Myitkyina mare kaba hta kani lu ai jawngma ni grau grau law wa
Knet; September 7, 2007
Jinghpaw Mungdaw, Myitkyina mare kaba hta kani lu ai jawngma ni grai law wa nga ai lam, Myitkyina Dakkasu jawng kaw mung Ka-ni lu ai, Ka-ni nang hpam lu sha ai, htu ai ni law wa nga ai lam chye lu ai.
Jinghpaw Mungdaw Myen Hpyendap Daju, Dap-up Dukaba Ohn Myint gaw, lai wa sai shata laman, Myitkyina Dakkasu Jawng de jahkring hkring sa du gawan nga ai lam hpe mung na chye lu ai. Jawngma kasu kabrawng byin ai lam Jinghpaw Mungdaw de achya shuk wa na hpe sadi ai lachyum rai na re nga nna maram ma ai. Ndai zawn sa du ai hta, Dukaba Ohn Myint gaw "Dakkasu jawngma ni kaning re ai uhpung uhpawng de mung n shang lawm na matu" tsun shaga lai wa sai lam hpe na chye lu ai.
Bai nna, Dap-up Ohn Myint gaw, August shata 16 ya shani, Dakkasu jawng e galaw wa sai, "Hpun Hkai Nhtoi" lamang de shanglawm ai jawngma hte buga masha ni, Union Solidarity and Development Association (USDA) Hpung shang masha ni hpe, KIO a Mungdaw ahkaw ahkang hpyi ai lam n'tsa, alak mi ninghkap marawn jahtau ai lamang hpe mung woi galaw wa sai lam chye lu ai.
Raitim Dukaba Ohn Myint gaw Myitkyina Dakkasu jawng de sa du gawan gatsan yu hkawm ai, rai yang laika sharin jawng ni, Dakkasu jawng ni hta e, jawng ma ni Ka-ni nang hpam lu sha ai, htu ai lam ni hte seng n-htawm shadum sharin machye machyang jaw, sadi jaw ai shiga n na lu ai. Myitkyina Dakkasu jawng hta, man nga ai jawng gawk, nam dum, hka dum, hkan e, Ka-ni nang hpam lu sha shara byin nga ai lam, tsi htu samyit (Syringe) ni hkrup mara kabai ayai tawn ai hpe mu lu ai lam, jawngma ni hta, 60% daram gaw ka-ni nang hpam tsi lu sha ai, htu ai ni byin nga ma ai lam, sawk sagawn chye lu ai.
Jinghpaw mungdaw, Myitkyina mare kaba gaw laning hte laning kani lu sha, dut sha ai lam ni grau grau law wa nga sai rai nna Ubit, Alam, Shatapru hte Shadau mare ni hta dut sha ai lam grau law nga ai lam, mare buga shagu hta n lu sha ai, n dut sha ai pi n nga sai lam hpe sawk sagawn chye lu ai.
Myitkyina Dakkasu jawng Namdum kata, htu ngut chyalu Syringe ni hpe n dai zawn ayai da ai hpe mu lu
Myitkyina Dakkasu jawng namdum kata maza kawk hta htu ngut na kabai da ai Syringe ni hpe n dai zawn mu lu |
