Ka-ni lu sha, dut sha ai Ka-ni ya marai 29 rim hkrum  

Knet; September 23, 2007

Tinang KIO uphkang ginra rai nga ai, Laiza Muklum hta mani na aten hta Ka-ni ya ni marai 29 tup rim lu sai lam chye lu ai.

Rim hkrum ai Ka-ni ya ni gaw, Laiza hte Miwa ga jarit hta rim hkrum ai rai nna, dut lu dut sha ai mung lawm ai lam chye lu ai. Ndai zawn rim ai hta, Laiza jarit Miwa Balik Dap ni hte tinang KIO Uhpung Laiza Balik Dap kaw nna bawng ban shahkrum let jawm rim la ai rai nga ai.

Rim hkrum ai hta Wunpawng ramma ni, myu shayi hpawmi ni hte Myen amyu ni hkrai rai nga ai. Tinang asuya kaw nna rim da hkrum ai Ka-ni ya ni hpe ya ten hta, dam ari hku nna Mare san seng lam bungli ni hta aten kadun galaw shangun tawn sai rai nna, n dai bawng masha ni hpe tinang buga de bai nhtang wa shangun dat na re lam hpe chye lu ai.

Rim hkrum ai ka ni ya ni hpe kade ya rim rawng na lam gaw garai n daw dan shi ai rai tim n tsa na matsun hte dawdan hparan ya mat wa nna bai dat ya na re lam chye lu ai.

Tinang KIO, Ka-ni pat jasan hpung kaw nna lai wa sai ten ni hta mung n dai zawn Ka-ni hte seng nna rim pat jasan ai lam ni, hpaji jaw hkaw tsun hpawng ni hpe galaw nga ai rai nna, ya ten Miwa ga jarit Laiza Muklum hta Ka-ni dut lu dut sha ai lam hte Ka-ni lu sha ai masha gaw lai wa sai ten lu sha dut sha ai hta yawm wa nga sai lam hpe chye lu ai.