaning (30) ning hkrunlam hta myitru myit yak jam jau jam hkau n gun ja ai kawn, n ngwi n pyaw hkam n kaja ai ten du hkra, n pyaw let tim woi awn zinlum lai wa sai hpe anhte na chying wa chyeju dum shakawn shagrau let, anhte kanu kawoi a kasi yu la let, myu shayi ni a lam hpe matut shakut shaja wa na ga ai” nga tsun, ga sadi hkam la ai lam chye lu ai. Ningbaw yan hpe shat lit hte shagrau sha a kamhpa jaw ai lam, ningbaw tai lai wa sai Na Hpaw Kaw Mai hpe Ja Dazik hte shagrau sha a ai lam ni galaw ai.

Hkringsa sana rai nga ai Amyu Shayi Hpung Ginjaw Komiti a kanu kawoi Hpawmi Nahpaw Kaw Mai kaw nna mung numhtet shatsam mungga shaga nna, ningbaw ningnan hpe matut gun hpai sa wa ra ai lit ap ya hte shaman ya sai rai nga ai.

Ningbaw nnan Hpawmi Hpaure Hkawn Ja hku nna mung ap ya sai lit hpe hkam la sai rai nna lam shagu hta hpaji jaw shadum let Wunpawng Myu Sha ni rawt jat galu kaba wa lu na matu hte Amyu Shayi hpung mung grau grau rawt jat ai hpung tai wa hkra, mungkan hta dan hkung wa hkra galaw sa mat wa ga, nga shi a magam lit hpe hkam la wa sai.

Dai hpang Tingnyang Up Malai I Du Kaba Gauri Zau Seng, Ningbaw Malai Du Kaba N'ban La Awng hte Tingnyang Up Malai II Du Kaba Manam Tu Ja ni kaw nna Amyu Shayi Hpung hpe shakawn shagrau chyeju dum ga, matut galaw sa wa ai hta rau jawm shakut sa wa na lam hte seng nna tsun shaga hpaji jaw lai wa sai rai nna, Rev. Maran Samuela shaman ya ai hte hpawng hpe hpung dim dat sai.

Ndai hpawng hta sinpraw, sinna, dingdung, dingda Ginwang Ginjaw shagu na Amyu Shayi Ningbaw ni, Wunpawng Mungdan Shanglawt Hpung (KIO) Ninbaw Kaba Lanyaw Zawng Hra hte Ginjaw Salang ni sa du nna Amyu Shayi Ningbaw nnan Hpaure Hkawn Ja hpe hkalum la ai lam, hkringsa sana Amyu Shayi Hpung Ginjaw a kanu kawoi Hpawmi Nahpaw Kaw Mai hpe shakawn shagrau shakram ai lam ni galaw lai wa sai lam chye lu ai.

Amyu Shayi Hpung Ginjaw Komiti a ningbaw tai lai wa sai, Ninbaw Kaba Maran Brang Seng jan, Kanu kawoi Hpawmi Nahpaw Kaw Mai gaw 1978 ning August 19 ya shani, Pajau Bum Hpyen Dap hta, Wunpawng myu shayi ni mung rawt malan ai magam bungli hta shadang la sha ni hte maren mungdan a lit hpe arau jawm gun, madi shadaw lu na matu, myu shayi ni a atsam marai shapraw ap nawng lu na matu hte amyu shayi ni a ahkaw ahkang sharawt shatsaw la lu na matu yaw shada let, Wunpawng Amyu Shayi Hpung nnan hpaw hpang wa sai rai nna Amyu Shayi Hpung Ginjaw Komiti a Ningbaw magam lit hpe dai ni du hkra ap nawng gun hpai lai wa sai re lam chye lu ai.

Amyu Shayi Ginjaw Komiti Ningbaw Malai Shanghtin Hkawn Tawng kaw nna ningbaw nnan hpe hkalum ai hte kanu kawoi Hpawmi Nahpaw kaw mai hpe shakawn shagrau shakram mungga shaga nga yang

Ninbaw Malai Du Kaba Nban La Awng kawn shatsam mungga jaw nga yang

Kanu Kawoi Hpawmi Nahpaw Kaw Mai hpe shakawn shagrau shakram ai hte Ja Dazik shakap ya nga yang

Kanu kawoi Hpawmi Nahpaw Kaw Mai (pai) gaw Wunpawng Amyu Shayi Hpung Ningbaw nnan Hpawmi Hpaure Hkawn Ja hpe shaman ga hte magam lit ap ya nga yang