Shaning (14) ning galaw wa sai Munghpawm Myen Mung a National Convention hpe shangut shakre lu sai majaw hkap tau madi shadaw ai mung shawa zuphpawng hpe Myitkyina mare kaw galaw na shiga a lam

Knet; September 28, 2007

Wunpawng Amyu Sha ni gaw Munghpawm Myen Mung hpe British Asuya a lata kaw nna shanglawt la na shaloi, Munghpawm Myen Mung ngu nna mungdan masha nlang maren mara arau jawm nga pra shajang na matu munghpawm hpe jawm galaw tawn sai rai nga ai. Raitimung, Munghpawm Myen Mung shanglawt ai hpang shaning shi (10) ning jan wa tim, Wunpawng Amyu Sha ni myit mada ai munghpawm a shawng lam gaw, mungdan kata e hpu nau Myen amyu sha mung masa ningbaw ningla ni yawng myit garan zang ayai uhpung hpaw shada da gasat hkat ai, mung kata majan laja lana byin mat wa ai majaw, Wunpawng Amyu Sha ni gaw tinang Wunpawng Amyu masha ni a mung masa shawng lam hpe (1961) ning hta galaw wa ai rai nga sai.

Wunpawng Amyu Sha ni gaw munghpawm ngu ai hpe ding yang shangang shakang na matu ra sharawng ai re majaw, 1976 ning June shata (6) ya hta Munghpawm Myen Mung kaw na kaga hpu nau amyu masha ni hte rau munghpawm hpe jawm shangang shakang na matu KIO Ginjaw kaw policy lam yan galai masat ai hpe mung galaw tawn sai rai nga ai. Dai hte maren, 1994 ning hta Munghpawm Myen Mung hpyen dap asuya hte gasat gala shazim nhtawm, munghpawm a shawng lam hpe asuya hte rau ta gindun jawm galaw wa sai rai nga ai. Dai re majaw, 2004 ning hta Munghpawm Myen Mung hpyen dap asuya kaw nna National Convention galaw ai de KIO uhpung sa lawm na matu saw shaga ai de mung kasa dat nna sa shang lawm wa sai. 2007 ning September (3) ya shani National Convention shangut shakre lu ai kaw du hkra Wunpawng sha ni myit mada ra sharawng ai lam ni hpe lang hte lang tang madun let shang lawm sai rai nga ai.

Ndai aten hta National Convention ngut kre sai rai nna dai National Convention shangut shakre lu ai hpe hkap tau madi shadaw ai lam, bai nna ningpawt ninghpang gaw da ai tara ka shapraw lu na hpe mung tau madi shadaw ai lam, mung shawa zuphpawng langai hpe Jinghpaw Mungdaw, Myitkyina mare kaba kaw 29-9-2007 ya shani hpyen dap asuya seng ang ai ni kaw nna woi galaw na matu hkyen lajang nga ma ai lam, dai hkap tau madi shadaw shawa zuphpawng hta KIO sa dung lawm na matu, M.P.Kh. Taing Mhu kaw nna saw shaga ai lam na chye lu ai.

KIO Ginjaw Komiti gaw 1947 ning hta hpu shawng hpu ba ni woi galaw tawn sai Munghpawm Myen Mung ngu ai hpe jawm shangang shakang na mung masa shawng lam re hte maren,dai hkap tau madi shadaw ai shawa zuphpawng hta salang dat nna sa lawm shangun na re lam hpe na chye lu ai.