Myitkyina mare hta Hpungkyi ni maja rim hkrum

Knet; September 27, 2007

September 25ya shana 9:30pm aten hta Myitkyina mare Yuzana hpungkyi jawng hte Khin Ma Ti Wun hpungkyi jawng kaw na hpungkyi ni hpe myen hpyen asuya kawn maja shang rim ai lam chyelu ai.

Shana 9:30pm hta Yuzana hpungkyi jawng kaw nna hpungkyi kaba U Ti Ya Sa Ya hte hpungkyi marai 92 tup hpe myen hpyenla ni maja shang rim ai rai nna, n rim hkam ai hpungkyi ni hpe adup gayet let hpyen mawdaw hta rim woi mat ai. Khin Ma Ti Wun hpungkyi jawng kaw na hpungkyi marai 42 hpe mung myen hpyenla ni maja rim woi ai lam chyelu ai. Myen hpyenla ni adup gayet rim ai majaw hpungkyi marai langai n nga mat sai hte hpungkyi marai langai gaw Myitkyina mung shawa tsi rung hta tsi tsi hkam nga ai lam chye lu ai.

Hpungkyi ni hpe maja shang rim ai matsing hpe Myitkyina Pyi Ne Mu hte Hka Yai Mu woi awn let myen hpyenla, myen pyada hte wan sat dap ni lawm ai lam chyelu ai. Rim hkrum ai hpungkyi ni hpe Myitkyina masat (1) hte masat (2) pyada dap hta rim rawng da ai. N kau mi hpe Wai Maw mare pyada dap hta rim rawng da ai lam chyelu ai. Ya aten hta Myitkyina mare na hpungkyi ni gaw hprawng hkawm nga ai lam matut chyelu ai.

Laiwa sai September 23 ya shani kaw nna Myitkyina mare hta hpungkyi ni lam hkawm n'gun madun hpang wa ai. September 23 ya hta hpungkyi marai 190 jan hte September 24 ya shani hta hpungkyi marai 136 tup shang lawm lam hkawm n'gun madun hpang wa ai lam chyelu ai