MUNGHPAWM MYEN MUNG MUNGBAWNG ZUPHPAWNG (NC) SA AI K.I.O DATKASA NI TINANG GINJAW DE BAI DU WA SAI

KNET; September 11, 2007

Lai wa sai July 18 ya shani kaw nna September 3 ya shani du hkra, Yangon, Mawbe Ginwang, Nyawng Napin hta galaw ai, hpang jahtum ngu na Myen Mung Mungbawng Zuphpawng (NC) hta sa du lawm sai KIO a gawng malai Datkasa hpung ni marai manga gaw dai ni 2:30 hta tinang KIO Ginjaw, Laiza Muklum de bai du wa sai.

NC kaw nna angwi apyaw hte bai du wa sai Datkasa ni hpe, KIO Ningbaw Kaba Lanyaw Zawng Hra hte Ginjaw Salang ni, Wunpawng Amyu Shayi Hpung magam gun ni, mung shawa ni, magam dap makan dap shagu na magam gun ni yawng marai 1500 daram sa du hkap tau hkalum la ai lamang hpe mung galaw lai wa sai.

Dai hpang hkap tau hkalum ai hpawng hpe Wunpawng Mungdan Shanglawt Hpung, Ginjaw Komiti rung hta galaw ai lam chye lu ai.. Zuphpawng hta Ningbaw Kaba Lanyaw Zawng Hra kawn, NC kaw nna angwi apyaw hte du wa ai KIO gawng malai Datkasa ni hpe hkap tau hkalum mungga kadun shaga ai. Wunpawng Amyu Shayi Hpung Ginjaw (KWA) a gawng malai langai mi kaw nna mung hkap tau hkalum mungga shaga lai wa sai lam chye lu ai.

Du Kaba Manam Tu Ja kawn Mungbawng Zuphawng (NC) hte seng nna ngut kre ai du hkra lawm wa sai lam ni hpe tang madun lai wa sai rai nna, Ningbaw Kaba hte Ginjaw Salang ni rau sha manhkrum lu sha jawm sha let hkap tau hkalum hpawng hpe hpung dim dat sai.

Ndai hkalum hpawng hta Munghpawm Myen Mung Mungbawng Zuphpawng (NC) hte seng nna sanglang dan ai lam garai n galaw shi ai rai nna, sang lang tang madun ai lam hpe gaw manu ai ten Laiza Muklum hta Mungshawa Dap Shawa hpawng nna sang lang tang madun mat wa na re lam hpe chye lu ai.

NC na du wa ai KIO Datkasa ni

ndai zawn nampan shanghkang hte hkap tau la nga yang

Wunpawng Amyu Shayi Hpung ni mung n dai zawn sa du hkap tau hkalum

mungshawa ni n dai zawn hkap tau hkalum

hkap tau la nga ai mung shawa dap shawa

KIO Ningbaw Kaba Lanyaw Zawng Hra kaw na hkalum mungga shaga nga yang